白糖糕 (內附食譜)

白糖糕係我鍾意的中式小吃之一，每次都會吃3-4件架！成日都好想知點整。

前排係〝Grace〞到見到佢整〝自製白糖糕〞，賣相與街一樣。

尋晚我就動工嘞！因為要發酵8小時，我就臨瞓前整定個漿來發酵。

瞓醒就立即拎去蒸，真係好期待成品。

出來賣相真的與街一樣，係食落實左D，若然唔係就完美嘞！

熊貓話OK，係比平時硬左D，佢比較喜歡硬的，而我就鍾意食QQ的。

甜味剛好，係硬左D啫！

後記：3/5，我再蒸返熱來吃，熱食真係好軟熟，所以記得熱食喇！

發酵8小時前 (左圖)；發酵8小時後 (中圖)；完成品 (右圖)

白糖糕

材料: (食譜來自 VDO NEXT)

粘米粉              100克

糖                      80 克

水                       220ml

泡打粉              1/4 茶匙

酵母                  半茶匙

溫水                  1湯匙

做法：

1) 將糖加入水中用細火煮至糖溶化。

2) 粘米粉、泡打粉過篩後撞入糖水，其間不停攪拌，以免起粒粒。

3) 將粉漿用細火煮熱，不停攪拌，然後過篩待涼。

4)  酵母加入暖水中拌勻靜待5 - 10 分鐘。

5) 將酵母水倒入粉漿中拌勻發酵 8小時。

6) 發酵完成後，將粉漿倒入已掃油既盤內，再用大火蒸30 分鐘。

整後心得：

l          隔晚後發現有沉澱物，我倒晚時候輕輕攪勻，因為怕泡泡會散，令到效果唔好。

包餅製作員證書課程

今日我與纖瘦小姐第一日開學，學整包餅。

我多年前學過4款蛋糕，而上星期就學過唧花。

平時睇書和上網照食譜做，但都會有好多疑問，又想知點解要咁做。

一直都想報堂學下，但又貴，而且Miss又未必有問必答，總會有些收埋。

纖瘦小姐知道〝IVDC〞有〝包餅製作員證書課程〞，而且係免費的。

我地就一齊去報名，報名時又要Interview架！

原來仲有車馬費添，咁當然要出席率達80%，讀完又會幫你搵相關工作。

一星期返3-4日，星期六都要返，有時返全日，有時返上午或下午。

〝IVDC〞即係〝匯縱專業發展中心〞：http://www.vtc.edu.hk/ivdc/index.php

日式三絲炒烏冬 (內附食譜)

晏晝食Tea既時候，高達叫佢炒烏冬好少，所以今晚炒過一齊食。

我本想買〝壽桃牌〞炒烏冬，因為有埋汁料不用煩。

不過，實在太貴，所以我就買左〝壽桃牌〞湯烏冬(粗)。

汁料就要自己調教，但估唔到都唔錯。

味道鹹鹹地，帶點甜，仲有少少酸，因為用左味醂。

豉油、糖和味醂都用左好多，但味道一D都唔濃。

高達都話味唔錯，而且唔濃。

日式三絲炒烏冬

材料：(3-4人份)

烏冬                   6個

配料：

雞扒 (切絲)       0.59磅

火腿 (切絲)       4片

洋蔥 (切絲)       半個 (小)

銀芽                   1/4斤

蒜蓉                   2湯匙

醃料：

豉油                   少許

糖                       少許

味醂                   少許

胡椒粉               少許

油                       少許

生粉                   少許

汁料：

味醂                   5湯匙

壽司豉油           7湯匙

糖                       2 1/2湯匙

做法：

1.          汁料撈勻，備用。

2.          烏冬用水喉水沖開。

3.          雞扒用豉油、糖、胡椒粉和味醂醃15分鐘，再油和生粉醃多一陣。

4.          洋蔥爆香至金黃，備用。

5.          火腿炒一陣，備用。

6.          銀芽下一湯匙水炒至收水，備用。

7.          爆香蒜蓉，下雞扒炒至熟，備用。

8.          熱鍋下烏冬，汁料逐少加入烏冬內。

9.          汁料收汁下配料兜勻，即成。

貼士：

l          炒時一手拎鑊鏟，一手拎筷子。

Burgers@ThreeSixty

上次係〝圓方〞見到ThreeSixty內的Burgers好似唔錯，所以諗住搵日去試。

老公尋日行得好左，我想佢出去行下。

我趁今日陪老爺去眼覆診，就約埋高達一齊去試。

老爺唔知老公整到，所以冇陪老爺。

呢間漢堡價錢和Mos Burger差不多，整體好過Mos Burger一D，係塊漢堡乾左D。

老公就話唔好食。

製作過程

希臘羊肉漢堡 (配山羊芝士、紅椒、薄荷乳酪) Set $54 (高達)

辣牛肉漢堡 Set $50 (老公)

煙肉、藍芝士牛肉漢堡 Set $55 (我)

我想煮意大利飯好耐，被我係ThreeSixty見到有意大利米，所以買左一盒預備遲D煮。
無糖豆漿就用來整豆腐花既。

鳳園蝴蝶保育區

我趁開學前最後沖次，就約埋高達去〝鳳園〞影相。

老公有傷放假，所以我要係老公瞓醒之前回到家，所以就約要一早去。

今日一早7點幾與高達食早餐，然後出發。

果到開9點，已經有人影緊。

以為平日冇乜人，點知‧‧‧，除有蝴蝶發燒友之外，仲有幼稚園來導賞添！

今日遇到既蝴蝶品種不多，仲影到差不多走就落雨。

地址：大埔汀角路鳳園村150號
入場費：$20

伊利沙伯醫院

尋日12點幾收到老公電話，電話講得唔係好清楚，而且又講得細聲，話佢而家係Q醫急症室，要我立即去Q醫。

我去到佢同事就回公司，老公動彈不得，又痺又痛，已打左2支止痛針。

老公係公司絆倒，撞左埋牆反彈落D貨到，條腰撞到，照左X-Ray冇事。

老公等做物理治療，我點幾去到等到4點幾先見物理治療師，物理治療師用機電左老公15分鐘，然後再叫佢落床行下，老公企起身成個人都震晒，又企唔直，物理治療師就提意留院，後來再見醫生都要佢留，老公唔想都要留。

物理治療師話老公扭到條腰，醫生就話老公尾龍骨與骨之間軟骨有問題，加上可以壓住神經線。老公要再等明天物理治療師評估後，睇下要繼續留醫，定可以出院。

老公要食粥，就叫高達買來，臨走前高達攙扶老公慢慢去V V，之後我地就去食飯。

今日晏晝老公出院了，可以自己慢慢行，但有點暈，止痛針過後又痛又痺。

之後又要去家附近醫院做物理治療，但係一般排期24星期，而家都未知幾時有得做，因為4星期內先會有人通知幾時做。

老公而家好似得返半條命咁，瞓左一日又瘦左。

今朝專登整左蛋糕仔等老公係醫院食，而家就留返係屋企食。

Cup Cake‧裝飾

之前係肥阿哥會所報名學整cup cake和裝飾。

今日我與阿嫂就去上堂，其實蛋糕就係Miss整定和示範左一次。

跟住又教我地唧花，但都要自己領略和做得多先得。

雖然我只係親手做裝飾，但我就問左好多問題，真係唔錯。

一入去就見到整好蛋糕，都知自己冇得整。

Miss既用具

Miss示範整蛋糕

出爐喇！若冇裝飾就可以焗耐少少，等表面金黃。

溝色整唧花

Miss示範唧花

左邊係我既唧花練習，而右邊就係阿嫂既。

除唧花仲有其他裝飾

我既製作品

我覺得最靚係呢個。

手多加左朱古力碎，唔加仲靚。

阿嫂作品

西九海賓長廊‧尖東海旁

尋日晏晝高佬話突然放早，所以相約夜晚去〝西九海賓長廊〞影夜景。

可惜老公約左老爺來我地家吃晚飯，最後邀請埋高佬和高達一齊來吃飯。

我地吃完飯9點幾出發，坐巴士一程車到。

行到入去未影〝食蕉〞話仲有10分鐘close，成個人即時〝灰〞晒。

影左一陣就走去〝前水警基地〞影，準備影又熄燈。

唯有再轉去〝尖東海旁〞，點知對面海又冇乜着燈。

邊食西北風行去尖東食宵夜，全晚總結得一個字〝灰〞，去到邊燈就熄到邊。

好大風，大風到腳架都郁，所以有好多相都蒙。

西九海賓長廊

前水警基地

尖東海旁