今日真係悶到嘔，整下呢樣整下果樣時間都係過得好慢，所以係傍晚時份就動工整下餅。
我好多時都想整下餅，但人懶又唔想開電動打蛋器，連焗爐都唔想開，我係書到搵到呢款簡單易做既食譜，而且要用黑芝麻，我果包開左好耐可以用埋佢，咁就啱晒我嘞！雖然要用焗爐，而書又要用電動打蛋器，但我見用植物牛油用手動得喇！
餅好鬆脆，可惜試了兩啖就全部棄掉，因為可能黑芝麻粉擺得耐，焗時聞到益味，焗完都係益益地，還帶點味苦味，下次買黑芝麻粉要盡快用完，以免嘥。
奶油黑芝麻餅
食譜來自：我的第一本餅乾入門書
材料：(約19個)
低筋麵粉 100克
植物牛油 100克
糖霜 80克
黑芝麻粉 100克
做法：
1. 取一鋼盆，倒入軟化的植物牛油，加入過篩的糖粉，以打蛋器拌勻。
2. 將低筋麵粉過篩，加入作法 (1)中，再放入黑芝麻粉，以刮麵刀拌成麵糰。
3. 將作法 (2)的麵糰分成每個20克，搓成圓球狀，再稍微壓平(壓的越升薄烤焙時間越短)。
4. 放入烤箱上層以170度烘烤約25分鐘即可。
之前睇阿蘇介紹過〝蒜片意粉〞，一直心思思想試整。我見今日屋企什麼材料都冇，落街買又唔知食乜，但有意粉啵！所以就來一客〝蒜片意粉〞，雖然簡單，又估唔到味道不俗丫！
蒜片意粉
材料：(1人份)
意粉 1份
蒜頭 2-3粒
洋蔥 少許
椒鹽 少許
做法：
1. 蒜頭切片、洋蔥切粒，備用。
2. 意粉烚好後盛起。
3. 爆香蒜片和洋蔥，再下意粉和椒鹽兜炒，試味，即成。
尋日係新屋舉行左一個〝Boxing Day Party〞，雖然屋細都可以容納到11個大人~真利害，之但係唔係望埋去就冇位空位咁囉！
我一早已計劃好當日的Menu，大家都冇異議，只係高佬有一要求啫！而且佢都準備左一樣食物來。我與老公早一日已買定好要用既野，有D食物我早一日整好添！
經過今次之後原來有好多人都鍾意熱食豆腐花，雪凍左之後又實過熱，下次都係熱食算，仲有好多人都鍾意加糖水，下次要緊記這兩點。起初怕豆腐花唔夠，所以我整左Double份量，而家仲有大半係我雪櫃，要盡快焚化左佢，唔係又要倒。
我一共整左十款野食，食物份量都預得唔錯。我因為要忙住煮食，所以有部分相就拜託熊貓幫我影。整體食物大家都好滿意，佢地滿意我就最開心。
煙肉磨菇薯蓉
薯仔蛋沙律：高佬Order的，佢話好好食，整得好食過佢，真係過獎嘞！
新鮮什果沙律
滷水鴨舌：鴨舌我最愛，自己製滷水汁。早一日已滷定，味道剛好。
滷水雞翼：自己製滷水汁。因為比鴨舌滷得耐，有D太入味鹹得滯。
滷水牛腱、滷水蛋：自己製滷水汁。我刀功唔得，想切薄D，就切到隻手，只係皮外傷。牛腱切得太厚，有D靭，薄的話就完美喇！
辣水魷：高佬自家製，好受歡迎，老公好鍾意食，遲D要高佬教我整先。
日式凍豆腐
意式意粉
叉燒蛋炒飯
益力多慕絲蛋糕：都係果句喇！個個都讚~Good，呢個份量剛好。原本諗住整有芝士味，但忌廉芝士實用不完又怕嘥，而且呢款蛋糕又有材料係到，所以再整多次。
豆腐花
以前平日都好多節目，到左節日就更加唔駛講喇！但人越大Party就越少，近幾年仲係零添！我有好多年都冇參加Christmas Party，因為朋友們都冇攪，可能大家都有家室各有各忙。半個月前與迪迪媽傾電話問開聖誕有冇野攪，所以我地就攪左呢個Party嘞！
今次Party真係鼎盛，大連細有17人，好在迪迪媽屋企夠大可以容納晒。我鑑於搬屋後地方少，所以Party抽禮物條件係要實用、用得或食得，咁就唔會浪費喇！全部禮物都放係聖誕樹下。
食物揸Fit人係迪迪媽，佢預食物預得非常好。全部食物大合照先，其實仲有兩個Pizza和樹頭蛋糕未拎出來，因為檯唔夠位擺喇！
美心到會送左兩個小食鉗和3個杓，我每樣認領左一個。
美心到會，樹頭蛋糕係美心送，不是餐的。
火雞兩盎醬都冇乜味。
每個人都讚這隻火雞好嫩，所以大家齊齊吃剩半隻咋！
迪迪媽公司Party冇人吃啫喱糖，所以就回來，我地這邊有咁多個小朋友，所以都吃左一半有多。
另外，又去左吉之島買左兩盤壽司。
又係Pizza Box買左3個Pizza。
點少得我既〝益力多藍莓慕士蛋糕〞蛋糕呢，又係果句喇！人人讚~好！
〝80% Orange@DIY Cake〞不織布蛋糕之前我都整一次，果次仲一次整左兩個，因為送比熊貓和開心果作為生日禮物。
今次呢個就係自己用來珍藏，雖然做得比上次靚，但仲有好多地方要改進，而且做得比上次快好多添！
今晚我與老公要去大酒店，我見茜茜係果區，而且後日就要返回法國，加上每日茜茜都要做導遊帶阿Ben (她的老公)、老爺和奶奶遊香港，所以晏晝就找她夜晚一聚。
我地係大酒店盡的心意幫手摺野，由7點幾逗留到9點鬆D離開，然後去打冷，食完飯與茜茜聯絡，佢剛好準備由尖沙咀坐的士回來。
大家都食完飯，所以食糖水就最好，茜茜安頓好老爺和奶奶後，就與阿Ben來糖水舖找我與老公。糖水舖糖水好一般，不過我地志在聚下，都唔緊要，之後茜茜和阿Ben送我地去搭車，係等車既時間大家都不忘影相留念。
我而家住得與機場比較遠，所以今次不能送她，茜茜要後年先回來，有好一段日子都見唔到佢，真係有點不捨得。
我與茜茜都鍾意食榴槤，但我地老公唔鍾意，阿Ben仲話陣味好似垃圾。我地食既時間佢地兩個好似中毒咁，阿Ben將件衫拉到上鼻，後來老公比張薄荷味紙巾阿Ben索一索，佢地兩個男人動作一致，笑到我同茜茜死。
嘩~好多榴槤肉，真係滿足，有好多年冇食喇！
焗雪山：阿Ben想食〝芒果豆腐花〞，但芒果唔當灶，所以冇得吃，佢唯有order呢款。上面係蛋白，下面係雪糕有3款味揀：芒果、朱古力和雲呢拿，佢揀左古朱力味。
我唔記得咩名，上面係蛋白，下面係芝麻糊，有凍有熱，我當然叫熱架喇！但蛋白好膩，所以食唔晒。店員好似話人氣定什麼什麼，但好普通，唔係咁好食。
茜茜叫既唔知咩冰，味道一般，我都係鍾意棉花冰多D。
我見雪櫃有盒〝藍莓果醬〞就快到期，咁啱今日有朋友來，所以就上網搵下食譜。我係韋太到搵到〝益力多藍莓慕士蛋糕〞。
由於第一次整鏡面，倒落去慕絲時大力得滯撞起左D慕絲，攪到鏡面好似發霉咁，所以冇正面睇既。佢地話甜左D，但就好好味，唔夠上次〝香濃綠茶慕絲蛋糕〞好味，不過，我就唔覺得甜，咁既話下次整就將糖份減D先。
我將食譜既淡忌廉份量改左，因為我買左一盒細，又唔想落街買，買多盒又怕嘥左，而且我磅過只係差少少，差少少都唔多覺，成果唔錯。
益力多藍莓慕士蛋糕
餅底材料：(6吋模)
消化餅 4塊 (60克)
牛油溶液 25克
餅底做法：
1. 將消化餅壓碎，加入已溶的牛油混合，壓在蛋糕模內，放入雪櫃冷藏一會備用。
慕士餅材料：
藍莓果醬 75克
砂糖 30克
益力多 1枝 (100克)
淡忌廉 200毫升
檸檬汁 1+1/2茶匙
魚膠粉 7克
水 40克
藍莓鏡面材料：
黑加侖子啫喱粉 45克
魚膠粉 (拌勻) 1/2茶匙
熱水 125克
藍莓果醬 50克
慕士做法：
1. 將材料藍莓果醬、砂糖、益力多、檸檬汁拌勻後放入鍋內隔熱水座溶後放涼。
2. 用電動打蛋器將淡忌廉打起至6成備用。
3. 魚膠粉加水拌勻，用熱水座溶後加入藍莓醬內拌勻。
4. 將藍莓醬料加入已打起的淡忌廉內拌勻。
5. 將慕士料倒在餅底上，冷藏1小時。
6. 將藍莓鏡面材料攪勻倒入慕士料內，將藍莓鏡面冷藏2小時即成。
今日係茜茜回港補擺喜酒大喜日子，佢早在上個月已回港準備，而她的老公Benoît與他的父母在上星期六晚才到港。
茜茜不是太舖張，只是擺6圍酒席，所以今晚有幸出席是一種榮幸。佢一早已邀請我與迪迪媽幫手坐陣Reception，由於人數不多，所以有史以來做Reception最舒服的一次，而且仲有好多時間影相添啵！仲有其他朋友幫手影相、司儀和錄影。
今晚出現左3種語言：廣東話、英文和法文，因為Benoît不懂廣東話要由Sai Sai或司儀翻譯成英文，而Benoît的父母只懂法文，所以再由Benoît將英文翻譯成法文。
當然唔少得玩新郎和新娘，我地沒有三級遊戲，只利用新郎不懂廣東話，就來一個〝超級無敵估歌仔〞，讓新娘子來估下歌名，新郎有時做出古怪表情令到大家十分開心，若新娘估不到，就要來賓幫手，幫到手的就有封利是。
我整左9個老婆餅送給對新人，寓意〝長長久久〞，當然仲有禮金喇！茜茜爸爸好鍾意食。
茜茜最愛Hello Kitty，所以簽名冊都要找它幫手。
結婚蛋糕~
開餐時抬頭一望，才發現天花板有兩個〝囍〞，真係有心思。
乳豬對眼係一對〝心型〞焛燈，樣樣餸都好味。。
最好味就係呢款〝百花釀蟹拑〞非常彈牙。
呢款名堂叫〝永結同心〞又係好好味，我聽到有人問部長有冇得買，攪到我又想整下蝴蝶餅添！
