燃燒指數：+1.2磅 燃燒總數：13.6磅
燒脂指數：+1.9% 燒脂總數：0.9%
今個月晚餐多左出街食飯，加上天氣熱又飲多左凍飲，而且我冇行路回娘家湊阿B，因為果條路冇遮又擋直接與陽光打交道好辛苦，初時行路回到娘家好似洗完白白一樣，所以後來我選擇左搭車。
我一踏入6月體重就每日不斷增長，最高峰時期重左3磅幾之多，所以令到我有D心灰意冷。雖然多左外出吃晚餐，但沒外出吃飯時，我依然都係吃麥皮，可能個人少郁動，所以肥吧！
夏天係我唔喜歡的季節，天氣熱令人煩。
2009年6月30日星期二
2009年6月28日星期日
超級富豪奧林比安10.6米
今日老公除左買左〝丹尼士巨龍11米@非空調巴士〞，仲用平D既換購價買左呢set場景巴士。我發現呢架巴士有巴士司機架！老公話因為場景，所以有司機。
香港生活節奏緊湊，高效率的交通工具對於分秒必爭的港人而言非常重要。九龍巴士 (一九三三) 有限公司 (九巴) 七十年來與香港這個美麗大都會息息相關，並不斷致力改善服務質素，不斷引入新型號的巴士以滿足乘客需求。
九巴於二零零二年引進超級富豪奧林比安10.6米巴士。超級富豪奧林比安10.6米巴士車廂舒適，其小巧車身更有助靈活穿梭港九新界各街道。這座精緻模型展示一部234X路線的超級富豪奧林比安巴士正途經五光十色，繁華熱鬧的彌敦道。
丹尼士巨龍11米@非空調巴士
今日幫老爺搬屋，老公經過港鐵站〝九巴客戶服務中心〞見到仲有〝93K〞賣，佢話出面好似斷市，所以我就叫佢買。返到屋企老公先發現車頭有問題，但我安慰佢〝你都唔會拎出去賣架喇！唔緊要喇！〞，佢冇出聲繼續鑑賞。
丹尼士巨龍11米@非空調巴士~Dennis Dragon 11M NON A/C Bus
九龍巴士 (一九三三)有限公司 (九巴)於一九八六年至一九九四年間引入為數共三百七十部丹尼士巨龍十一米非空調巴士，其中四十九部 (車隊編號S3N222-S3N270) 採用了當時嶄新的都普車身，並且配備馬力更大的康明斯LT10引擎，以便行走高速公路或路斜多彎的路線，如62X、74A、85K、93K及98A。該款共四十九部的丹尼士巨龍十一米非空調巴士已於二零零八年十一月全數退役。
2009年6月26日星期五
暫別羽毛球
今次之後就要與羽毛球暫時告別，不用擔心唔係因為身體出現問題，而且波友有3個，開心果姐姐和熊貓姐姐前後因公司有變動而不能抽身前來，剩下我與阿嫂，所以有時我都會搵埋肥仔和娣婦來一齊打。
今晚打完波又去左〝一品螞蟻〞吃，這次係第三次來，對上一次食物質素差左少少，但今次又回復水準。我地叫左一個2人餐，另外再加多2樣少吃。
這2款額外叫的小吃都好味，尤其是花甲。
我地剛開始吃老公就來電，佢剛放工上左小巴，所以我地就食住等佢來，後來再叫多2樣野，今晚樣樣都好好味。
頭先等位時，阿嫂將張飛比左阿B，叫我地個number時，經理(我估)手拎阿B張飛，但阿B就比左隻手仔人，之後經理分咐侍應一陣請阿B食雪糕入佢數。差不多吃完就有侍應哥哥拎menu問阿B想食咩味雪糕，但阿B邊識我地就揀左雲呢拿味。
杯雪糕好靚，係有眼、耳、口、鼻架！可能我影得唔好，所以唔係好似。可能凍食左少少就唔食，所以就落入肥仔肚內，但肥仔食完，阿B又話要，成日都係咁真激死。佢知道食晒，跟住不停叫〝哥哥〞，佢緊係諗住又再order。
2009年6月25日星期四
蛋撻 (內附食譜)
老公鍾意食蛋撻，係兩年前我就獻出第一次〝D.I.Y. ※經典聖安娜蛋撻〞，之後都整過一次〝牛油皮蛋撻〞，兩次都整不同款，而且都非常成功，可惜今個月再整就唔多掂。
我見〝獅頭媽〞和〝Grace〞跟〝韋太〞整得唔錯，所以我今日又的起心跟整。我第一轉焗左30分鐘先得，而第二轉只係焗左約15分鐘，可能焗第一轉時焗爐唔夠熱，所以焗既時候大家要自己留意喇！
蛋撻
撻皮材料：(3吋蛋撻模7個)
低筋麵粉 110克
奶粉 6克
牛油 70克
糖霜 20克
雞蛋 (打散) 1/2隻
撻皮做法：
1. 將低筋麵粉及奶粉預先過篩備用。
2. 牛油和糖霜用打蛋器打王幼滑後，將蛋液遂少加入拌勻，再將粉篩入，搓成軟麵糰，放入雪櫃雪15分鐘。
3. 將麵糰平均分開多份，然後搓圓及將適量的餅皮放入模內，沿模邊用手指向撻邊按壓後，修去多餘的餅皮，用叉在撻皮上剌孔，然後注入蛋漿娥7分滿。
4. 焗爐用180度預熱15分鐘後，將蛋撻放入焗爐，焗約15-18分鐘即可。
蛋漿材料：
水 120毫升
糖 30克
蛋 (打散) 1 1/2隻
花奶 (鮮奶) 30毫升
蛋漿做法：
1. 預先將糖加水煮溶後放涼備用。
2. 雞蛋拂勻後放入大碗內，然後將花奶加入蛋漿內拌勻。
3. 再將糖水慢慢沖入蛋漿內拌勻，再用篩濾去雜質備用。
鄰居人情味
今日阿媽放工就與老豆陪阿公和阿婆回鄉，我等肥仔和娣婦回來就閃人，然後回家煮麥皮吃，而肥仔和娣婦就買野回來煮。四大長老4點幾就出發，而5點幾時F太太就叫我‧‧‧
F太太：F先生煮左皮蛋瘦肉粥和炒麵，比D你試下。
我：唔駛喇！一陣就回去煮麥皮吃。
F太太：煮左好多，今晚得我地兩個吃，你阿媽佢地返鄉下嘛！
聖情難卻就接受了好意，由於有2人份量，所以我每樣留起一半給老公吃，咁今晚又不用煩吃咩。佢地問我夠唔夠吃，而且又知道我拎比老公，想再比多D我，但邊好意思再要呢，我推卻左。阿B好鍾意食炒麵，炒麵有好香既XO醬味，若果我識炒又炒到有咁既水準就好喇！
F先生和F太太都係我的舊鄰居，有呢條村幾耐大家就識左幾耐，而且我地與佢地的囝囝們從小就一齊玩，大家都會互相照應。
現在有新鄰居搬來，莫講話互相照應，有時見面連打招呼都冇，真係舊好過新，可惜有好多舊鄰居都搬走了，走廊都靜左好多好多。
2009年6月24日星期三
沒有胃口的老公
近排天氣酷熱，加上老公又要O.T.，星期六都要返，有時連星期日都不能幸免，每晚都要成9點幾十點先返到，又攰又熱攪到老公冇晒胃口，老公不能再瘦下去，要諗諗計。
尋晚我就諗到嘞！就係煮日本冷麵，老公都話好，但係得麵又好似齋D，整多個蛋沙律喇！我想整多個凍豆腐架，但老公唔吃豆腐，青瓜我又唔吃，咁仲有咩冷盤可以整呢？
晏晝問老公要唔要我陪佢吃？若不用我就吃麥皮，答案早就估到。一餐半餐夜少少食都唔緊要喇！最重要係老公食得開心，都明既做得咁辛苦緊係想有人陪食。
晏晝去〝Taste〞買鮮奶見到有菜，老公每餐都要有菜，不過，外賣又點會有菜，所以好耐冇菜到肚，我就買左我鍾意既菜心苗，一啖一條~爽丫！
老公6點幾來電剛食左麵包，佢話忘記叫我買菜，佢知道我買左就讚我〝醒目〞！老公食左Tea怕食唔晒，所以只係煮左一束麵兩個食，蛋沙律係我今朝整，簡簡單單又一餐。老公抖左一陣又走去拆風扇洗，叫佢休息先又唔肯，真係辛苦命。
2009年6月21日星期日
酷熱遊南丫島
前幾日問左朋友有關〝赤洲〞事宜，原來一個人都要約120蚊一程船，嘩~來回價錢可以去到澳門一轉有多，所以我地就改去〝南丫島〞。
今日天氣真係熱到嘔，老公不停叫我飲水，不是行左好多路，但每個人都好似散晒一樣。我最怕熱，加上著住牛仔褲，簡直唔想行。
我地係中環上船前往榕樹灣，落船後就向阿婆豆腐花出發，聽聞係最好吃，但我之前已試過覺得麻麻，一場來到帶大家去試下，我未去到條毛巾已經濕晒，而且又開始眼花，放心我不是中暑，眼花情況平時間中都會出現。高佬叔叔叫我去睇下醫生，之前佢對眼有事去睇過，原因眼睛啫喱體老化，其實，高佬叔叔只不過係細我兩日。
今次大家都係覺得麻麻，可能尾升好散，而滑度一般，還帶點燶味。
一吃完就閃人，因為舖頭位處於室外，而且有好多蚊，好在今日著左牛仔褲唔係就慘喇！上次去香港公園影相單是一隻手已咬左18粒之多，不過佢地就慘D，因為有D著左短褲。
高佬叔叔想去〝南丫風采發電站〞，就向山上進發。我以為有幾座，上到去得一座，冇想像中咁靚，不過座野都嘈嘈地。
之後就去左〝洪聖爺泳灘〞影下相，又坐低飲下野食下串燒，串燒不是太好吃，但貴，呢到十串要成70蚊。
我地8點落船，再係碼頭附近影相，大家相討仲有邊到去？晚飯吃什麼？高佬叔叔和他的女朋友介紹我地去旺角吃〝冷烏冬〞，然後就坐巴士去嘞！
諗住食完就去吃糖水，但老公近排好忙星期六、日都要返工，唔返工都陪左我外出影相又要勞動，所以吃完老公就取消唔去。
2009年6月20日星期六
預早慶祝父親節@2009
今日我與老公就去幫老爺貼地板和安下燈，朝早十點出門口去左美心食早餐。我地11點上到去就立即開工，我緊係又負責監督、後勤，其實都幫手黏左2塊，但又弄到褲都有膠水，老公自己整返。
老公叫我聯絡高達叔叔，待他放工來吃Tea。高達叔叔來到剛好攪掂，老公一個人黏左5個幾鍾，踎到腳仔又軟又痺。地板攪掂就隨時可以遷入，老爺都預定下星期日搬，老公都約好晒朋友幫手。
前幾日肥仔約今晚為明天父親節預早食飯，我影相既時候，肥阿哥話幾年都係食呢D，都冇咩好影，咁我都知，但今日冇相嘛！我地又係去返果間酒樓吃，今晚食物既素質差左好多。
2009年6月19日星期五
我、阿媽、阿B@三人行
今日我又約左11點去尖沙咀做Facial，我見阿媽又放假，而阿B又不用上學，所以就提意今朝去飲茶，然後阿媽和阿B陪我去做Facial，再去行街、食野。阿媽見我話去飲茶，所以就約埋阿嫂個阿媽一齊飲茶。
姻伯母和阿嫂個3哥已搵定位，傾下又食下大約半小時後阿嫂3哥要上班去，我諗住請大家飲茶，可是在我地要離開15分鐘前阿嫂2哥放假又來飲茶，大家都掙點心卡攪到好嘈，所以今次冇緣請飲茶，唯有留待下次，真係唔好意思。我、阿媽和阿B去搭港鐵，而老豆就自己回家。
我做Facial時，阿媽和阿B坐係梳化等，我book既時間係最早不會有客來，D阿太緊要晏晝先出動架喇！咁樣阿B就係外面跑圈和玩，但沒有一個職員撩阿B玩。
我地又坐港鐵落旺角，阿媽見去旺角就試下即時book做針灸，碰巧大伯娘又book左，所以要等大伯娘做完先到阿媽，咁樣我地就落左太子行一陣先食lunch。
我地入左始創行，天氣太熱阿媽唔想外出吃，問阿B想食飯飯？麵麵？佢話飯飯。我知阿媽鍾意食〝Pizza Hut〞蒜蓉包，又有飯吃，所以就去左地庫〝Pizza Hut〞。
我揀左個〝WOW~2人常餐〞，野都未吃阿B就痾左臭，但味道都係麻麻地，另外再加多2樣小吃，更加唔好吃又唔抵，結帳後等找錢，雖然係幾蚊，但都要找架！等左好耐都唔找，叫人又冇人應，阿媽話由佢成日想起身走，但我堅持要等佢地找，我原本諗住都比貼士，但佢地咁樣我一毫子都冇比。
我飲磨菇忌廉湯，阿媽飲意大利湯，我見佢飲左2啖就擺開，佢話唔好飲，咁我就飲埋佢，但香草味太勁我都頂唔住，兩款湯都唔好飲。阿媽話最好食都係蒜蓉包，但我就覺得都係麻麻，冇以前咁好食。
阿B話食飯，但送到佢口中又唔吃，反而佢吃Pizza啵！阿媽又冇飯癮，所以佢與阿B就食個迷你Pizza，而我一個人吃飯。Pizza唔知咩味，但飯就唔係咁好味囉！
原味雞翼2隻和香草麵包條3條，分別都要加8蚊。雞翼不止細，味道‧‧‧，而麵包條又冇乜特別，仲好燶添，個醬都係普通茄醬。
食飽就上去做針灸，針灸師又識睇下掌相，有時有空檔就贈幾句，但贈得最多係阿B，我都考慮緊去唔去做針灸，因為我最怕拮針。
2009年6月18日星期四
再來蛋撻
尋日發生〝蛋撻事件〞我話唔會再整野比老公食，但我都係講下啫！又點會唔整呢。
今日又再次整〝D.I.Y. ※經典聖安娜蛋撻〞，但最成功和靚都係第一次。呢幅相係未脫模前，脫完模都有D難難地，都係要努力去研究下蛋撻。老公放工回來，我係煮房洗緊野，佢見到餐檯就話‧‧‧
老公：唉~點解你執垃圾？
我：咩垃圾丫！我剛剛整架！
2009年6月17日星期三
蛋撻事件
今朝6點半就起身，然後7點半出門口，唔駛返工都要咁早攪咩？尋日晏晝老爺來電，上次申請調遷間屋攪掂，新居辦事處約左9點至十點收鎖匙，所以就約老公8點45分係辦事處附近等。
我比約定時間早到，過左約定時間15分鐘都唔見老爺，老爺從不會遲到，所以就打比佢睇下咩事，原來老公身在酒樓飲茶，佢話約左我9點45分，咁我叫佢飲完先來找我。尋晚老公都與老爺re-confirm一次，咁我就問老公，佢都話係8點45分，老爺來到話我聽錯，佢係約我9點45分，當時我都唔知比咩反應好。
我地到達辦事處，主任話剛有一個人睇樓，所以要等約半小時。上年老爺搬要買地板已經格過價，所以睇完樓又辦完手續，就去回上年果間買地板 ，碰巧老闆娘(我估)與老公係同鄉，雖互不相識，但都傾左半小時有多，然後我又陪老爺返回新居，星期日老公不用上班就會來幫老公舖地板。
老爺叫我一齊吃lunch，但我想吃肯德基，所以各自吃。我去附近買雞，但這間係吉之島內，咁啱呢間吉之島盤點，早知與老公食lunch喇！我坐車回家買〝麥麥〞吃。
今晚老公買〝魚肉翅〞吃，食咁少？夠唔夠？佢話6點幾食左野，都唔緊要我整緊〝D.I.Y. ※經典聖安娜蛋撻〞，老公鍾意吃蛋撻。
這款我都係初初學烘焙時整過，之前唔識焗咩都係放係低層，而家識就知放中層，但因這原因今次放左中層焗到個皮有D燶，後來我就較細D火，焗完都好似唔熟，因為皮燶又唔敢焗咁耐，再焗耐D就好好多。
我見到都唔係咁開心，唔開心就緊係會〝依依哦哦〞架喇！佢就話我〝勞勞嘈嘈〞，人地已經唔開心架喇！佢成日都係咁，一句安慰說話都冇，仲要話我。雖然佢都肯食，但佢咁樣，我還掂都唔滿意，咁我咪倒左佢囉！
2009年6月16日星期二
卡通牛油曲奇 (內附食譜)
今日終於的起心肝整餅，其實，我都諗左好耐先動手，咪又係個〝懶〞字囉！
我平時就唔會用卡通模整曲奇，只會用手搓圓壓扁，因為用卡通模要用棍輾，模洗既時候又麻煩，但見朋友們整得咁開心又靚，所以我都用下。
我都係第一次整有高筋粉既曲奇，質感比平時既實，而甜度就唔係好甜，我諗老公唔多鍾意食，雖然唔多甜，但我都OK既。
老公入門口放低個袋我就立即送到他口中，佢一開聲就話〝咁硬既？〞，但又出乎意料地佢話〝OK〞，問要唔要留低D？佢又話留，咁我就拎D回娘家。
卡通牛油曲奇
食譜來自：自家製曲奇小蛋糕~Home-make Cookies & Petit Cakes
材料：(份量約15-20塊)
無鹽牛油 60克
糖粉 40克
全蛋 25克
雲呢拿香油 1/4茶匙
低筋麵粉 120克
高筋麵粉 25克
做法：
1. 先以180度預熱焗爐。
2. 牛油於室溫下軟化，用電動打蛋器將牛油加入糖一起打發，打發至鬆發變白。
3. 蛋打散後分2-3次加入牛油中打勻，然後加入雲呢拿香油打勻。
4. 將已篩過的麵粉加入蛋糊中打勻，隨後用手拌成麵糰。
5. 將麵糰用保鮮紙包好，放入雪櫃冷藏一小時。
6. 取出打開後放上入爐墊以捍麵棍捍薄，再用卡通模具印出圖案，印滿整塊麵糰後將多餘部份撕去。
7. 原墊放上焗盤內並放入焗爐以180度焐約15-20分鐘便成。
小貼士：
如採用的模具花紋太多，很容易出現較難起模的現象，建議用少許高筋麵粉放在小碟上，印前將模具在麵粉上印虻數下，之後細力拍出多餘的麵粉，跟著才在麵糰上印出圖案。
2009年6月13日星期六
蜂蜜綠茶蛋糕@再次失敗
這款蛋糕之前我都整過一次，但係用cup cake紙模做，焗完表面好濕，我問過作者~原係焗爐唔夠熱，之後就買左個焗爐溫度計。
今日為了茜茜我再次挑戰，因為佢喜歡吃綠茶，可惜這個蛋糕始終送不到她的手上，想知原因請到〝送別不到的夜機〞就明白。不過，好在送不到，因為老公回到家吃過，佢話蛋糕好黏口，即係又再一次失敗。
我照書焗左25分鐘，但都係未熟，我再加多十分鐘，今次比上次好，但依然未成功，其實內裡組織都好靚，但唔知點解會咁黏，可能係我功夫未到家。
送別不到的夜機
今晚係茜茜獨自一人坐夜機離開香港去法國，她會與家人吃飯後一齊去機場，我都預備去送機，還叫她出門口前半小時就通知我，然後我就出門。茜茜不嗜甜食，但喜歡吃綠茶，我整左個〝蜂蜜綠茶蛋糕〞送給她。
晏晝整完蛋糕就上左肥阿哥家，因為Benz叔叔和太太，仲有兩個朋友去肥阿哥家打邊爐，就邀請埋我地參加。
我地開餐冇耐老公就放工來到，食左約45分鐘就打比茜茜，原來佢已經向機場出發，因為佢9點15分鐘要check-in，再過多一陣我與老公又向機場出發，肥阿哥話借架車比老公揸去機場，但我真係不敢坐，老公考到車牌十幾年都冇揸過，都係坐巴士安全好多。
我地坐小巴轉機場巴士，激死~落小巴就目送機場巴士離開，老公就轉坐港鐵去東涌，然後坐的士去機場。茜茜坐夜機11點，我邊坐港鐵邊擔心送不到機，當由青衣城前往欣澳途中電話響，我望下隻錶9點30分個心好驚，茜茜來電問〝你係邊？〞，她叫我坐對線車走，因為她還有十分鐘就要入閘，雖大家都想見大家，但時間唔許可，唯有等到年尾她回來請飲時再見。
我掛線後心情好down，過左一陣老公叫我問茜茜可否等多15分鐘，緊係唔得喇！都話仲有十分鐘，雖則老公出於一片好心，但佢既語氣唔多好，我聽落有D礙耳，不過，我都冇理會他，因為心情真係很差。
回到家附近的〝OK〞我就入去買左我最愛吃的〝青芒奇脆冰〞來調劑一下心情，這〝青芒奇脆冰〞係阿波羅出品不是到到地方能買到，但而家青芒肉少左，又唔夠酸。
2009年6月11日星期四
Farewell Dinner@Sai Sai
茜茜過2日就會坐飛機去法國，為她下個月在法國的婚禮作準備，為何要去法國結婚？古語有云：嫁雞隨雞，她的老公是法國人，所以以後她都會在法國生活，不過都預定每年會回港一次。
之前我地都約左與茜茜farewell，但因迪迪媽腸胃炎，就順延至今晚。早幾日我與迪迪媽傾好吃什麼，仲傾好我與茜茜一齊去買晚餐，而迪迪媽就回家湊迪迪仔。我地兩個係屯門市中心落巴士去到商埸人生路不熟，又問下人又電聯迪迪媽問下先搵到。
我地去元氣order完壽司，又去買雞吃，再折返拎壽司。大家睇到咁多野食，其實係得4個人吃，美食當前緊係食左先喇！唯有慢慢再減。
我、迪迪媽和茜茜相識在中三，不要講識左幾多年，一講就估到幾多歲。大家食下又傾下計，講返以前校園趣事，迪迪媽又拎返以前既相來睇，嘩~真係唔敢睇，總之笑爆嘴，全屋都充滿笑聲。
大家傾到不知時候，突然發現做夜間新聞才走人，老公話樓下今晚好靜，所以出屯門公路就通知他，他在車站等我，老公返工做到冇停手都來接我，真係辛苦你。
尋日我已預備左3個3吋半〝香濃綠茶慕絲蛋糕〞，可惜唔知點解今次比之前甜，真係失敗有D唔開心。
訂閱：
文章 (Atom)