燃燒指數：0.4磅 燃燒總數：14.2磅
燒脂指數：0% 燒脂總數：3.1%
我決定4月開始每日去跑步，但跑左一星期就遇上復活節假期，咁多日假都出左街，足知抖左一星期先跑返。我通常夜晚去跑，有時夜晚要出街就會晏晝去跑。
運動前我一向都唔會做熱身運動，所以係運動場行一個圈當熱身，再跑一個圈，如是者梅花間竹行3個圈跑2個跑就走人。起初都係差40-60米先可以跑完一圈，後來邊跑邊睇跑，就領悟到點樣緩步跑，咁樣有時可以跑到一個圈有多。
我唔知係咪跑得多小腿好似粗左，因為我著條4個骨牛仔褲，係小腿位窄左，而且對腳稍為登行少少就有D抽筋，我想再加碼跑多D，但係咁既情況都唔敢谷得咁勁，加上跑左一段一日都好似未識認，都係遲D先算。
我跑步成績都唔係咁好，有時都想偷懶唔跑，但我抱住唔跑可能仲差既心態繼續跑，不過，有時真係會偷懶唔跑。我見咁樣就係食方面又下功夫，唔出街既話就4、5點就煮牛奶麥皮，然後去跑步，之後就盡量唔食，最多都係食梳打餅，呢個方法幾好，但呢兩晚都出街吃，所以磅數升返少少。
尋晚開心果姐姐係Facebook約我今日行街，而家科技發達電話都唔駛打就可以傾計。原本佢今日要回大陸公幹(即日來回)，但臨時有變不用上，所以可以早D行街。開心果姐姐問我想去邊？上次與阿嫂行荃灣，佢睇中左件衫未返貨，咁就去荃灣順便幫阿嫂買。
我地撞啱返新貨，仲有好多新貨未有時間上架，但我見到已經好開心，因為呢間野D衫有D都比較大少少，除左幫阿嫂買衫外，我地每人都買左兩件，其中一件仲係一樣添啵！我、開心果姐姐和熊貓姐姐有時都會買埋同一樣的衫、褲或裙架！
老公話等埋佢吃飯，未收到電話就繼續行，後來我再買多條牛仔褲，我想買好耐，但一直都搵唔到合心意，今次有開心果姐姐幫眼，所以買得安心D。
大家都唔知晚飯吃乜？我就打電話問娣婦時，得知阿媽陪老豆去左急症室，我立即打比阿媽看過究竟，原來老公又氣促，又要留院，而家咁夜明天先去醫院。
我地週圍行，最後揀左一間我想試好耐既迴轉壽司，食物又係一般，但飯大舊左D、又酸左D，價錢唔係平又唔係貴。
老公又係例牌order剌身。
我為C小姐的生日做左這個蛋糕，我係跟據上次〝綠茶慕絲蛋糕〞而改的，因為上次太creamy，今次樣樣改D，出來的結果人人都讚好，我問佢地兩個問題‧‧‧
佢地叫我下次整大個D，仲叫我教佢地整蛋糕添！我一直擔心個蛋糕唔好食，我的擔心真係多餘，有人欣賞真係好開心。
香濃綠茶慕絲蛋糕
餅底材料：(4吋)
消化餅 59克 (4塊)
無鹽牛油 39克
餅底做法：
1. 將消化餅放入保鮮袋，碾碎。
2. 無鹽牛油隔水座溶。
3. 消化餅放於碗中，加入已溶化牛油。
4. 倒入慕絲圈內，壓平，再放入雪櫃雪至硬身。
慕絲材料：
淡忌廉 151克
牛奶 48克
綠茶粉 7克
糖 43克
魚膠片 2片
慕絲做法：
1. 魚膠片用凍水浸軟，然後隔熱水座溶。
2. 牛奶加入綠茶粉攪勻。
3. 淡忌廉加糖打至7分起。
4. 將(1)和(2)混合，然後加入(3)內，用橡皮村拌勻。
5. 將(4)倒入餅底慕絲圈內，冷藏4小時，脫模，即可享用。
整後心得：
l 若果綠茶粉加入牛奶攪極都有粒粒，倒入魚膠水時，可以用篩過濾。
前排我分別見過兩位好耐冇見既好友C小姐和P小姐，今個月係C小姐生日，趁此我地3人又可以聚下，就約左今晚去銅鑼灣食晚飯，大家都係嗜辣之人，就揀食泰國餐。
尋日我將上次太creamy〝綠茶慕絲蛋糕〞，改良過，成為4吋〝香濃綠茶慕絲蛋糕〞就當係C小姐既生日禮物，因為太耐冇接觸唔知佢鍾意咩，話係改良，但個心好擔心怕唔好食。
我諗我可能太擔心，又或者太趕忙，攪到忘記左帶它出街，我晏晝3點幾跑完，回家洗白白，就立即去湊阿B放學，再與阿B玩一陣就出門口，落到樓下等車C小姐來電，這樣才記起個蛋糕，跟住就巴士去港鐵站，再搭一個站回家拎蛋糕，再坐港鐵去銅鑼灣，咁樣我就遲左15分鐘。
我地6點幾係Sogo集合，銅鑼灣P小姐最熟，就帶我地去食泰國野。我地坐低野都未叫，就開始影相，真係影得好開心，P小姐都有帶相機，佢專登charge足電，難得有人陪我影，除食物之外當然仲有大家既合照喇！我地由約7點又食又傾又影，直到9點先散。
我唔鍾意搭港鐵，所以要巴士轉巴士先回到家，我等第一程既士老公來電放工，佢話尾程巴士站搬左去好僻靜既地方，有時佢搭都係得佢一個人等，但我堅持要搭，我上第一程巴士冇耐，老公再來電話係尾程巴士站等我，老公有幾條回家路線，佢專登揀我呢條，咁即係佢擔心我喇！從來都未試過用行動或親口講擔心我，我心都甜。
今晚呢間泰國餐廳食物都係一般，但價錢唔算貴，叫左6樣野埋單都係二百幾蚊，呢餐當然係我與P小姐請壽星女喇！可能價錢唔算貴，所以有D份量細左D，其他份量都OK既。
冬陰公：睇落唔係好大碗，但可以分到右邊3碗份量的湯，可惜鹹，而且唔夠辣。
馬拉盞通菜：味道OK。
泰式蝦春卷：味道冇乜特別，但蝦肉好似唔多新鮮。
酸辣無骨鳳爪：唔夠酸和辣，份量少。
椰汁紅咖哩 (牛)：又係冇乜特別。
薄餅：專登orde來點紅咖哩。
食飽飽就切蛋糕，大家都讚好味，而且添食，得到大家讚賞真係好開心，食唔晒C小姐帶回家添！
我見烘焙店冇4吋蛋糕盒，記得〝吉之島十蚊店〞有，所以去左買，雖然係貴D，但都幾好用，質地都夠硬。
26 April 2009
之前我有班朋友約左今日去塔門釣魚，但搵唔到魚排人，所以就改去高流灣，咁我就問埋高佬叔叔和高達叔叔去唔去，佢地都有興趣，可惜天公不造美，所以我班朋友尋日取消左，不過，夜晚高佬叔叔話天色OK，再睇埋明早天氣如何再決定。
今日老公比我早起身，有幾早？我係預定7點45分起身己唔見人，從未試過。我地約好係牛池灣吃早餐，出門口都冇雨，食食下先嚟落雨，我地既然個心預左去，就豁出去喇！食完就坐小巴去西貢，去到西貢買魚餌和乾糧。我地係西貢路經一間食麵既舖頭，見到劉青雲和郭藹明，郭藹明真係真係好瘦。
我地係西貢再轉巴士去黃石碼頭，我一早已問左AL弟弟船家電話，差不多落車就call船家載我地去高流灣。我記得高流灣係我中學年代已去過一次，係教地理阿Sir帶我地去，仲去左兩日一夜添！今次重回一D印象都冇。
我地12點就到達高流灣碼頭，已經有人係到釣緊，個個都著晒雨衣，但我地只有傘和風褸。
碼頭有瓦遮頭好好多，起碼行裝都唔會濕。
全部都係我地既乾糧。
我地兩點幾開餐，首先係沙甸魚夾包。
然後再來腸仔夾包，每條腸要6蚊條架！我地已經係揀最平果樽，但好好味。
呢條係我第一條釣到既魚~石九公，而且係最大條添！有我2/3手掌咁大。
呢條係我第二條釣到既魚，有個阿叔話叫〝石喇〞，我聽到係咁既音喇！仲有人話係可以拎去醃鹹魚。
老公釣既第一條魚應該係唔食得既，高佬叔叔話應該係珊瑚魚。雖然放生左，但老公鉤到佢個肚，我諗都不能活多久。
高佬叔叔釣第一條魚，唔記得咩名。
高達叔叔釣既。
又係高達叔叔釣。
這都係我地今日既魚獲，不過全部都送晒比人。
我地諗住晚餐去大角咀〝良記〞打邊，就陪高佬叔叔回家放低行裝，返到去倒不如去街市買材料係屋企打邊爐，所以就拿拿淋落街買。
老公仲叫高佬叔叔和高達叔叔，係Facebook開Pet Society和Restaurant City玩，雖然開左但其實佢地係唔玩，不過，老公諗住搵多D錢啫！咁我又可以搵多D，若果有既人就會明架喇！
今日就係冒住咁既雨勢釣魚，雨從未停過，但到我走坐車時雨就停，朝早出門又冇落雨，真係被雨玩死。
今個星期日會去釣魚，而下星期又會去食飯，我諗住整下蛋糕請朋友，所以今日就去左〝十蚊店〞買蛋糕模，順便買埋食物夾，而且買多把麵包刀，遲D整方包就會切得靚D。
我回家後就註冊左〝MSN〞，因為今日幾經朋友推介，又為方便大家溝通，所以我裝左，順便同老公註冊埋。
我與老公A/C用Desktop和Notebook登入，我用MSN版本係〝MSN2009〞，但我遇到個疑問，花左我整個下午都未解決到，希望有朋友能解答。
雖然係咁但我可以用自己A/C與老公A/C直接對話，但老公要與我對話，絕對要我send message去老公A/C先得，雖係對話但老公見我都係離線狀態。
我send左mail去MSN問，等回覆之餘自己又努力嘗試，最後到夜晚11點幾難題被我解決左，而家老公見到我online喇！
19 April 2009
前幾日高佬叔叔話今晚去食火鍋，老公唔想食任食，想去九龍城吃逐碟計，但果樹會好貴，所以高佬叔叔就提意去大角咀，叫我上網搵下。我上網搵有關大角咀火鍋，來來去去都係介紹兩間。
大家都好滿意這次火鍋，雖然係逐碟計錢，又order左2次新鮮帶子吃，又叫左幾支啤酒，但係埋單都係5百幾蚊，我地5個人都係每人110蚊，與任食錯不多，但食物質素比任食好。平時通常加水，都係用食水，但這裡係真係加湯，所以個湯底唔會溝淡。
這間我冇詳細地址，因為冇諗住介紹，但係坐車回家時，諗網上又冇乜介紹大角咀火鍋店，又問左老公佢都話OK，若果有機會都會再去，所以就到介紹一下。雖然我冇詳細地址，但都幾易搵，間野就係〝骨煲皇〞隔離，〝骨煲皇〞係〝杉樹街〞都好多人識。
我地order左鴛鴦湯底：番茄薯仔湯和沙嗲湯底，這裡係加湯唔係加水架；混醬料好整齊。
老公例必order既帶子，我地order例牌約4-5隻，食過返尋味，但我地有5個人，伙計都好好兩次都比左5隻，仲好大隻，又好新鮮。
我只係炸蠔，忘記問好唔好吃，但就好肥大。
包心芝士丸市面有D係假野，即係好難食，但呢到係真野果隻，但肥牛都唔多抵，一碟得8塊，但見人order手切肥牛，就好大碟，不過就貴D，但得3個人吃牛，所以就冇叫。
良記 (豬骨煲)
地址：九龍大角咀杉樹街6-16號4-8號舖
訂座電話：2391 0800
尋晚老公話想見阿B，所以今朝我就回娘家湊左阿B回家。阿B每次來我家都會拎set巴士來玩，老公整蠱阿B專登將它擺左去另一到，其實佢目的係要阿B叫佢啫！
原本諗住帶阿B去公園玩，但係落雨冇得玩，我地等到娣婦放工，然後一齊去食lunch和行下街，肥仔要幫公司去深圳踢波，所以娣婦晏D就會回娘家。落雨冇乜地方好去，阿B又眼瞓、娣婦又未夠鐘回娘家，所以就一齊回家等阿B眠下。阿B瞓左2個鐘醒，老公就送佢地去搭車。
上星期老公生日用剩2隻焗薯，所以今晚又煮一餐薯仔餐。尋晚去左日本飯堂吃，都係食普通野，點知今日肥左2磅，今晚食得咁heavy，食完就洗碗、掃地和拖地，希望盡點棉力，不致太肥喇！
薯仔蛋沙律
雞粒釀焗薯
煙肉釀焗薯
上次用〝韋太~蜜味豬肉乾〞這食譜將豬肉改為牛肉，就整左〝蜜味黑椒牛肉乾〞，但不是完美，今次我就跟足原食譜用豬肉，出來效果真係好好，有好富豐蜜味，加左黑椒又帶少少辣，與街的都差不多。
上次用牛可能沒太脂肪，所以有D〝鞋〞，但豬肉脂肪比較多，食落好腍。我要研究一下牛肉乾食譜，從這2次整牛和豬肉乾，知道不一定可以套落另一種食品在同一食譜內。
蜜味黑椒豬肉乾
材料 :
枚頭豬肉 200克
調味 :
生抽 1湯匙
鮮露 2茶匙
紹興酒 2茶匙
砂糖 60克
蜜糖 1湯匙
鹽 1/8茶匙
黑椒碎 1/2 茶匙 (可以唔用)
做 法 :
1. 以150度預熱焗爐。
2. 將買回來的枚頭剁碎，然後將所有的調味加入，並用筷子將材料順一方向攪勻至起膠及黏成一糰。
3. 將豬肉碎放在牛油紙上，面上再鋪上一層保鮮紙，用木棍在保鮮紙上來回將肉餅壓勻，大約壓成一底約 2分厚的肉餅。
4. 將肉餅放入焗爐，先用150度焗15分鐘，然後再將爐火調高至160度再焗15分鐘，之後將豬肉乾取出並且將它反轉再焗10分鐘即成。
5. 待涼後將豬肉乾剪成一片片享用。
注：
1. 做豬肉乾，肉餅一定要壓得薄一些，否則，做出來的製成變成牛肉餅。
2. 糖及蜜糖的份量多少都要加入，否則做出來的效果會沒有光澤及乾身似肉餅。
3. 每個人家用的焗爐爐溫會有出入，請在焗製的過程中，如發現太濃便將爐溫減低。
整後心得：
l 豬肉乾焗完後表面會乾左D，你可以翻轉沾回汁液就唔乾架喇！
我都好耐冇新攪作，尋日諗住整麵包，但又怕多功夫，所以整左呢款蛋糕，好在怕整麵包麻煩，因為今日唔多舒服，又係老毛病頭和肩頸痛，瞓下醒下，食完野又嘔，只係湊左阿B返學，湊唔到放學。
我將麵糰倒落紙模內，大頭蝦的我執拾用具時才發現，原來我有2隻蛋都冇落，唯有麵糰倒回碗內，再加入蛋，雖然步驟錯左，但係都好好味。唔知點解，成日焗cup cake個表面都好似火山咁，都唔平滑既呢？
食後感：
我：這個蛋糕真係好香檸檬味，食落甜甜酸酸，感覺好得意。
清新檸檬蛋糕
食譜來自：自家製手工蛋糕 Hand-made Cake
材料：(5個)
牛油 50克
砂糖 50克
鮮檸檬汁 20克
檸檬皮屑 15
全蛋 2隻
低筋麵粉 60克
泡打粉 2克
做法：
1. 先以180度預熱焗爐。
2. 牛油於室溫下溶化。
3. 加入砂糖以電動打蛋機打發至鬆發變白。
4. 蛋打散後分2-3次加入牛油中打勻後，再拌入檸檬汁及檸檬皮。
5. 將已過篩的粉類加入牛油糊內攪勻備用。
6. 再倒入模具內約8乖高度，入爐以180度焗約35分鐘。
小貼士：
l 可用濃縮檸檬汁代替鮮檸檬汁。
書檯上的計數機壞左好耐，但一直都搵唔到心水的，我既心水緊係米奇喇！其實之前都買過一部米奇計數機，可惜它是太陽能，不能入電，但我家沒有陽光，只有靠燈光，但每次用都要舉高接近天花板的燈才用到，真係癈時失事。每次行街我都會留意，但次次都係冇米奇款。
上星期係冒險樂園換LEGO比老公時，被我發現到呢部計數機，可惜我唔夠票換，所以尋日高達叔叔係陶大既冒險樂園過左票比我，仲幫我check到我家附近有貨，咁我諗住今日去換，臨出門口前執銀包睇單，發現到D野，當時真係激到我彈起。
我發現到尋日冒險樂園過票既單，原來係我張咭過左票比高達叔叔，我都話明唔夠票換，仲係我到過票比人，係咪唔合邏輯先，都唔用腦既。我check過好多舖都冇晒貨，換唔到我緊係唔開心喇！
我有諗過，搵高達叔叔過票比我，然後再趕回家換，但高達叔叔話咁趕就唔好喇！高達叔叔叫我請佢食飯，佢就過來找我，但咁樣我又唔好意思。老公和高達叔叔溝通過，結果老公可以早收工，就找高達叔叔拎張咭，若唔可以放早，就要高達叔叔過來。我落去睇左肯定有貨就通知佢地，如計劃地進行，最後都係要高達叔叔來。
我地去左食韓式晚飯，我估唔到老公會來呢間，所以冇拎相機，老公話請高達叔叔食飯緊係要食好D喇！我地唔收佢錢，但佢點都要比返錢我地，真係又多謝又麻煩晒佢，而且又唔好意思。
