燃燒指數：+0.6磅 燃燒總數：15.6磅
燒脂指數：+0.7% 燒脂總數：1.4%
今個月我將早餐火腿蛋治改為梳打餅，lunch和晚飯就冇變，夜晚再跳一陣健康舞，若果出街食飯，食完我回家都會跳健康舞架！
我持之以恆本來都減得好好，磅數減到從未見過既數子，就算我北上回港磅數都冇增加。收樓果晚去完K Buffet後，第2日重左2磅幾，加上收樓後，每日都出街，仲要係夜食飯，食完返到家未過12點我都會跳一陣，就係果幾日磅數飆升。
出街週圍行已經算有運動，加上又大量出汗，出左街夜晚都盡量跳健康舞，果幾日都行到好疲倦，行到腳都抽筋，有時攰到回家洗完白白，係床抖一抖已瞓著左。出街週圍行已經算有運動，加上又大量出汗，夜晚都盡量跳健康舞，夜食飯始終係我既死敵。
尋日老公要返工，生活回復正常，磅數先可以追返D。
前日去收樓，呢排應該會好忙，老公連續請左假兩日假，但實際都冇乜用，因為收樓後7日都唔可以動工，皆因呢7日免租期係你check左有問題房署搵人來整，若果你動左工有問題房署就唔負責。
我地已連續3日都早出晚歸，尋日朝早老公陪我湊左阿B返〝協康會〞上堂，然後就帶埋阿B去〝宜家〞睇傢俬，再去睇電器，然後又湊阿B回娘家，再出去辦些事，夜晚就約左朋友上去新屋睇下，大家一齊研究又比下意見咁喇！因為之前有D阻滯，所以十點幾先上去睇，我地攪到差不多12點先去食野，天氣太熱老公要食麵。
今日約左阿媽去新屋〝拜四角〞，煙霧迷漫又冇風又唔開得風扇，攪到大家都好感動。我地都有出門口抖氣，阿婆好勁由頭帶到尾~佩服。
等火種熄滅齊齊就落街醫肚，跟住送阿媽和阿婆去巴士站，再去老爺家拎舊掃把和地拖去清潔元寶灰，阿媽和阿婆都話用完就唔要，所以用舊冇咁嘥。
煤氣公司係樓下有擺擋，臨走時去買埋煤氣爐、煮食爐和抽油煙機，再去附近商場睇下電器就打道回府，因為好攰，返到去食左少少野，就去眠一眠，今晚可以抖下。
今日一早出門去收樓，天氣真係熱得利害，在屋內沒風，個人從未乾過，所以收完樓回到家立即洗白白，然後又趕住出去與迪迪媽會合。下星期六才是我正日生日，但迪迪媽提早今晚幫我慶祝，佢book左K Buffet，迪迪仔都會去架！用迪迪仔幼稚園既學生証Buffet仲有折添啵！
我地唱完K又去左迪迪媽家坐下傾下計，過左一陣迪迪爸放工回來，我比個平面圖和相佢睇，佢一睇就話細，而且佢都話個廁所係 for Disable人仕，劃側真係唔同既一睇就知，佢話近排都劃好多呢類側。
近排迪迪媽向朋友學鈎公仔，呢兩個就係佢既製成品，我都想學好耐，我叫左佢遲D教我。
兩個星期前收到房署配房信，等到頸都長埋終於有定案，我地獲編配老爺附近，可以方便照顧他，唯一美中不足就係間屋好細，所以係擺放傢俱上有的難度。
今次我地獲派新樓，其實原本係〝居屋〞，但大家都知現在沒有〝居屋〞，所以將〝居屋〞都變埋〝公屋〞，所以新屋各方面都好企理，尤其是個廁所好似私人樓咁，大廈大堂有位坐讓人等電梯時坐下，屋外走廊雖窄，但就靚。
我地9點半已到達這裡，我食左一包梳打餅，老公一點水都冇落過肚，攪到11點幾先簽完約，但就有個外判承建商由頭跟到我地尾，耍極都唔走，又怕得罪佢有麻煩，話左肚餓要食野都唔走，真係不知如何應付，咁啱佢office係我地大廈門口，日後真係有排煩。
我覺得個廚房細，但廁所就大，我情願換轉，外判承建商話可能係 for Disable，因為廁所門口闊度可以入到一張輪椅，而屋內全部燈制、對講機和其他制都係剛好坐輪椅既高度可以觸及到的，老公話而家條例係咁要照顧埋Disable人仕。
我今早已上網照晝左一張平面圖，等老公度完尺就可以記下數據，咁就妥當喇！我心中已有個概念，但就要同老公傾下。
大廈外有幾個這類遊樂場，而每座大樓都有平台，平台上亦都有這類遊樂場，所以小朋友來到就一定開心。
星期六要去游水，所以P小姐想今個星期去試針灸我都推掉，但今日起身肩頸仲有痛和梗，攪到個人冇乜心機。阿媽問左我幾次〝今日去唔去針灸？〞尋日又再問，我為游水推左幾次，但我見自己咁既身世，所以決定阿媽去針灸。
針完個人鬆好多，阿媽想去〝屈臣〞睇佢食開既健康產品，我見有D餓，所以買左朱古力兩母女邊食邊睇，之後我就去家附近與老公會合去食飯。
欲知前事請到：北上滿載而歸~Day 1
今朝2回幾開始按摩，4點幾按完，跟住5點幾先瞓，我每隔半小時就醒一次，足知9點幾頂唔住要起身。之前講好11點起身，然後去飲茶，夠鐘我就叫晒佢地起身，梳洗完去大堂做埋〝大堂項目~按腳〞。
按完剛好有免費lunch吃，我地又出去拎野食，邊食邊睇電視，坐坐下先知原來約同屋住約左佢契媽1點鐘與我地一齊飲茶，當時已12點45分，大家拿拿聲去換衫，同屋住有與老公講，但佢忘記左。
到達酒樓契媽已搵定位，呢到點心係推車仔，感覺好親切。我地仲見到其中一架車，車上有個大玻璃盎，盎內係原粒未去衣的大蒜頭，契媽話好多北方人食架！成日都賣晒。
同屋住帶我地係酒樓行十分鐘就到〝保齡球館〞，上到去先知原來3年前我地已經嚟過，果次同屋住兩公婆和高達冇來的。
今次係我打咁多次保齡球最叻既一次，每人打左2局，我第一局6X分，第二局7X分，以前我得1X-3X分咋！唔知同玩Wii既保齡有冇關呢？
我地玩保齡途中開始落雨，打完仲有行雷閃電，所以落左下一層打Snooker。我諗住佢地係到打，而我與老公打的去〝廚安居〞，加上老公打完保齡手痛都打唔到喇！而高佬要陪YY去，最終全部一齊打的去〝廚安居〞。
老公叫我快D買，怕其他人等，因為佢地對這裡興趣不大，放心喇！我一早列好清單，照單執藥好快啫！
我係頂層買烘焙地方買左這埋模具，但有D呢到冇，要返香港買。
落多2層買左想買好耐既〝梳乎厘杯〞，我買左8隻3.5吋，每隻只售RMB1.6 (會員價)，非會員好似都係RMB1.86，熊貓都買左6隻，真係抵過香港好多。
老公都揀到個〝22CM~BB煲〞，只售RMB30 (會員價)，非會員都好似RMB33.5，香港要買百幾蚊架！係等水煲時，我見到筲基RMB1.9，屋企個都爛，所以又買一個。
上年老公唔準我係〝廚安居〞申請會員，今年我都有問過佢又係唔準，但佢見我買咁多野知道有JetSo，所以主動叫我申請，入會只須RMB50，可以補番條數。唔止我一個買野架！高達都買左支RMB98既噴槍，佢話平香港一半有多。
大家都要坐下抖下，高佬帶我地去到一個商場內的小食店，呢到既蛋撻同屋住話掂，真係冇介紹錯，真係唔錯。我飲左杯〝凍百香果茶〞加珍珠，我都有整整一個月冇飲凍飲，真係好舒服。
我地食飽又起行行街，同屋住老婆有D頭眩，所以行左一陣就去〝巴蜀風〞食飯。上年都有來過架喇！高佬和YY都話食物質素差左。
樣樣用具都印有這款字樣，我覺得幾靚。我地食飯途中，見到我喜歡的電影演員〝張耀揚〞，果到D服務員不停係佢間房出出入入，出返嚟個個都笑笑口。
蟹黃豆花：好飲，但YY話份量少左。
清炒豆苗：我唔吃，但佢地話好味。
辣子雞：味道唔錯，又夠辣，但係帶點麻辣，若果只得辣就Perfect。
水煮牛肉：第一啖有好香蒜味，但再食就麻麻，同埋唔夠辣。
雙椒鮮牛肝菌
經理介紹的雞，賣相似〝臘鴨〞，食落都似〝臘鴨〞。
晾衣白肉
酒糟丸子
尋晚係深圳玩完回來，今朝7點幾叫老公起身已覺得好攰、頭痛和骨痛，再瞓多陣就回去湊阿B，我與阿B玩到3點幾攰到坐係到都瞓得着，所以4點幾就打道回府，真係難為佢地仲要返工。
我返到去上網一陣，又整理一下北上既相，但覺得有點眼花、頭眩就眠一眠，瞓到7點幾老公來電先醒一醒，但情況沒有改善，老公叫我食粒長效，8點幾再起身就好D，但我一D都提不起勁寫Blog，拖到而家先寫。
從這篇開始我會將姐姐、叔叔‧‧‧等字眼省去，因為佢地有好多人都係年紀比我小的。
星期六、日我地北上，今次我沒有上網搵資料，因為同屋住而家係上面工作，而高佬又間中都會上去玩，有佢地就不用煩喇！
前日熊貓北上前去剪髮和染髮，我見我又夠期要剪，所以順便去埋佢果到剪，老公都陪我去，然後一齊去集合地點。
我地預定8點幾搭旅遊巴北上，但高達還未知放幾點，所以我地就去醫下肚。我地身處旺角咁就係掃街喇！
平時老公唔吃我又冇得食，今日有熊貓我終於嘗到〝瘋薯〞喇！後來高佬都放工來join我地。掃完街仲未得，橫掂要去搭KCR，所以行左去太子DSC睇傢俱。電話到我地係旺角火車站等埋YY和高達，再去上水與同屋住兩公婆會合，今次一行8個人。
我地由十點幾己過關到深圳，同屋住帶我地坐巴士去按摩附近的〝天天漁墩〞醫肚，但食物水準都係一般咁喇！
圓盆焗沙花甲：我地原本叫〝圓盆焗沙蜆〞，但冇蜆就改左〝花甲〞，16蚊斤我地叫左兩斤，真係抵。
我食左2隻就開始有D唔妥，唔知你胃痛定腸痛，總之痛既範圍以肚臍為中心，擴散開去有一個大size既西樵大餅咁大喇！食下、傾下又笑下又冇事喇！
鹽焗花螺
鮑汁雜菌煲：個汁似茄汁，冇乜特別。
鹽焗雞：雞肉〝鞋〞，但就好入味。
雀巢夏果海中寶：識我既朋友都知我好鍾意食雀巢，所以老公點左呢個餸比我。一心諗住拆巢，個巢一來唔係用芋絲整，二來又唔脆過晒氣，總之就唔好食喇！
蒜蓉西蘭花：賣相好掂，而西蘭花硬度又適中~Good。
瑤柱蛋白炒飯
反沙芋
食飽行過對面街就係按摩地方，同屋住就去搵朋友一陣再來。我地梳洗完就去大堂，但冇位要等，我地7個人迫係兩個位，我食飽唔坐企下。我地等左大半個鐘都未得就去問下，但果D人不停叫我地去VIP房，我地要過夜去VIP房貴好多架嘛！我地緊係唔肯喇！
高佬見我地同佢地講野唔多應，等左大半個鐘就大聲同佢地理論，我地攞住一個宗旨〝樓下知客話有位叫我地上來〞，後來有個經理出來安排我地樓上坐，個經理態度都唔多好，等左一陣就有一間房，我地4個女仕入去先，之後又安排一間3人房比男仕。當時同屋住都未來，所以之後佢要自己一間房。
除左呢件事之外，仲有係女賓部梳洗時都冇人招呼，幾乎樣樣都係自己搵，自己拎，平時會貼身招呼架嘛！原來男賓果邊都係一樣。
我、屋住老婆和男仕既按摩師都好好，但係熊貓既按摩師就好似怕整親佢，只係輕輕力好似摸下摸下咁，而YY既按摩師就好趕時間走，按左2個鐘就心不在然，攪到佢仲痛過未按之前。
今次按摩真係唔掂，大家已講左下次都唔會再來，服務態度差，果間野叫〝美亞〞。
上星期六，阿B係〝協康會〞上完堂，在外出不慎跌倒，弄到雙膝損左，當日佢痛到行唔到，前日都仲有少少血水浸出，尋日就好好多，所以等佢康復先比佢再返學。
我趁阿媽今日休息可以湊阿B，就拎部Notebook去整，之前因為茜茜老公想與我〝Say Hi〞，所以先發現Notebook個WedCam壞左。
之前我與老公都去過Acer位於〝鰂魚涌〞的維修部一次，尋日我係娘家check下個地址，上網load唔到Acer個網頁，咁我見都去過就大安旨意喇！
今早差不多十點出門，搭我最不喜歡的港鐵，到〝鰂魚涌站〞沿途都唔見到地圖，好在尋日睇左地圖書，大概知道邊個出口，上次老公帶我搭巴士。
我11點上到去見到唔多對路，再拎個地址出來睇下，返覆咁睇，又返覆兜圈睇下有冇搵錯門牌，望入去同上次唔同既，好在我連上次維修張單都有帶啫！唔係就唔知Hotline電話。
我透過電話錄音取得新維修部地址，原來搬左去〝觀塘〞，我又要係12點前趕到去，因為佢地12點食lunch。當時我冇地圖，點知係邊呢？雖然老公公司今日有Auditor做Audit唔方便，但我都打比老公叫佢幫我check下大概位置，真係心急如焚。
我坐回港鐵，而家港鐵四通八達，我係油塘轉車去觀塘，但落左下層先知行錯路，又要走回上層等車，急急腳去到，攪到我超熱。
我有上次經驗，拎定本書去睇，可能平日，所以果到都冇人，逗留左幾分鐘就走得。Notebook最少要留2星期，從今日開始我要讓Desktop比老公用，因為佢玩緊Facebook〝Fish A Fish〞跟緊分。
今晚老公公司大陸有同事來港，所以佢成班今晚有飯焗，又唔知佢幾點返？
自從煮過〝日式咖哩薯仔雞翼〞阿媽就間中就叫我煮，一來諗少個餸，二來肥仔和娣婦都好鍾意食。
星期日肥阿哥和阿嫂冇回來吃飯，所以今晚補返數，諗住食麥皮的我見咁樣今晚都留係娘家吃飯，老公都趕來一齊吃。
我又用係〝吉之島~十蚊店〞買既咖哩磚來整雞翼，今次參考左包裝盒上的煮法，就比上次更簡單既〝日式咖哩薯仔雞翼〞。
我一點日文都不懂，其實都靠估，不過都好易估啫！每次煮薯仔雞翼賣相都係咁既樣，真係有點燜，下次要攪攪新意思先得。
簡易日式咖哩雞翼
材料：
雞翼 16隻
薯仔 2個
番茄 1個
洋蔥 2個
日式咖哩磚 1盒 (吉之島十蚊店果隻)
水 700毫升
醃料：
生抽 適量
糖 少許
胡椒粉 適量
生粉 適量
油 少許
做法：
1. 薯仔、番茄切角，洋蔥切方塊，備用。
2. 雞翼洗淨抺乾，用生抽、糖和胡椒粉醃5-10分鐘，然後加入生粉和油撈勻。
3. 鑊下油將薯仔煎至表面金黃色盛起。
4. 用小火將雞翼鑊煎至表面金黃色，盛起。
5. 洋蔥爆香，加入薯仔、雞翼、水。
6. 待滾後加入咖哩磚、番茄，咖哩磚溶後，蓋上蓋用小火煮15分鐘，即成。
煮後心得：
l 要不時攪拌以免黏底。
今次係我地第一年與YY慶祝生日，即係高佬女朋友，但其實明天才是她正日生日。
之前有諗過去酒店食Buffet，但又貴，最大問題係食得唔多，所以好洩，跟住又諗去食泰國野，不過，最後都係去左Neway唱K兼食Buffet。
我、老公、高佬和YY上去先，一上到去歌都唔揀就出去拎野食，食物水準真係高過Green Box好多班，雖然如此，但好多新歌Neway都冇，而Green Box就有。
我食得不知幾開心，簡直係唔記得左減肥中，唔緊要返到屋企跳多幾下，再跳耐D。之後高達叔叔和開心果姐姐分別到達。
田螺薯蓉好好味，但蒜蓉包就麻麻。
佢地話豆豉蒸蜆好味，但我就覺得一般，而賴尿蝦一D都唔入味。
蝦我食左半碟，齋睇以為係芋絲，咬開係蘿蔔絲，加少少千島醬真係〝Yummy〞。
今次冇買蛋糕，所以得一支送既香賓來慶祝，每次都覺得呢支香檳好好飲。
首先我要在此對茜茜說聲〝生日快樂〞，今天是她的生日，希望佢會習慣法國果邊既生活，仲有快D生BB。
今日我拎左部Notebook去肥阿哥到抄起Data，因為下星期我要拎去整個WedCam，其實我地都未正式用過，係有次老公無意中開左，點解要拎去整？
事原：某一晚係Facebook見到茜茜，佢老公想與我〝Say Hi〞，咁我就用Notebook開MSN，但只係我見到佢，而佢見唔到我，Software又話〝Carmera Not Found〞。我打過去維修部教我Download左驅動程式和軟件都係唔work，所以維修部叫我拎去整，諗起要拎去北角就‧‧‧，但壞左都要整架喇！我既保養未過，而且之前再比多少少錢，將保養Upgrade多2年保養。
Wii初初出都幾好玩，但玩玩下都冇乜Game好玩，所以我地都有好耐冇玩喇！今日肥阿哥買左Wii 新 Game，呢隻Game好似係〝Wii Sports〞第2代，跟Game送個手制套。
我玩Game內既〝獨木舟〞運動時都帶比佢地好多歡樂，其實我玩呢類Game，佢地都會笑我，笑我既動作、姿勢，我一D都唔介意，最緊要大家開心，更何況這就是〝我〞，肥仔仲話想錄低比娣婦睇添啵！娣婦和阿B返完〝協康會〞就回左娘家吃飯，我諗若果阿B係到，佢會鍾意呢隻Game。
我一早已諗好煮〝沙嗲牛肉湯意〞，仲有阿嫂既煎雞翼，有一碗少牛少意粉係我既。我忘記左老公平時食既碗比阿嫂的碗大，所以老公吃完都話唔夠。我地睇埋〝烈火雄心3〞，係回家前陪老公去醫肚才回家。
其實，今日有件事我係好嬲架！平時我都係講老公既好，我而家想講下佢既唔好。
今日佢晏晝1點幾起身，一起身例牌開Notebook，然後入Facebook既 Game，玩一陣先去梳洗，跟住繼續玩，我約2點就打比阿嫂，阿嫂回家途中，阿嫂問幾點到？老公話2點半出門口。佢差不多2點半都仍玩緊Game，毫無意識去關機，咁我就有D滾，跟住佢就發脾氣，等小巴時‧‧‧
老公：而家好趕時間咩？
我：我等左你成朝喇！
老公：咁你可以叫醒我架嘛！
我：叫完你個結果咪係一樣！
在我立場唔係趕唔趕既問題，而係講左咁多點出門口就出，更何況我由8點幾開始等佢，就算叫佢咪又會激親自己，所以我都慳返。我係講左就要做，做唔到就會唔開心。
老公成日都係唔臨差不多最後一刻才動身，唔係動身出門口~係預備，我做事比較急，若果我約人會一早通知時間、地點，但老公就差不多聚會前一日先約，大家做事方式不同，所以好多時就為此而吵。
近排我收到P小姐幾個的SMS，內容都係佢唔開心，唔知點解近排有好多朋友都唔開心。我就約左P小姐今晚出來吃飯聚一聚，讓她抒發一下，我選定左一間餐廳。
我地相約6點40分係AMP等，可惜我出門口時又為左阿B與老豆吵野，咩事我都唔想提，攪到我送車尾，繼而就遲到喇！真係激死。上車時我都有通知P小姐我會遲，我好有交帶架！
P小姐見我之前提意過唱K，所以佢等我既時候打比我叫我諗下〝唱K或食飯？〞，佢話唱K可以食又可以玩，見面後決定唱K兼食埋Buffet。
老公知道我出街，所以都約朋友係我附近食飯，然後一齊返屋企。P小姐提意可以一齊唱，我問左老公佢話〝唔喇！〞，咁我地咪兩個人去，後來P小姐個囡都來，結果3個人一齊唱，我地邊唱邊傾。
從拍拖開始每次出街不論多夜要轉幾次車老公都會送我回家，就算佢返左屋企都會專登出來送我，所以P小姐讚我老公〝好〞，呢方面老公又真係唔錯既。
間房唱到11點，估唔到11點鬆D真係有人趕，好耐都未試過被人趕既滋味。老公飯焗都尾升，老公叫我去到大排檔附近打比佢，佢來接我。我聞到老公身有酒味，我坐低又傾左一陣就各自回家。
我諗住〝Green Box〞唔會趕人走，雖然食物質素冇〝New Way〞咁好，我都揀它。可能地點係〝AMP〞難逃厄運，早知兩間都趕就揀間食物質素好既喇！
焗生蠔係送的，我地3個有3隻，味道一般。
全晚最好吃莫過於呢碟。
我以為個撻皮係脆，點知一咬又硬又〝參〞口，唔小心食都會被佢界親，所以我做左白老鼠後，我地只係食餡唔食殼。
嘩~呢杯〝熱參蜜〞，又甜又苦，仲有陣爽身粉味，我唔浪費既，差不多飲晒，食物若果唔難食，但難食程度我都可以接受，我都會食晒佢。
仲有其他普通野~
今朝一早起身整〝老婆餅〞，我整左平時既Double份量，因為今日要去〝協康會〞參加阿B既畢業禮，我要請治療師和姑娘吃，用來慰勞一下她們。以為今日畢業禮好齊人，但可能分開攪既關係就唔齊，希望每一個人都吃到喇！
畢業禮完結，就去左荃灣行街，等埋老公放工就可以去食飯，等既時候我又去〝十蚊店〞睇下，因為我想買多個〝4吋戚風模〞，之前去過好多間和上海街都搵唔到。
第一時間就去蛋糕模果到睇，嘩~見到仲有幾個。我本身有一個，心中盤算我個焗爐應該可以放到3個，所以我就揀左兩個最靚來買。我本身又係有個長方模，買多個焗就唔駛咁煩喇！
肥仔半年前試過呢間餐廳話〝OK〞，所以唔諗就入左去，可惜大為失望，我只係影左我與老公既餐。
老公order〝海南雞飯〞個樣好靚，但好睇唔好食。老公見到有雞翼已經唔多鍾意，而且碗飯好硬，佢只係食左半圓果部分咋！
我要〝西冷牛〞，但係鹹到我只係食左半塊，肥仔都話鹹都係食左半塊，我地都覺得鹹就好勁，因為我地食粥係將全碗粥變做豉油色先吃，這習慣我改了~放心，全個餐我每樣都係食左一半。其實，我唔係食呢個餐，我係要〝蒜茸牛扒〞，但係冇〝牛扒〞，再order另一樣跟住我得到個不能接受的答案。
我：蒜茸牛扒。
仕應：冇牛扒喎！
我：吓~咁〝什扒〞都要牛扒架喎！
仕應：我地〝什扒〞冇牛扒。
我：吓~我未聽過〝什扒〞冇牛扒。
仕應：我地〝什扒〞只有豬扒、雞扒、煙肉‧‧‧
我係一個牛魔王，都未聽過〝什扒〞係冇牛扒，今次真係奇聞。
