今朝陪阿B去〝協康會〞上堂後，去左意粉屋吃Lunch，然後再到公園玩，跟住就刑我去睇床褥，床褥緊係要試架喇！阿B就由我試床褥開始瞓到我叫走先起身。
起初都係齋瞓，跟住比個枕頭佢，Sales問佢要唔要被？佢又話要啵！我問佢舒唔舒服？佢又話舒服。
阿B個樣唔係唔鍾意，而係佢食緊糖，佢不知幾爽丫！臨走我就影低佢，真係被佢笑死。
2009年9月23日星期三
深井陳記燒鵝
今日我想行街，所以相約熊貓，不過要等佢放工先行得。今晚老公可以來與我地一齊吃飯，時間尚早就去睇床褥。
我行到有D餓，在大家都毫無頭緒頭之下經過〝深井陳記燒鵝〞，燒鵝老公好鍾意食，所以入去一試。
今次我想介紹唔係佢既燒鵝或小菜，係佢想介紹佢係冇味精，我唔知係咪間間一樣，我去果間係荃灣近千色店的。而家外出吃飯一定有味精，但佢既湯真係唔覺有，而小菜食完都唔覺得口渴，所以我就標籤佢係冇味精，就算有都唔多，至少吃完不用飲水。
我地叫左兩款小菜，再加5蚊就可以轉套餐，套餐有一碗飯、湯或餐飲，當然凍飲和特飲就要額外再加錢喇！另外加多鵝脾例牌。
熊貓想飲湯，但怕有味精，仕應話〝湯係冇味精〞，所以佢一試。我地都試過真係冇味精啵！唔錯，佢試過個湯後就決定買多個外賣給她的男友。
是日例湯：青紅蘿蔔煲排骨，冇味精，有住家Feel。
西蘭花鮮魷：西蘭花好爽，但老公話鮮魷好似唔熟。
椒鹽豬扒
鵝脾例牌：皮脆肉嫩，因為唔係一隻燒鵝，所以肉唔多。
2009年9月22日星期二
迷你金裝白蓮蓉@廣東月餅 (內附食譜)
今日不用去新屋又不用湊阿B，所以我可以有時間整〝傳統月餅〞，本想整埋冰皮，可惜雪櫃太細，唯有等下年喇！
今次個皮好薄，而麵糰色澤又冇書中咁深和軟，所以有點難度，唔知係咪我用〝黃金糖漿〞稀呢？
食譜可以整到40個，每個重40克，我用左2款模去印。有咁多我要慢慢諗下送比邊個，但老爺唔駛諗一定要送，上年佢都話OK。我怕唔好食，等佢回油後試左先送比人。
食譜冇教鹹蛋黃點整熟，所以我跟上年個食譜〝迷你單黃黃蓮蓉~廣式月餅〞去整鹹蛋黃。
第一款
第二款
廣東月餅
食譜來自：專業麵包甜品製作
月餅皮材料：(約40份)
麵粉 360克
糖膠 240克 (我用〝黃金糖漿〞)
梘水 2/3茶匙
生油 9克
水 3克
月餅皮製法：
1. 全部材料放盤中。用手搓勻至無粉粒 (此時麵糰會較軟)，用保鮮紙蓋好，放置3-4小時。
2. 直至不黏手及可做成形狀。
蛋黃蓮蓉餡：(約40份)
蓮蓉 1000克 (市面有售)
熟鹹蛋黃 10隻 (1開4)
蛋黃蓮蓉餡做法：
1. 蓮蓉分成40等份，搓圓，中間用手指壓一小洞。放一小粒鹹蛋黃入小洞。
2. 掐實收口，搓圓。
月餅造型：
1. 預備皮及餡，將皮分成40等份。
2. 桌上撒上麵粉，將月餅皮輾薄。
3. 用皮包著餡。
4. 將收口掐實。
5. 搓圓，滾上麵粉，以防黏著月餅模。
6. 放入月餅模，用掌心壓平。
7. 脫模。
8. 放在掃油的焗盤或烔爐紙上，噴上水，放入預熱180度焗爐，焗約5分鐘。
9. 掃上蛋液，放回焗爐再焗5分鐘，掃多一次蛋液，再焗5-10分鐘至金黃色。
月餅焗完後，餅皮會乾硬，置室溫回油，餅皮才會有光澤及較軟。
海鮮好煮意@都市閒情食譜
今日落街買鹹蛋見到〝7-11〞，所以入去八下有冇新烹飪書，就被我發現都市閒情又出食譜，仲要係18蚊，所以我隨意睇下覺得OK就買左。
每日我都有睇都市閒情〝今晚食乜餸〞既環節，若有我喜歡既菜式我都會錄低。不過，這書只得〝陳國賓〞和〝李錦聯〞既菜式，而沒有Annie啵！若然有埋佢就最好，咁可以多元化D嘛！
我諗這書書局都會有得賣，上次買〝兒童食譜@都市閒情食譜系列〞都係係書局買既，所以唔一定去〝7-11〞。
書名：都市閒情食譜~海鮮好煮意
發行代理：同德書報有限公司
出版人：余銘
售價：HK$18-
2009年9月21日星期一
等到人都〝牛〞
尋晚零晨3點幾先瞓，今朝8點幾就起身，因為我要去左Sharp office拎機頂盒，然後就去新屋等師傅來裝電視。星期六裝左冷氣，不過漏水，所以順便約埋冷氣師傅來整。
我11點幾買左少少野食當lunch回新屋，等到12點幾師傅都未來先食野。我問兩個師傅幾時到？電視師傅好忙未知幾時到，冷氣師傅又係忙緊，要應該要黃昏才到。
我一個人對住四道牆，加上呢幾日好攰，所以我僕係膠橩到眠一陣，瞓到手腳都脾晒。我都唔知等到幾時，唔想夜食飯，4點幾就落街提早食晚飯。
電視師傅約5點通知我6點前到，回到去我再催促一下冷氣師傅，佢話今日忙應該約7點才來到，咁唯有等。
電視師傅果真5點50分就到，可惜大廈還未裝高清~激氣。冷氣師傅6點20分都到，全部總算攪掂，但係老公有排都未放工，所以獨自一人回家。接下來就講下過去3日既行程。
18 September 2009
我係新屋等老公和高達放工，高達來幫我地辦D事和換大門鎖，佢地兩個都要O.T.，但老公比高達早到，所以我地試下自己換大門鎖，原來好易換啫！
19 September 2009
今日我與老公11點幾出門去旺角買雲石條，然後3點前回新屋等電器、煤氣公司來裝煮食爐和煤氣爐。出到旺角預備去食野，突然收到電話，話電器已送到門口，冷氣師傅又話係樓下，於是我地立即飛小巴回去。
老公話整冷氣好耐，等佢去佢去應付叫我去食野先，一個人食去〝麥麥〞攪掂算。我食左一隻雞翼冷氣師傅就到，佢負責裝埋抽油煙機，但全屋傢俬圖都係我到，所以我立即將食物打包回去。
老公等到3點幾有點餓，佢就落街買外賣回來吃。我地等師傅走晒，執晒垃圾就出去旺角買雲石條。去第一間已成交，要開新條，所以要遲幾日先有。我地再搭巴士回新屋等高佬來幫我地裝吊燈。
20 September 2009
我約好肥阿哥去宜傢買餐檯和櫈，可惜門市冇貨，我地立即付款，再去宜傢上水倉取貨。
大前晚等老公與高達來，日落既時候好靚，所以我忍唔住影左幅相。新屋前面冇遮擋，而且前面再冇位起樓，來過新屋既朋友都話我地間屋既景好靚。
2009年9月16日星期三
幸福西點‧浪漫滿屋
今朝湊左阿B返學我就回家，在回家前要去郵局辦些事，可是郵局未開，咁就去左〝7-11〞繳費先，我又睇下呢間有冇〝元氣麵包‧活力滿屋〞和〝超省錢‧快煮食譜〞之類咁平既食譜書。我係擺食譜書睇唔到有，死心不息在架上上下搵下，哦~原來放左係雜誌到。
〝幸福西點‧浪漫滿屋〞和〝元氣麵包‧活力滿屋〞都係屬於〝Tasty〞系列，這系列一共有4本，另下兩本暫時冇乜興趣，所以唔會刻意去搵。
這本〝幸福西點‧浪漫滿屋〞材料會用到乳化劑、塔塔粉和牛奶香精，雖然唔係每一個食譜都用，但都係化學野。
書中提及的〝牛奶香精〞使產品增添濃郁的奶香味，但因此品為香料，吃多易致癌，建議改用牛奶，但我唔知點解佢在食譜內仍用，又冇講用牛奶代替既份量是多少。
尋日我去過新屋附近幾間的〝7-11〞都冇得買，所以應該不是間間有，大家想買經過〝7-11〞就要留意下喇！
書名：幸福西點‧浪漫滿屋
編著：黎國雄
發行所：八方出版股份有限公司
售價：280 (新台弊)
推薦價：HK$28-
作者
黎國雄擁有二十多年經驗的烘焙大師，他的製作技術和創意備受各界讚賞。無論是剛入門的初學者，或是追求進階的烘焙師傅，經過黎師傅的詳細解說和指導，將在烘焙的技術上大大進步。
前言
麵點美食已經成為大眾不可或缺的食品，稍稍留意就可以發現，早晨或傍晚時候，中式的包子店、西式的麵包店、蛋糕專門店都聚滿了顧客。包子店、麵包店也越開越多，競爭卻越來越大，所有的老闆都渴望顧客光臨自己的店鋪，所有的麵點師傅都希望顧客喜歡自己做出的產品，如何才能吸引更多顧慮呢？
要吸引顧客，當然是產品要好吃；要做出受歡迎的產品，關鍵是麵點師傅。一位出色的麵點師傅，首先要有的當然是扎實的基本功，但要顧客記住你的產品，就要讓產品有獨特的味道或造型。麵點的製作講究選料、分量搭配、造型、烘烤蒸製的溫度和時間等等，但這只是基本功。現在的顧客要求很高，既要好吃，又要好看，而且喜歡特別、有新意的東西,所以要想產品出類拔萃，就要抓住顧客的心理，製作麵點時多發揮創意。
黎國雄是烘焙行業的大師，他製作麵點的技術和創意備受業界所賞識。書中所有的麵點都是經黎師傅精心挑選、最受顧客歡迎的，並由黎師傅用心製作，從造型到味道都是一流的水準。
所謂學有專精，這套『Tasty』系列叢書共分為西點'蛋糕、麵包、中式點心等四大主題，內容介紹了許多項產品的製作方法，文字簡潔，搭配清楚的流程圖片，易看易懂，既有入門基本實例，也有進階創意作品，不管你是剛入門的小師傅，都可以把此系列食譜書當作學習的參考。
本書《幸福西點浪漫滿屋》，介紹了多種西式點心的製作方法，如各海綿蛋糕、戚風類、重油類等多種美味小蛋糕，還有各種特別的派、塔、餅乾曲奇等等，無論味道、口感或者造型都極具新意，是技術和創意的絕佳組合。
家電
今朝湊左阿B返學，然後係娘家逗留到2點就出門口去新屋，天公太好所有雨都係我出門前落晒，到我出門時太陽伯伯同我〝Say Hi〞，上到車又開始天陰陰喇！我係新屋附近吃完野。
今日我既工作要取回大門和大閘Key，仲要將全屋黏地板時〝吱〞出來的膠水抺去，緊係唔係就咁抺喇！要用〝松節水〞先可以除，不過用火水都得既。〝松節水〞嗱到我雙手都白晒，而且仲有陣味，好在有洗手液咋！今次我發現有個方法比之前既好，若有下次就識得點做喇！
頭先〝入伙大使〞係維修表到冇mark有比Key佢，所以只可以比大閘匙我，上次我交門匙〝入伙大使〞行開左，個護衛幫我轉交比佢，但屋內又有維修過，咁即係有Key喇！〝入伙大使〞仲話呢D情況若要打官司，我地一定輸，最後〝入伙大使〞都搵到，佢好強調自己好有條理，又好相與。
我要等老公放工來一齊去買電器才回家，我怕抺完地有好多時間剩，所以拎左2本食譜、1本相機書、1本散文去睇，個袋重到震。我抺左膠水又掃地和拖地，剛坐低睇老公就到，佢再整下野，我就繼續睇書。
我地去左美心快餐食飯，見到有〝葡式慕絲〞就加錢換，都冇乜特別，我諗佢葡式意思係表面有〝木糠〞。
醫肚後就去買電器，幾經我地格價後，最平就係新屋附近商場既電器舖，呢間信得過由舊區搬到商場，老爺都幫襯左三、四十幾年，所以老爺都與我地一同前往。
電器星期六會送到，唯獨電視冇貨，要月尾先貨到，而家還欠厠所和廚房既層架未決定，餐檯等埋肥阿哥有空先去買，因為佢幫我車回新屋，其他一切已攪掂。
2009年9月14日星期一
元氣麵包‧活力滿屋
今日我去〝7-11〞睇下有折既〝海濱出版社〞食譜書冇冇新款，點知被我發現到兩本好抵既書，呢本就係其中一本。
這書做緊〝推薦價$28〞，密封不能打開睇，但麵包書好少有咁平，所以都冇考慮就決定買。回到家拆開來看，麵包款式都有好多，略略睇過做法和用料都簡單，都值得一買。
書名：元氣麵包‧活力滿屋
編著：黎國雄
發行所：八方出版股份有限公司
售價：280 (新台弊)
推薦價：HK$28-
作者
黎國雄擁有二十多年經驗的烘焙大師，他的製作技術和創意備受各界讚賞。無論是剛入門的初學者，或是追求進階的烘焙師傅，經過黎師傅的詳細解說和指導，將在烘焙的技術上大大進步。
前言
麵點美食已經成為大眾不可或缺的食品，稍稍留意就可以發現，早晨或傍晚時候，中式的包子店、西式的麵包店、蛋糕專門店都聚滿了顧客。包子店、麵包店也越開越多，競爭卻越來越大，所有的老闆都渴望顧客光臨自己的店鋪，所有的麵點師傅都希望顧客喜歡自己做出的產品，如何才能吸引更多顧慮呢？
要吸引顧客，當然是產品要好吃；要做出受歡迎的產品，關鍵是麵點師傅。一位出色的麵點師傅，首先要有的當然是扎實的基本功，但要顧客記住你的產品，就要讓產品有獨特的味道或造型。麵點的製作講究選料、分量搭配、造型、烘烤蒸製的溫度和時間等等，但這只是基本功。現在的顧客要求很高，既要好吃，又要好看，而且喜歡特別、有新意的東西,所以要想產品出類拔萃，就要抓住顧客的心理，製作麵點時多發揮創意。
黎國雄是烘焙行業的大師，他製作麵點的技術和創意備受業界所賞識。書中所有的麵點都是經黎師傅精心挑選、最受顧客歡迎的，並由黎師傅用心製作，從造型到味道都是一流的。
所謂學有卹所專，因此我們把這套『Tasty』系列叢書共分為西點'蛋糕、麵包、中式點心等四大主題，每本書都介紹了許多項產品的製作方法，用簡潔的文字作說明，配以清晰的流程圖片，易看易懂，既有一些入門基本實例，也有進階創意作品，不管你是剛入門的新手，還是經驗豐富的大師傅，都可以把此書作為一個學習、提高的參考。
本書《元氣麵包活力滿屋》，介紹了多種麵包的製作方法，如各式吐司、軟式麵包、硬式麵包、丹麥麵包、炸麵包等，既有傳統的口味，又有在傳統上創新的麵包，相信本書必能給你帶來創作的靈感妁及製作麵包的樂趣。
油油、傢俬、地板
近日要忙新屋事宜好忙，沒有時間回覆留言和到大家處逛逛，請大家見諒。
我與老公連續忙左3日，今日我可以休息一下喇！但老公仍然要返工，真係辛苦晒！今朝我出左去拎傢俬圖，回來時風好大，連我咁有份量的人都吹郁。
新屋基本裝修都攪掂，係由朋友和我地兩公婆攪，還欠電器未訂，其他東西都訂左，等我記錄一下之前3日做過咩先。
11 September2009 (星期五)
今日老公請左假，行程好緊密，行左好多路，成個人都好攰。
第一站：朝早就去睇梳化，之前我與熊貓試到張唔錯既，今日帶老公去睇，老公都話OK，所以即刻買左。
第二站：車去銅鑼灣取吊燈。
第三站：去旺角買地板，我格晒價最平係旺角，又走去買漆油和工具，然後Call貨車回新屋。
最後：我地係新屋度尺等CoolMan放工，佢來幫我地新屋油油，請食飯和以友情搭夠攪掂。CoolMan話我地住果到潮濕，所以天花都油。天花和牆身都油得好靚，花左2小時鬆D就攪掂，梗係喇！佢係專業人仕嘛！夜晚高佬和高達都一齊來吃飯，食到成點幾先散。
12 September 2009 (星期六)
我掛住阿B，所以出去前回娘家，我地帶左佢落街食飯，然後就去新屋。今日新屋裝左大閘，又約左傢俬舖上來度尺，我拎老公晝既圖比師傅睇，不用多說方便做野，度尺師傅都話老公既圖晝得靚，然後我地等L伉儷來，即係纖瘦小姐與她的老公。
新屋有些少問題等L先生幫攪，今日來幫我睇下整唔整到，睇完佢可以攪得掂，所以下次買埋材料來整就攪得掂。咁又可以慳返D，下次請食飯和友情搭夠。
度尺師傅有事忙，所以我地拎埋尺吋今晚落舖傾，熊貓係傢俬舖附近等我地，傢俬一切落實，應該可以趕得切入伙前送到。
頭先有些事，所以遲來熊貓係街等左我地好耐，所以晚餐我地請佢食日本野，但太夜都唔係食左好多野。
13 September 2009 (星期日)
今日我、老公興熊貓係新屋舖地板，因為有颱風，所以冇乜風，天氣又焗又熱。平時舖四方形地板好快就攪掂，但今次我揀左長條形，有點難度。
舖前大家開會，攪到4點幾先動工，黏完廳和房，又再開會研究點舖飯廳，因為料不多，所以都要計得好準確先動工，最後用左5個幾鐘完成。
高達要返工，但夜晚都有來一齊吃飯，老公冇乜胃口，每人吃左碗麵就回家。
2009年9月9日星期三
難度是疲勞過度？
老爺近半年載老花眼鏡都睇唔清楚野，就在兩個月前某日朝早，我幫老爺約好在他家附家分科診所睇眼，醫生話老爺白內障都好嚴重，所以寫紙轉介去專科。
我就叫老爺回家等我，我立即去另一間政府醫院幫他排期睇眼，大家都知眼科要排期好耐，我亦都見到窗上貼著〝眼科排到2014年4月〞，但可能老爺情況嚴重，所以相隔兩個月就有得睇。
今日我6點幾就起身預備陪老爺去睇眼，除此我仲要去拎返部Notebook，再去睇地板，然後再要去新屋。我吃左兩包梳打餅，加多杯熱飲，7點幾就出門。
今次專科醫生都話老爺係白內障，唯一可以治療只係手術，醫生話今年做緊2005年排期既手術，所以我要求醫生幫老爺排期，整個過程都比我想像中快。
老爺全程都與我一齊去，上到去Acer維修部要等，我有D唔明白，櫃檯職員call左師傅出來解答，但佢一出來擺出一個戰鬥格，答左等於冇答，態度又差，我被佢激一激立即開始眼花，我已問左佢的名字，投訴考慮中。
我地再行去睇地板，可能Notebook重，所以頸梗膊痛。我問左價比旺角貴，所以應該會去旺角買，然後再去新屋，所有野攪掂，我地就各自回家，可能事辦好個人鬆左，就發覺有點肚餓，我就去買古朱力吃，漸漸有D反胃，上到車仲有D想嘔。
我返到屋企就即嘔，老公話我可能疲勞過度，所以我立即眠一眠，嘔左又眠過就好D。
今日P小姐第一次去我個針灸師到針灸，本想帶佢去，但而家咁既身世，唯有靠她自己，好在佢好聰明搵到，而且佢都覺得OK，幫到人就最開心。
2009年9月8日星期二
泰豐廔~北京料理
我與熊貓都好鍾意食片皮鴨，想話去〝泰豐廔〞食好耐，今日終於有機會，但都有段古架！有興趣就去〝右脾左脾@生日蛋糕〞睇下喇！
熊貓係雜誌睇過介紹，而Open Rice〝http://www.openrice.com/restaurant/sr2.htm?shopid=3436〞亦都有介紹食評都OK既，有我地最愛既皮片鴨OK都要去試。
食評有人話有好大陣霉味，但我覺得唔係好勁啫！更何況好快就冇左喇！一間舊式酒家係咁上下架嘞！
雖然食物水準一般，但我都想介紹一下比喜歡片皮鴨的朋友，可以去一試，我地ORDER左一個4-5位用既餐，只係$468包一隻片皮鴨，除番開都唔係貴，若果散叫一隻片皮鴨要$280。
我地叫既餐有7個餸，所以叫多個〝金腿扒津白〞，每款餸的size不太多，碟我諗得直徑7-8吋咁上下，可想而知份量有幾多，但都夠我地3男兩女吃啵！唔止夠仲要係飽。餸上得好快，但隻鴨係即燒，所以就等得比較耐。
我地身後成日都有幾個人企係到，佢地都冇乜野做，熊貓話係到做真係好，都唔駛點做。我地成差多多11點走，都係最後一檯，因為佢地收11點。
前菜花生都係咁喇！醃椰菜好味。
三絲伴粉皮：大家都覺得好食，係某D粉皮唔夠軟，唯獨高達就不太欣賞，佢話唔夠凍，花生醬又帶點苦。
蔥爆牛肉：好味，熊貓話D蔥好甜。
賽螃蟹：這間面冇左生蛋黃，而且冇醋，蛋白炒得老左D，但我都不停吃，因為我好鍾意食這味菜。
菜肉水餃：一致覺得好味，食第一啖覺得似〝小籠包〞，可能肉好似有D梅，再食個感覺就似〝罐湯餃〞。
師傅專登拎起隻鴨比我影，係片鴨時唔知點解全個樓面都過晒來，場面真係壯觀。
北京填鴨：有時吃會有D羶味，但呢隻又冇啵！同埋有好多肉，正合我意。高達又係唔係咁滿意，佢覺得片皮應該係得皮和肥膏。我覺得唯一唔係就係麵粉皮厚左D。
鴨架子湯：好飲，因為味精湯，我嫌味精多得滯。
京式甜品：SET定係〝高力豆沙〞，但一早整定唔好食，我都好鍾意吃這款甜品，所以有D失望。
金腿扒津白：都係一般咁喇！我地order細size，但都要60蚊，中要90，而大就120。
店名：泰豐廔~北京料理
地址：九龍漆咸道29-31號溫莎大廈 (近赫德道)
電話：2366 0719、2366 2494、2366 1091
右脾左脾@生日蛋糕
上星期六是我的生日，而尋日是高佬生日，所以今晚就約埋一齊食生日飯焗。
我地原本係預定旺角打邊爐，可惜YY臨時被公司調派要飛去公幹，所以我地就可以不揀打邊爐。臨時話可以揀其他，大家都冇兩手準備都諗唔到吃乜，但仍然係旺角集合。
熊貓早在年幾前已提過，尖沙咀有間食片皮鴨套餐4-5人用價錢都OK，我與她就最鍾意食片皮鴨，我地連打邊爐都要吃牠架！但臨時臨急冇資料係手，只記得係尖沙咀漆咸道和店名一個字〝廔〞，我與熊貓都好想試。
我地行緊先達時，在我腦海突然閃出個〝泰〞字，我就擰轉同熊貓講〝泰X廔〞，熊貓話〝唔係〞，隨即大家都好夾，亦都好大聲講〝泰豐廔〞，我地不知幾開心，就可能大聲得滯，週圍既人目光都注視係我地身上，可能人地唔會〝太風流〞。熊貓立即打去電話公司問，而我就拎定個電話出來預備打去〝泰豐廔〞，我訂埋位和片皮鴨。
我地一行5人剛好一架的士，雖然食物水準一般，但全餐晚飯都好開心，食飽又笑，真係開懷。
片緊片皮鴨時，高佬叫佢留返隻脾唔好片，咁我就話〝咁左脾、右脾就當生日蛋糕喇！〞，但我果隻比左老公吃，見到咁多肉都飽。
2009年9月6日星期日
2009年9月5日星期六
生日搵食@2009
雖然，今年生日老公唔可以陪我，但我仲有朋友嘛！熊貓知道老公不能陪我，佢就自動獻身喇！佢仲約埋至Fit來陪我食lunch，夜晚又約左開心果join我地食晚飯，但至Fit夜晚不能與我地吃，佢要去奶奶家吃。我很怕一人睡，所以夜晚就回娘家瞓。
我與熊貓係銅鑼灣港鐵站等，因為上星期與老公去銅鑼灣搵人，無意中被我地睇到盞吊燈又平又靚又啱心水，但想再睇多D先做決定，最後都係決定今日買它，仲買一款兩盞for客廳和飯廳。
一早計劃買左燈後，差不多離開銅鑼灣先取回，然後拿回新屋，可是貨在倉要星期一先運過來，唯有落訂先喇！
熊貓睇雜誌介紹台灣小吃位於天后，我地繼續行街等至Fit做完Facial就去醫肚。我地坐〝丁丁〞去天后，至Fit來電，佢坐巴落早左，我地係〝丁丁〞內見到佢係巴士，教她坐〝丁丁〞係〝丁丁〞站等她。
我地推門入店內，得一條窄窄的路，只夠一個人行，裡面都不是大，只能容下4-5張4人檯、另一邊就擺2人檯，通道都是緊夠一人行。在等位既時候，至Fit帶左一個驚喜給我地，佢宣佈已懷孕3個月喇！我即刻開心到拍手掌。
下次都不會再來，與雜誌介紹的差太遠，其中兩款係雜誌介紹的。幫我地落單的年青人尤如遊雲一樣，看下去就知佢點遊法，真是差得很。
招牌炒新竹米粉(雜誌介紹)：冇特別，豉油炒，唯一特別油多。
沙茶牛肉炒麵：我地見隔離檯好香，所以order。來到香味唔知在那裡？而且似〝乾炒牛河〞。
紅燒牛肉麵(雜誌介紹)：標榜〝不含味精〞，至Fit話湯似〝肉骨茶〞，湯唔好飲，肉又唔多好吃，而麵條有糊既感覺，但心就帶點硬，總之唔好食。
〝紅燒牛肉麵〞有茶餐，當然就叫喇！我地食晒都未有得食，而遲來的都有得吃，所以就追問為何？遊雲的青年人話就得，大家都一致認為〝漏單〞。
到埋單時，竟將這個原本是茶餐包野飲變做正價，台式就加錢，我想討回公道之際，經計算後只不過差2蚊，若果差得多我實據理力爭架！
我追問時已過了茶餐時段，若然佢漏單的話，加上冇留意時間，很正常地當正價計，這是我地推論。
蜜桃綠茶(左)：有少少蜜桃味，但好淡，好似水。
奇異果綠茶(中)：又係好似水。
果香果綠茶(右)：3杯中最有味，但唔算好。
我與至Fit要凍要走冰，但我杯果香果綠茶來到有冰，然後佢只拿走冰再比我，其後連熊貓果杯都走埋冰。
奶酥厚片士司：好味，燶果邊仲好味。
百香果綠茶 (熱)：好飲過凍飲。
我想試〝奶酥厚片士司〞又有茶餐，熊貓幫我飲埋〝百香果綠茶(凍)〞，我死都要叫番〝百香果綠茶〞飲。
我地返回銅鑼灣陪至Fit買東西，然後佢就向奶奶家出發，熊貓就陪我繼續行街和睇傢俬，到咁上下就過返九龍與開心果會合。今晚吃日本野，食物水準整體OK，好過晏晝果間。
芥辣八爪魚
芝士半片：份量兩件，話半片，但來到係成件，所以要求佢cut開。年糕與平時日本年糕唔同，芝士味唔夠香。
軟骨餃子
牛玉子燒：好香牛肉味，蛋都整得唔錯。
雞軟骨
蝦天婦羅：蝦新鮮。
豆腐田樂：豆腐滑，但脆漿就比較硬~唔脆。
開心果送了這本〝米奇2001 Schedule Book〞給我，我明年不用買就有靚靚用喇！
老公簡單慶祝~我的生日2009
今天是我的生日，亦都是我與老公一起10年裡，第一次沒有他的陪伴，他去了那裡？問得正好。
我早在幾個月前已知道，今年生日沒有老公陪，因為他公司攪Outing要北上，要明晚才回來，就選了我生日當天出發。
尋晚老公可以6點幾就放工，所以去食左一餐簡單晚餐，老公話明早與我一起吃早餐，這樣的兩餐就是當與我慶祝生日，其實這已很足夠，因為平時想他陪我吃早期，真係難過豋天，今次他主動提出，實屬難得。
晚飯後再去睇傢俬，回到家幫老公執行裝，雖然只是過一晚夜，但都有東西要準備。
公司訂的旅遊巴，分別有2個站，一是公司附近；二是我家附近，所以老公可以陪我吃埋早餐。
我地去左樓下新開的〝大快活〞吃早期，但有點趕，因為我記錯左時間，遲左15分鐘叫老公起身，好在吃埋早餐都趕得及8點半集合時間，我就這樣目送老公，然後自己回家。
2009年9月4日星期五
感覺似〝行街〞
我話〝行街〞唔係Shopping果隻，而係Sales果隻，大熱天時做〝行街〞真係好辛苦，大汗搭細汗，我仲曬到黑左少少添啵！我絕無誇張，因為我係一曬即黑的，仲要好耐先會白得番，所以每次曬黑都會被阿媽鬧。
今朝又係11點去尖沙咀做Facial，之後行落上海街睇蛋糕用品，跟住就去〝二記〞入D貨，再一直行去旺角，基本上每次做完Facial都是這樣，但今日有些特別，主要目的不是入貨，而是去睇地板和門，順便格價。
我行晒上海街、砵蘭街和附近範圍有這類舖頭的地方，仲問齊資料、攞埋樣辦，等老公夜晚回來就逐一匯報。
我行左幾粒鐘又孭住D麵粉，又攪到好鬼痛，個人又冇乜心機，而且對眼好攰，眼皮好重，又打左好多個不沉常乞嚏，鼻水仲有少少倒流，好似作感冒咁，我知我唔會病既，因為明天係我既大日子~加油丫！
剛過去的星期日都有去傢俬舖問價，但都是口頭講，前晚我就老公晝晒全屋傢俬圖，尋晚就約埋熊貓一齊去問價，順便食晚飯。
雖然，老公離開左傢俬這行差不多十年，但佢晝圖技術一D都冇生疏，用左1個多小時就晝完，因為屋細嘛！只須基本傢俱就可以。
訂閱：
文章 (Atom)