燃燒指數：0.6磅 燃燒總數：14.8磅
燒脂指數：+0.2% 燒脂總數：2.8%
上個月我跑到小腿又實又想抽筋，而且好似粗左D啵！〝笨媽媽快樂家〞話肉實左變肌肉就減唔到，我就聽她的建意盡量行樓梯，而家冇跑步小腿好似冇咁粗，唔知係咪心理作用呢？
我家的樓梯有D靜不敢行，而返娘家湊住阿B又唔方便，我唯有係湊阿B放學途中有兩條路一行樓梯，一係就行斜路，我揀樓梯。雖然，我冇跑步，但成績與跑步差不多，可能我跑得不夠落力。
前幾晚連續出街吃飯，吃得太多，又加上週期前個人又開始暴脹，所以努力既成果，只剩回些少。
我怕下個月結婚週年成績都係咁上下，所以心中已盤算緊，而且有個計劃，希望能夠實踐喇！
我今日去街去〝中華書局〞買書，〝中華書局〞與〝三聯〞一樣做緊85折，就趁最後兩日85折，就去買〝自煮飯堂~開胃餸〞，被我無意中發現大少奶又出左烹飪書〝大少奶的自悠煮意生活〞，在此祝大少奶~大賣。
書名：大少奶的自悠煮意生活
作者：大少奶
出版：青馬文化事業出版有限公司
售價：HK$68-
今日打完波，又去行街，不停係幾個地方行來行去，真係行到腳都軟。
今日我與開心果姐姐和她的同事，12點在我家附近打完羽毛球再去食lunch，開心果姐姐就陪我回家放低運動用品，然後出發荃灣行街。
我地去左相熟的Boutique睇衫，然後再行其他Boutique，今日大家都有收獲，但並不多。肥仔來電問我係邊？一陣阿B返完〝協康會〞就會來找我，行到5點開心果姐姐要回家預備一陣返學，我送她去坐紅Van。
肥仔和娣婦帶左阿B去碼頭公園玩，咁我就行去〝荃灣廣場〞去〝中華書局〞睇書和買書，因為與〝三聯〞一樣做緊85折至到今個月尾。我邊睇書邊等佢地來找我，等到佢地來我就去付款，行左一陣又要分開，因為我要陪老公去剪頭髮，佢地行多一陣來找我地會合去吃飯。
我行回去千色店等老公，我見都7點幾老公又未到，又要剪頭髮，所以打比肥仔各自吃。肥仔8點幾來電問仲有幾耐？佢地而家係附近坐低左，預備叫餸食飯，老公又差唔多，就叫佢地等埋我地。
肥仔吃過呢間茶餐廳不錯，但髮型師老婆話這間早餐唔好吃。我地叫左兩個套餐，嚐過後真係唔錯，可能只係早餐唔好食。
雖然這間係茶餐廳，但有燉湯飲〝雪耳雪梨湯〞，而水準都唔差。
鹽焗雞：好入味，阿B仲好鍾意食添！得半隻唔夠喉。
中式牛柳：汁好味，肉不是〝拿〞得好利害。
南乳蒜香骨：嘩~簡直色香味俱全，無得彈。
全晚最呢3碟遜色左D，西蘭花果碟忘記左個名，味道一般，而兩碟菜就烚得太耐~好腍，整體全部都好味。
今日P小姐想約我食晚飯，可惜我應承左留在娘家煮餐比家人吃，但中途有些事要擱置，唯有回家煮麥皮吃。我掛住玩〝Restaurant City〞攪到6點幾都未煮，呢個時候老公就話我知佢可以7點收工，問我想食乜？佢意思係出街吃，但我都唔知食乜。
老公放工再來電，我突然想吃炒粉絲，咁就去家附近既韓國餐廳吃。老公去過一次唔多鍾意，但今次會去既原因可能係‧‧‧
事原：前日我講過想與老公出去食，我與老公好耐都冇單獨外出吃飯，但老公話好攰，而且又整親隻手，所以冇出到，當時我真係有唔問心架！但冇法喇！
我搵定位和叫定野食等老公來，因為我與老公都追緊〝巾幗梟雄〞，食完就要立即回家睇大結局。
今次老公話個湯好過上次，我地每人叫左一set飯和2碟炒粉絲，下次都係叫一set飯得，咁食法實肥死我。
原味炒粉絲：好味~
芥辣炒粉絲：唔好味，下次唔會再order~
傳統鍋飯：這鍋飯有我最愛既飯焦~Yammy。我見到碟辣醬，就諗起多年前與摯友去韓國時，導遊教我地用辣醬撈飯，真係好好味，邊吃邊諗起往事。
醬爆磨菇牛肉石頭鍋飯：一般
柚子蜜：我飲熱，老公飲凍，好香柚子味，但太甜，只係飲左少少。
今日雖然係端午節，但就不用做節吃飯，因為娘家早在星期日吃了。節日食飯阿媽常常提早，因為可免掉與人迫和排隊。
高達叔叔手提電話壞，而老公有個朋友係沙田賣電話，所以我地就去左沙田，我順便去City Super幫朋友買米奇曲奇模。我仲約埋肥阿哥、阿嫂與肥仔一家三口一齊去沙田，不過，肥阿哥尋晚出左街睇波，所以我地與肥仔一家三口去先。
大家齊集就去醫肚先，大家唔知吃乜，就去左一田既美食廣場搵食。娣婦去〝八番〞買左碗細牛肉飯比阿B，又去左〝峰壽司〞買壽司吃，件蛋就緊係比最喜歡吃蛋既阿B喇！娣婦話帶子壽司失色左D。
娣婦吃3件壽司緊係唔夠喇！除左高達叔叔去〝八番〞買麵外，我地齊齊去左〝Mos Burger〞買包吃，老公與我都係吃〝犘斯芝士漢堡〞，而肥仔兩公婆都係吃〝蝦漢堡〞，佢地覺得唔夠〝麥麥〞好吃。
吃飽飽行下街，又去睇下電話，阿B在店外等候，但佢要週圍行，所以我與娣婦就跟隨，突然發現阿B痾臭臭，我和娣婦就搵地方換片。我地見男仕未得，咁換片地方又近City Super，所以我地就行住等，男仕買完電話就來與我地會合。曲奇模貨架和貨倉都冇存貨，唯有再留意其他地方。
我地要行既地方都差不多行晒，肥阿哥和阿嫂就到達，肥阿哥要去〝宜傢〞買野，咁就渣車載我地去〝宜傢〞行下。我發現〝宜傢〞有個密實盎只售$29.9，比起上次〝 十蚊店〞的平好多。大的是〝宜傢〞，小的是〝 十蚊店〞，咁抵我緊係買喇！
大家都係〝宜傢〞食左個熱狗餐，雖然加左1蚊，但依然好平。之後高達叔叔就回家吃飯，而肥阿哥就載肥仔一家三口去外母家吃飯，跟住又載我與老公回家，夜D再電聯吃什麼晚餐。
老公回到家洗完矛厠就眠，7點幾阿嫂來電提意去〝板前〞吃，嘩~緊係話好喇！我想去好耐，但成日都好多人。我地去娣婦娘家附近既〝板前〞吃，因為順便接肥仔一家三口回家嘛！
〝板前〞壽司水準真係唔錯，飯又細、料又夠份量，睇下舊飯比平時既細約2/3，條蟹棒都好大條添架！〝板前〞和〝板長〞雖是同一集團，但阿嫂話聽講〝板長〞係貴D，而且料又靚D。
阿嫂和老公都話件〝吞拿魚腩〞~好，入口溶化，可惜薄左D。
佐賀和牛卷：牛肉份量少，但肉質好軟棉棉，又係可惜牛肉份量少。
鹽燒牛脷：我唔阿牛脷和豬脷，但肥阿哥極力推介，所以我就試左少少，食落冇乜特別，但始終心理上有D驚。
呢隻唔記得咩蝦，都係好吃。
今日阿B下午要返〝協康會〞，娘家外出維修，鑽野嘈到死，所以我就湊阿B回家午睡然後返學，娣婦見落雨，所以就請幾個鐘假陪一齊湊阿B返學。
娣婦3點幾就到我家，我地就叫醒阿B，平時一叫就起身，今次唔肯起，見佢精神都好似唔多好，所以取消返學。
我見咁就不如夜晚煮意粉齊齊食，我問左娣婦想吃白汁OR茄汁？想用雞OR牛？食完之後，大家都覺得茄汁配牛肉好味D，影相時我先發覺賣相有D似〝鴛鴦炒飯〞。
材料唔想留，因為都唔知幾時會再煮，所以全部用盡佢，隨個人喜好，大家可以將份量減少。我邊煮邊試味，所以煮到番茄爛晒，有這次經驗下次就會有番茄肉吃喇！
食後感：
我：味道OK，可以再濃D，因為佢地係淡味人，所以我唔敢煮咁濃味。
老公：好味道，但覺得酸左D。
娣婦：味唔夠濃，但整體好味。
鮮茄磨菇雞意粉
材料：(3人份)
意粉 3人份
雞扒 0.57磅
番茄 4個 (一pack4個裝484克)
磨菇 (切片、細) 113克
醃料：
豉油 適量
糖 適量
胡椒粉 少許
生粉 少許
油 少許
汁料：
茄膏 (細) 一罐 (170克)
茄醬 2湯匙
水 200毫升
淡忌廉 2湯匙
糖 1茶匙
鹽 1/4茶匙
做法：
1. 將意粉烚熟，備用。
2. 番茄去皮、切粒。
3. 雞扒洗淨去皮、切絲，然後用醃料醃15分鐘。
4. 將雞扒炒熟，再加入磨菇兜炒盛起。
5. 番茄加入鑊內炒，加入汁料煮 (除淡忌廉外)，再加入 (4) 炒勻。
6. 最後加入淡忌廉煮至杰，即可。
今晚我book左場打波，就相約左阿嫂、肥仔和娣婦，我地出動晒當然唔少得阿B喇！老公知道阿B都來，就專登唔開咁夜O.T.，6點半收工。老公每次知道阿B都會去，佢都會盡量就可以見到阿B，我諗佢掛阿B多過我。
我地打完波頭痛時刻又到，大家都冇idea食乜！而且有阿B在場，要搵個地方都可以容納到阿B，所以選擇都唔多。
我諗起上次與阿嫂去過〝一品螞蟻〞食lunch，不過，我既就麻麻地，阿嫂既就OK，而且阿嫂話〝一品螞蟻〞屬於〝紅螞蟻〞集團，〝紅螞蟻〞我鍾意，所以就試下佢晚餐得唔得，估唔到好過lunch咁多，大家都大讚。
這裡冇set dinner，只得二人套餐，而散叫又比較貴，所以我地就叫左兩個二人套餐，餐飲只包咖啡或茶，其他飲品都要加錢，而甜品就要加二十蚊，就會有幾款比你揀，除此之外額外仲叫多兩個小吃，有咁多野食埋單都係五百幾蚊，價錢都合理，份量又適中。
辣汁燒原隻日本鮮魷魚(兩食) ：魷魚係老公必選，魷魚好爽不靭，而炸魷魚鬚又脆、又爽。
芝士焗墨西哥辣肉醬粟米薄脆：老公就話唔好食，但粟米薄脆本來就是這樣沒特別，所以我覺都OK。
精選二人套餐~小吃任選兩款、主菜任選兩款
香酥雞軟骨：剛剛炸起，皮好酥鬆，娣婦不吃雞軟骨都話好味，好味~激讚。
百花大春卷：春光皮包住蝦膠~爽。
芝士汁鮮白菌煙肉波蛋意大利粉：意粉不論硬度和味道都係適中，而波蛋意思，我諗應該指隻雞蛋蛋黃生。
羅馬式焗豬扒飯：起初以為與大家樂一樣，但比大家樂還要好，豬扒好腍，飯又唔會焗到硬~正。
濃情二人世界套餐~小吃任選兩款、主菜任選一款、新鮮主意任選一款
蒜香肉碎炒鮮雜菌釀翠玉瓜：我技術問題影出來唔多靚，但實際賣相係唔錯。好香蒜味，阿B都好鍾意吃。
原隻美國薯仔焗田螺肉：這味稍為遜色左D，薯仔帶硬，而田螺又冇乜特別。
鴨肉鵝肝醬蔥油薄餅：老公都讚這個好，有好香意大利臘肉腸味，非常惹味。娣婦和老公都唔吃鵝肝，所以舊鵝肝分左3舊，我怕肥試左少少，就比埋佢地吃，
黑椒忌廉汁焗牛仔骨飯：大家都讚這飯好，牛仔骨不像外出的嗱得好勁，仍然保持到有牛肉味，阿嫂還讚這個汁好。
兩個二人套餐有4杯飲品，肥仔order黑牛，而老公就order椰汁紅豆冰，其餘兩杯就係普遍野。
我見〝三聯書局〞仲有減價，而阿B今日開家長會，所以不用我湊放學，所以晏晝又走去書局睇書，平時只係睇烹飪書，而家多左一樣就係攝影書。
今次呢本書本身好平，仲要有85折，雖減得係唔多，但因本身平嘛！我仲有2本想買，都係屬於自煮飯堂，不過，都係唔好一次過買咁多，逐少買咁老公就唔多覺喇！
我諗本書咁既原因，係沒有花巧東西，連前言、作者介紹和廣告都冇，只有目錄和食譜，而食譜做法和材料都好簡單。我覺得咁都幾好，沒有多餘東西，售價平D，咁就可以多D讀者得益。
書名：自煮飯堂~靚餸 Home-made Cafe~Tasty Dishes
作者：蔡美娜
出版者：萬里機構‧飲食天地出版社
售價：HKD28-
初次係書店見到已想買，可惜覺得貴左D，每次去書店都會看看有冇減價，今日終於等到。
今朝我拎褲去改，見老公今日要返工，咁順便去〝三聯〞睇書打發時間，見到〝三聯〞做緊減價全部書籍〝85折〞補充除外，優惠期至到五月三十一日，詳情可以去〝http://jointpublishing.com/shopinfo/active1/B049.jpg〞睇下。我就立即拎一本，再睇下其他書。
這本書係嬰兒食譜，我不太懂煮嬰兒食物，可能這樣阿B樣樣都OK，唯獨係食方面始終有問題，又可能家中太多人愛護。
我睇過好多嬰兒食譜書，覺得呢本比較好，除左有講幾多個月大應該吃什麼，而且有分早、午、晚三餐，又有中西湯水，更加有蛋糕、甜品好多完化，又有好多提點和注意既地方。我買了這本書先知，除可以得到食譜，亦都係可以做善事。
兒童癌病基金由一群熱心的醫生、護士、癌病兒童的家長和熱衷公益事務的人士於一九八九年成立，旨在為醫院提供補充資源、協助醫生提升治癒率、以及提高癌症兒童及其家庭的生活質素，在身心健康及人際康樂等方面予以周全服務。
現蒙Sophie Leung Healthy Living Limited鼎力支持，義賣此書為基金籌款，造福本港癌病兒童及其家人。兒童癌病基金謹代表眾受惠兒童致以萬分謝意。
書名：第一口滋味 My First Bite
作者：梁劉柔芬 Sophie Leung
出版：Sophie Leung Health Living Limited
售價：HKD128-
前言~麥海雄醫生
食慾是與生俱來的本能，所以母親們對初生嬰兒在哺乳階段要面對的問題較為簡單。但當嬰兒逐步成長，需要加添餵食固體食物時，各種問題便俏俏地接踵而至。容易應付的自己是不擇食的小寶寶，若遇諸多挑剔的嬰兒，父母們便感不知所措。
《第一口滋味》是父母們的『及時雨』，書中載有中西幼兒健康食譜外、更有系統地詳列孩童在各成長階段所需的膳食、所需的營養及該注意事項等。內容言簡意賅，圖文並茂。讀者可參照指引，親自動手，按步就班，便能烹調出令孩子增添食慾的健康菜式，更可藉此增進寶貴親子關係。
我娘家對面的F太太和F先生個次子有〝悅來酒店〞Buffet半價優惠，所以就邀請我雙親一同去，但要6人以上才有這優惠，咁我和阿公都一齊去，我就可以帶阿B去街喇！
我不敢吃太多，因為近日覺得肥左D。擺放食物區域並不大，食物種類都不算多，但有好多甜品，食物水準都係一般。我地坐既位置行一步就到遊戲室，所以阿B掛住玩食左好少野。F先生和F太太與阿B合照，F先生話阿B有D似鬼仔，可能因為阿B眼大掛。
每人都有半隻龍蝦，size仲大過我手掌，肉質都新鮮，但係我用鉗夾開龍蝦鉗時，藏於龍蝦鉗內的水彈出來，濺到我頭髮、面、衫和眼鏡都有，當時真係好狼孭。
熱盤最好吃就係〝螺頭香酥盒〞，不過，第二轉時D餡好鹹，但酥皮依然好食。
食物大致上都是這些，不過，有D我係冇食的。
中式甜品得〝豆腐花〞，而西式就有好多選擇，十分精緻。
Dreyer's雪糕和雪條任食。
星期日我決定今晚係娘家煮飯，我已諗定煮幾款餸，尋日叫阿婆今朝幫我買定豬扒和排骨，朝早我就買埋其他配料。
我都好耐冇係娘家煮餸，老公可能都好耐冇吃住家飯，所以佢今晚都來一齊吃飯，我地行回家時，突然覺得今晚既餸菜不及平時既麥皮好味，總覺得吃麥皮之味D。
咕嚕肉：我本想煮生炒骨，後來煮左咕嚕肉，因肥仔唔想吃骨要吃咕嚕肉。
鮮茄牛肉：我專登煮比阿B吃，可惜佢齋食汁就吃，連埋飯就唔吃，而家佢唔阿既野唔準佢吐出來，佢唯有就含住唔吞，真係激死。
煎玉子豆腐
洋蔥豬扒：肥仔話點解咁黑既？因為我覺得唔夠鹹，落多左老抽，所以就咁深色。
蒜蓉白菜仔：老公最鍾意吃，可惜我掛住煮咕嚕肉，菜煮得淋身左D。
黑橋牌腸 (原味和蒜味)：上次肥仔和娣婦去台灣買回來的。
北海道牛奶布甸：上星期肥仔和娣婦係千色店買的，都OK貴，74蚊4樽，只有掌心般大。我唔飲鮮奶，更加唔吃燉蛋和燉奶，因為我怕果陣味。我吃左兩啖就比晒老公吃，肥仔問好唔好食？見老公冇食食下比返我就知好味喇！
