2009年2月28日星期六

有獎遊戲飲宴@御苑皇宴MegaBox

今日係朋友〝電腦奇俠和愛心小姐〞結婚大喜日子,我當然會化個妝去赴宴喇!所以就要戴Contact Lenses,雙眼唔慣好攰,又成日唔記得自己化左妝,塊面癢就用手抓,有次仲用水來洗面,好在一掂塊面〝叮〞一聲記起化左妝,唔係就不得了喇!


一出電梯已見到佢地個紙版公仔,又有結婚相,旁邊仲擺左支好靚既羽毛燈添!



現時流行係婚宴場地舉行證婚儀式,他們都不例外,我遲左15分鐘出門,以為趕唔切5點到婚宴場地,好在一切順利係10分鐘前到達。新娘子為這個婚禮努力減肥,今日成果令我都要加倍努力,而新郎哥從未見過佢咁正經,在舉行證婚儀式時發生左D攪笑事。



  • 律師講錯左新神個名,大家立即〝O〞晒嘴,不過,佢都兜得返。

  • 新郎宣讀誓時,講講下支無線咪冇聲,跟住由頭讀多次就OK,但都係用同一支咪,亦都冇整過架啵!

  • 互相戴結婚介子,新郎幫新娘帶介子時,新娘舉起左手,但新郎想拎左手,但又想拎右手,有點不知所措,可能太緊張喇!


大食仔見到這個冰雕,就問點解滴水既?我話因為熱囉!



證婚儀式完結我地就落左去行商場,落到去老公想飲野,咁大食仔和大食媽留係兒童天地睇野,我與老公就去美食廣場搵食,老公見到〝MOS Burger〞話食,但我話食〝麥麥〞平D,佢堅持食〝MOS Burger〞。食飽飽又行一陣,正想與大食媽聯絡就見到佢到,然後又一齊回酒樓。



我地坐28號檯,靠窗邊。



每張檯都有花,入席時收回花放晒係窗邊。




Souvenir係朱古力和年曆咭,年曆咭有2款。



新郎和新娘在門外守口等待入場,全場熄燈燃點起爉燭。我飲緊橙汁,職員問要唔要紅酒?老公唔喜歡飲紅酒,佢貪高興又要,仲要多杯比我,我飲左少少,其餘既老公渴掉。



今晚既餐牌。



我地得6個人,另外6個就係新娘子既同事,但都冇來齊,我地呢圍得9個人,所以大家都食得好飽。




今次飲宴有遊戲玩,仲有獎品添啵!大會派左3張圖,然後係電視顯示同一幅圖,不過,就有5個地方與手上的圖不同,大家要鬥快找出錯處。纖瘦小姐話好想要,所以我地每次都好努力搵,每次都遲人一步,終於到最後一幅我地革命成功,小禮物贏左就有3包,即係12個每人可以有一個。


之後仲有估電話號碼、鬥快send SMS,但唔知有咩獎,因為大家知道不及人家快,所以我地放棄左,繼續食野。



返到屋企影相,無意中發現背面有D野,原來唔係唔食得架!係〝電腦滑鼠手墊〞。頭先新娘同事仲話〝明天有早餐食喇!〞,我立即打比大食媽,大家都笑到收唔到聲,大食仔知道立即好失落,仲話聞到麵包香添!



2009年2月27日星期五

開心晚餐@屯門

尋晚收到明天做姊妹既纖瘦小姐既電話,佢回家將所有野襯一襯條晚裝裙,可惜件外套唔係好襯,所以佢就上網問之前看中的那件。她已和賣家約好時間和地點明天交收,當時她的聲音,又開心又雀躍。


晏晝收到纖瘦小姐既電話,已交收完,並且買埋晚裝手袋,手袋又啱佢心水又唔貴,佢簡直開心到癲,緊係喇萬事俱備,連東風都有埋,我都感受到她的喜悅。我本來都想陪佢去,但我要搽甲油,而且今晚又約左朋友吃飯。


今晚我入屯門吃飯,因為迪迪媽住屯門,佢將迪迪仔交低比隔離屋湊,放工就要湊回迪迪仔,為方便她就揀屯門。等迪迪仔吃埋晚飯回來,就外出吃飯,迪迪媽揀左附近既日本野食,等既時間我地又傾下,又講返兒時往事。


迪迪媽揀左附近一間日本料理,佢話平時見到有好多人排隊,佢未試過今日就試下,今日我地不用等位,但食物水準就好一般,朋友話下次都唔再幫襯。食飯時我地傾下下星期既聚會,迪迪媽叫我教佢整鮮忌廉蛋糕,因為見到我facebook既相覺得好靚,仲預備當晚大家一齊玩煮飯仔。


我地差不多吃完,迪迪爸來電回到家,迪迪爸近排O.T.都好晚先返,所以冇預他和我地吃飯,唯有一陣買外賣。成晚我都被迪迪來講既野笑死我,真係好開心,迪迪媽話平時係屋企,佢地兩公婆都被個囝講既野笑死,而且又多野問,小朋友緊係每事問架喇!好過唔講野丫!小朋友真係為屋企增添歡樂氣氛。


迪迪仔4歲,佢食飽飽無野做,而且佢好鍾意影相,所以就影左以下幾張相。我叫佢唔好影我,但佢係都要影,所以我就用手遮住。



奇怪果汁:係跟〝咖哩豬扒飯(自家制)〞,咁夜唔飲甜野,忘記問朋友味道如何。



醃菜係前菜都OK,而麵豉湯就係跟〝咖哩豬扒飯(自家制)〞,味道唔知,因為不想吃太多野,但我又忘記問味道得唔得添!



咖哩豬扒飯(自家制):尋日我去日本飯堂都係食〝咖哩豬〞,見到寫住〝自家製〞,所以諗住一試。見到塊豬扒仲熱辣辣,又幾厚咁,應該都OK掛,食落就如心中所想〝不及日本飯堂〞,物質帶點鞋,而咖哩都不是日式的。



雜錦天婦羅:冇乜特別。



墨魚咀:一般,又係冇乜特別。
雞軟骨:餐牌唔見有,問佢話有,一心以為係椒鹽,來到係串燒,燒得好乾。


呢幅相都係朋友個囝影架!我覺得都唔錯丫!



吞拿魚壽司:朋友不吃生野,若拿魚會靚都會吃,我就唔吃魚。朋友見到好乾,就只吃一件,咬左半件後已不吃,最後都係吐回口中半舊出來,即係一件都冇吃到。



帶子壽司:隻帶子好大隻,好似珍寶一樣~好味。
蛋壽司:賣相唔得,而味道就一般。



2009年2月26日星期四

Facial‧電髮@飲宴準備

今日真係好忙,12點約左去尖沙咀做Facial,然後要湊阿B放學,4點幾再去電髮,夜晚又約左熊貓姐姐行街食飯。


我9點幾起身個頭比尋日痛得還要利害,我諗係肩頸痛引至,跟手立即貼膏布,梳洗完都係要食粒長效先,跟住再回床抖下,十點幾拖到無可再拖起身洗頭,再煮早餐吃。


Facial一向我都冇興趣,今次係之前訂雜誌代理來電跟進一D事,佢check到我A/C有個free既facial優惠就到期,問我有冇同事聯絡過我,就算有我都可能reject左,佢介紹一下間野,又話會有醫生接見我,我見星期六去飲,所以就應承左。


我去到一開門見到好多人坐係到開會,以為去錯地方,原來佢地逢星期四早上都會與醫生開會,帶左我入房填資料,再與我講解,除此之外,我與她都傾左好多大家既私事,咁緊係可以講既事喇!


這間係醫學美容中心,我一直以為即係美容院,但原來呢到有註診醫生,可以問有關皮膚上既事,但你有傷風感冒都可以幫你睇既。


我做完Facial後,最後都係join左十次〝EGF Basic Facial Treatment 60mins〞,而且比左 Cream我,臨走時比左個袋我裝埋對拖鞋走,我見對拖鞋唔係一般酒店既拖鞋,所以就帶走埋。


老公知道我要去做Facial開始,就不停同我講不要比人厄,其實我都有推過,但做左出來效果又真係幾好,而且個女仔又幾好人,對於塊面我從沒有要求,但從今日起我要對塊面有要求,而且要好好愛錫一下。


我湊左阿B放學,再與他洗白白,約4點預備出門口時,阿B就話要去厠所,仲要係去大人厠所,自己係門口除鞋行左入去,我幫佢除片和褲,再抱佢上去,上到去又週圍郁,最後要面壁就痾左臭臭,又要幫佢做埋善後工作,真係急死我,因為我趕時間架嘛!衰仔近排每次係我出門口先痾臭臭。


我見有D肚餓,買碟炸兩去髮型屋到吃,去到髮型師剪緊,我就食野又等下,5點幾就開始卷髮,差不多卷完老公來電放工。6點幾老公與熊貓姐姐來搵我,我整到約8點就完成。


老公等緊時已經肚餓,所以立即動身去食飯,我地去左日本飯堂,食物質素比之前差,老公知我地食完要行街,所以話食完回去先,熊貓姐姐話我地行一陣啫!大家都係冇收穫回家。


之前老公話要O.T.,所以我就約熊貓姐姐去街食飯,點知今日又話唔駛,若果唔係就可以行耐D街,可以幫助消化一下,就算行街我都係Window Shopping,因為今日已用左幾千錢蚊。等車時我問老公‧‧‧


我:老公有冇嬲我丫?
老公:冇嬲,你都碌左咯!咁我咪買少D野囉!



2009年2月25日星期三

試晚裝‧搵手袋@陪朋友

今日我有兩個約會,但朝早11點個約,因為對方有事改期明天,咁我今日得一個約時間就鬆動D,應完約就要回去湊阿B放學。


今個星期六要去飲,其中一個朋友做姊妹,所以今日我就陪佢去試晚裝裙,佢順便帶埋頸飾、耳飾,幫下眼襯邊件好。


上到去好快就有得試,試完再改,改完再試,朋友比較瘦,所以都係改左一次就OK。等改裙時,又傾下計,又睇下襯飾,而且佢要幫新娘keep key和手飾,所以需要個手袋仔,但佢帶給我睇的手袋與晚裝裙不襯,所以一陣去附近商場搵下。今晚其他姊妹會來試晚裝裙,所以留下等她們一起取。


我地行晒成個商場得一間有襯晚裝既手袋,可惜款式不太合心,跟住食D野先。朋友萬事俱備,只欠個手袋仔,附近又冇呢類舖頭和商場,所以食完再折返頭先果間舖再睇。其實,果間舖我都睇中一個銀色珠片手袋仔,必要時可以買它都可以襯到,朋友聽到我的意見,就拎左來睇下、襯下,拎上手比掛起靚好多。我地係踏實人,又不用上班,只係用一次,這個價錢比較貴,最後都係冇買。


朋友沒帶鞋和外套來,新娘子來電叫朋友回去取晚裝裙,拎回家配襯一下,好讓當天完美,所以我就陪朋友再上去,朋友再試晚裝裙。頭先只係睇合唔合身、飾物襯不襯,今次被我發現裙的外紗有少許爛左,而且一邊內裡長過外紗,我沒有等改好就走了,因為我要趕回去湊阿B放學。


我湊左阿B回家就走,因為我講過幫朋友去我家附近商場睇下手袋仔,又係全個商場得一間有類似東西,今次價錢合理,但朋友不喜歡個袋型,又係冇買,朋友話自己會再搵。



2009年2月22日星期日

九巴傑出車長選舉總決賽@2009

今日老公話與尋日天氣差不多,尋日我見佢著短袖衫我又著,點知出到去真係有點凍,所以老公今日著衛衣,咁我咪又跟衫囉!點知熱到阿媽都唔識得,兩日都著錯衫,真係激死。


今日九巴舉辦〝九巴傑出車長選舉總決賽〞,由下午一時至六時,又有巴士駕駛技術比賽、各款巴士展覽、舞台表演、攤位遊戲等。尋日問左高達叔叔會去,但同屋住下午要返工,由於同屋住家與會場同屬一區,所以就約埋食早餐,夜晚就約同屋住老婆吃飯。


我地坐巴士去會場,坐到總站就係會場附近,架車好多人就坐上層最後,到站落車落落下,車突然開前再泊好些,當時真係危險,係我地前面又有幾個小朋友,佢地都係去會場,前面班人聽完我與老公既對話都笑。老公話車長應該有講,因為D人落落下車都停左,只係我地係上層聽唔到啫!


老公:佢一定唔係傑出車長。
我:緊係唔係喇!係就唔會係到渣巴士喇!


我地1點幾就到會場樓下,會場場地就係巴士廠天台頂層,要係門口等巴士上上層,然後落車行一段仔斜路上天台,沿途都有好多人,會場內更加唔駛講,老公話以前冇咁多人來。



上到去就見到有巴士,我等左好耐先冇人係前面,但我唔知巴士型號。




呢部巴士前面有個孔,個孔係插一支野落去攪先有動力開車架!










台上請現場觀眾上台玩,然後又有銀樂隊表演,銀樂隊邊演湊邊有動作架!一D都唔會悶場,老公話有〝迪士尼〞feel。



嘩~有好多人買巴士,我見買左巴士既人,手上最少有十架,老公話與出面一樣價錢,所以一樣收穫都冇。



攤位遊戲又係排長龍,所以我地又係一樣都冇玩。



警車係最新款,上年我係娘家樓下都見過呢款車,老公話係乎合歐盟既車。



電單車就係舊款。



阿B眼瞓,所以就去同屋住屋企坐下,我地去到佢剛出左門十分鐘。之前係佢屋企茶餐廳買過茶餐又抵又好食,所以男士們就落街買,讓阿B可以靜靜瞓覺。我要既豬扒薯條餐都係13蚊,仲有野飲添啵!我飲熱飲緊係不用加錢喇!塊豬扒算厚、又腍又大塊~好味。



等阿B瞓醒就帶小朋友去公園玩,玩完再去食飯。晚飯地方不太適合阿B,所以我地都係買外賣,叫餸食飯。唔知係咪飯唔好吃,阿B要加清湯腩既湯先吃。



肥仔怕唔夠食,所以自己食一個燒味飯,餸不太合同屋住兩個囡吃,所以另一order一個叉燒飯。走時約十點,所以肥仔搭的士回去,我與老公就有順風車坐。



模仿日

阿B唔肯行我為有用糖去餌誘佢行。



今朝約左同屋住食早餐,起初係娣婦餵,而且佢好似唔願吃,
我地就調同屋住兩個囡係阿B對面和旁邊,佢見到姐姐自己食,佢又自己食。




突然有個阿伯比錢阿B,佢冇講野只係望住阿B和笑,臨走仲豎起手指公添啵!



我去到會場週圍睇,所以只係影得一幅阿B既相咋!



阿B開始眼瞓,離開會場去同屋住屋企坐,夜晚一齊食飯。
阿B去到不停玩玩具,玩左一個鐘就拍佢瞓。



阿B瞓左個幾鐘就瞓,跟住我地去公園玩,3個小朋友都玩得好開心。



去完公園就去食飯,然後再回同屋住家坐多陣,
阿B見到囝囝(同屋住隻狗)好開心,見牠飲水佢又飲,囝囝都被他嚇怕。