2008年10月31日星期五

傷風‧感冒@延續

今日起身喉嚨勁痛,而鼻水都有D黃綠色。今晚老公可以來娘家吃飯,我地吃完飯老公就陪左我去睇夜診醫生。


醫生話係我之前既〝傷風、感冒〞既菌未走,跟住我就去燒野食,佢話D炭吸呢D野好勁架!所以醫院有人亂食藥,都係餵佢地食炭,不過,係〝活性炭〞,通常菌要7-10日先會走。


醫生話唔係阿B傳染我,我之前隻菌都未走,係唔可以容納到第二隻,若然真係既話,就會病得好嚴重,等我以為係阿B傳染我添!


我喉嚨冇發痰,不過,就紅得好勁,醫生開左隻勁消炎藥,仲要加埋胃藥一齊食,另一隻消炎藥就係鼻既,有5種藥全部都係丸,真係好唔駛食藥水。



之前阿媽路過馬鞍山廣場,就係〝Yves Rocher〞買左支hand cream,佢想再買,咁我上網check過家附近都冇,最近都要去到〝奧海城〞。尋晚阿媽來電話,明日等佢放工就帶埋阿B一齊去〝奧海城〞買多支hand cream。



今日行路回娘家時,由於隻腳痛,所以都係踢下踢下咁行,突然好似踢到D野,因為隻腳行緊睇唔清楚,但知道係啡色物體,心都知係乜,邊行邊低頭睇,原來係隻
〝小強〞,知道後立即跳起,我回頭望見隻〝小強〞碌左幾碌,6腳朝天翻轉左,我有一刻諗過去救佢,但實在害怕,都係走人。好在我腳痛咋!如果係一步步行佢就死左喇!


阿B成3點先瞓晏覺,阿媽4點幾放工回來,我就摷醒阿B去,落車立即去麵包舖買〝麻糬波波〞比阿B吃,怕佢肚餓。



我怕阿B係間舖到搗亂,所以在外等候,但阿B有時又入間舖到走,叫都叫唔停,我唯有抱起佢。阿媽本來只係買hand cream,但買買下買到差百幾蚊就入得會,我叫阿媽揀埋入會喇!因為而家有2個印花,出前1月前儲多2個可以入會,買野都85折,我又唔護理~唔啱我,所以都係付款走人。


出到去阿媽心大心細,我都係果句喇!差百幾蚊,唔係就要儲多2個印,咁阿媽就入去再睇,最後阿媽揀多支定型水,而我就揀左支〝Mask〞(紫色果支),但支〝Mask〞得50ml咁細支要65蚊,下次我一定唔會再買。



買左咁多野,當然有贈品喇!但個袋覺得唔多實用。



買完野又要趕回家,因為我要煮餸。阿媽話我上次炒茄子好味,所以又買左比我炒,雖然,今次阿媽話好食,但冇上次咁好,佢話上次香D,娣婦就話一樣都咁好吃,我要炒到好味為止先出食譜。


平時我碗飯係一碗,仲要係實實地,頭先我將佢減去1/3,阿媽問我點解食咁少野,我一直都冇回應,最後我講左句〝有人話我肥丫嘛!〞,之後阿媽就冇再問。



墊高

這個動作阿B之前都有做,只不過我係影唔到,今次我影到喇!
佢以為用舊咁細既玩具可以墊高D拎到佢想要既野,真係天真嘞!
佢企晒2隻腳上去,跟住再登高腳去拎野,緊係拎唔到喇!



今日阿B睇埋史迪仔,成3點先瞓晏覺,跟住4點幾被我摷醒出街。
今次係陪阿嫲去買野,阿B去到間舖係到喪跑,禁都禁唔住。



嗚~嗚~嗚~我好眼瞓丫!



回程時又唔知做乜~抬住個頭。



2008年10月30日星期四

一句〝得〞埋嚟~

星期一,開始有D喉箇,尋日開始個鼻又開始好乾,好似發痰既跡象,今朝個鼻比尋日嚴重左。老公刷洗完就同佢講〝我個鼻好似又開始發痰喇!〞,點知一句關心或慰問都冇,佢用不耐煩語氣,一句〝得〞埋嚟!話〝我都就死喇!〞,之後同佢爭嗌左一陣,佢既語氣和態度都係好差,所以今日我冇等佢出門口就走。


今朝6點半起身book羽毛球場,今次book到,但我想book2000-2100,一入到去已full,唯有book1800-1900,打咁早老公實來唔到,我已通知左阿嫂和熊貓姐姐。


今朝我要帶阿B去睇醫生,所以就約熊貓姐姐食lunch。熊貓姐姐一見到阿B,就話佢瘦左,緊係喇!病左冇胃口食野,2晚唔肯食飯喇!我下次應該都唔會帶埋阿B去,因為連Pingu差D都降服唔到佢,熊貓姐姐都話佢曳左。


F先生與太太剛去〝桂林〞回來,比左D野食我地,有老公最喜歡的林柿,所以我都拎D比佢吃。



阿婆和阿媽知到我係娘家吃晚飯,就會一早問我煮咩餸。今朝已叫阿婆浸冬菇,買豬肉,等我回來切粒,然後傍晚時份,落〝惠康〞買甜豆,預備煮甜豆欖菜炒豬菇粒。尋晚阿公話茄汁豬扒少番茄,所以我再加多個番茄翻煮,當然又係打包回去比老公吃。


老公間中都有打來道歉,佢話晨早個人掹D,而且個人又好攰,但我都冇理佢,我都係想嗲下佢,想有人氹下啫!估唔到會聽到句咁既野,所以我當時都好hurt架!



氣管‧鼻發痰@覆診

今朝十點幾我帶左阿B去覆診,醫生話盡量少去人多地方,
但唔係叫唔好出街,係少去為妙啫!阿B只要做到以下4點就可以快D好:-




  • 戒凍、甜、蝦、蟹和蛋黃。


  • 留意附近有冇人傷風感冒。


  • 盡量去少人既地方。


  • 留意冷氣地方。


阿B要搭巴士,落到去剛剛送車尾,被太陽曬住阿B都唔肯行開。



上到車又成日手指指又講野。



回程時阿B眼瞓,所以都係搭的士好D。



呢部電腦仔就係今年我與老公送比阿B既生日禮物,仲有隻mouse,好Pro架!。
夜晚食飯前阿B又要拎來玩,但係成日都剩係禁〝On、Off〞,
我話可以彈琴架!佢就立即係到琴,大家都比佢笑死。



2008年10月29日星期三

執屋

上星期六,肥仔公司請晒所有員工去〝香港迪士尼~黑色世界〞。尋日肥仔比左個米奇牌我,佢話係阿B係酒店做的,到夜晚娣婦比左D入場卷和貼紙我,唔知入場卷有幾多款呢?我而家有米奇、米尼、高飛、唐老鴨。



前排係娘家時間少左,順利成章我好耐冇係娘家執屋,所以有好多野都好亂。今日晏晝等阿B瞓左,我見有時間就執下自己既信、雜誌,然後就執下阿B既衫,實在太亂,因為娣婦要返工時間都不多,就由我代勞。


今朝阿媽買左豬扒和番茄,預備我今晚煮茄汁豬扒,肥仔都話好吃。老公要O.T.,所以我就帶飯回去比佢。阿公不停叫我夾多D餸、帶湯和帶飯,又叫我到時翻熱比老公吃,呢個係保暖壺,仲要係Theamos邊駛翻熱啫!



留心閱讀

阿B已有一段時間係屋企唔著片,到咁上下就叫佢去〝殊殊〞,
有時仲會去埋〝便便〞添!若然戒左片,出街又可以帶少D野喇!


阿B瞓醒晏覺,我執緊雜誌,我見佢行來行來都唔知自己想點,
我就問佢睇唔睇書嘞!佢點頭,跟住坐低睇,阿B每次睇書都好留心架!
不過,每次我都會話佢〝瞎字都唔識多隻。〞







2008年10月28日星期二

成日攪錯

今朝7點幾娣婦來電,佢與阿B今日會放假,晏D會帶阿B去睇醫生,而且叫我不用太早上去,因為醫生冇咁早開。


我煮左個早餐吃,然後約9點就行路回娘家,我返到去見到肥仔係到,因為肥仔請假,所以娣紗返工,咁又係娣婦冇晒假要扣錢。


我覺得老公與肥仔電話號碼好相似,而肥阿哥與娣婦個電話號碼又好相似,所以我成日都打錯電話,今日又係我有事要搵娣婦就打左比肥阿哥,有事搵肥阿哥又打左比娣婦,其實,佢地電話實際唔係好似,我硬係成日都攪錯。


阿B睇完醫生,肥仔話肚餓,所以11點幾就去左食晏。食完晏就去〝吉之島〞行下,我買左塊燒烤網,我諗住用佢當做放涼架!用緊既細得滯,行左1小時就回家。



之前我知今晚係娘家吃,因為老公約左老爺吃飯,我諗住煮蘿蔔炆牛仔腩@柱侯醬,但肥仔又話唔想食牛腩。今朝問我煮咩餸?我話一陣買豬扒煮茄汁豬扒,肥仔又話唔洗買,煎午餐肉煮〝番茄午餐肉〞咪得囉!


阿媽買左茄子,但佢切到大大舊放係飯面蒸熟,但飯熟左佢都未熟,我就邊煮〝番茄午餐肉〞,而另一邊爐用平底鑊炒茄子,但太大舊,我將佢再剪開一半先炒到,吃過都話好味,我係第一次煮茄子,估唔到咁成功,但由於出於特發,邊煮邊諗,所以冇食譜,下次有機會再煮先寫食譜。


我煮餸係戴另一副眼鏡,因為成日都有油彈到,但係今日係娘家走時,忘記左換返副出街眼鏡,返到屋企先知,成日都咁〝烏龍〞既。



氣管發痰@傳染

尋日朝我8點幾返到去阿B都未起身,平時佢7點幾就起身,又聽到佢鼻塞塞地。
阿B放學跑跑下咳~好正常,不過,我聽到有痰,回到家開奶食完第一轉時想嘔,
然後洗白白時聽到佢用口呼吸,到著衫時好似有D鼻水。
阿B瞓醒晏覺,等娣婦回來時餵保嬰丹阿B吃,吃左2啖就嘔回晏晝學校吃的東西。


今朝收到娣婦電話,阿B身體不適放假一天,
晏D去睇醫生,叫左醫生寫左今、明兩日假,
返到屋企阿媽話呢個星期都唔好返學,因為佢知道阿B今次病係被傳染的。


醫生話阿B嘔,係因為食物消化唔到,叫我地唔好比咁多野佢吃,
而且小朋友係唔駛食咁多野既。鼻和痰,係因為氣管發痰,佢既鼻水係綠色,
這是傳染得來,要食藥食到綠、黃鼻水和痰都變白色先叫好,
食完藥都未好就要覆診。



今朝見阿B拎隻小丸子,然後不停拍佢個頭,於是我又拎嚟玩下,
原來按低前面綠色棵野,然後按個頭就會升起。我以為按一下先升少少,
咁我咪不停按囉!點知肥仔見到話按一下就得架喇!真係瘀~



肥仔叫阿B慫膊,衰豬真係又照做啵!



肥仔買左〝珮夫人鼻爽貼〞等阿B夜晚瞓得舒服D。



晏晝食飯,衰仔要睇住Pingu先乖D。



衰仔成日係到偷笑。



我地行〝吉之島〞,阿B又有收穫,見到匙羹、叉就唔放手,肥仔買左3件衫比佢。



2008年10月27日星期一

一般味道@風月堂

尋晚嘔完,再係床捱埋睇完我喜歡的〝神探加利略〞,不知不覺間睡著了,今朝起身就沒事。


今日老公會與老爺食飯,阿B又要返〝協康會〞,順理成章我就與肥仔和娣婦出街食。


上星期六晚,老公話好耐冇見過阿B,我計一計應該有2星期。晏晝老公來電,佢話明天先搵老爺食飯,今晚與我地一齊食,佢目的都係想見下阿B啫!換轉係我唔知佢會唔會又係咁掛呢?


阿B係〝協康會〞放學,我就與娣婦帶埋阿B去與肥仔會合,我地行住等老公。大家一直都諗係邊到吃,肥仔唔鍾意去Pizza Hut,我與老公都唔喜歡去和民,因為又貴、份量又少,又唔係太好吃,元氣阿B冇野食得,仲有Spaghetti House。


老公來到阿B唔肯比佢抱,肥仔立即話〝丈丈為你而來架!〞,都係唔肯。肥仔將晚餐吃乜個波交左比老公,肥仔講出選擇,老公在云云當中都係選擇Pizza Hut,不過,老公都唔係太喜歡吃的。後來我提出〝風月堂〞,但呢間好貴,味道都OK,娣婦食過話唔好吃,肥仔話去攞位,我話唔係太多人的,餐廳內如我所料客人不多。



我地睇睇下Menu發現,原來有兒童餐Menu架!不過,好貴囉!成七十蚊一個餐,包埋甜品,如想有飲品,仲要加三十五蚊,夾埋成舊水一個餐,但阿B唔舒服,所以只係order左個餐。阿B唔多喜歡吃,娣婦試過D飯硬。



兒童餐有一份小禮物,樣樣都唔多啱心水,所以揀左支筆。



我地order左每人一個飯(獨享),仲order左小吃,味道樣樣都一般,老公話早知去
日之食堂,而且話呢到絕無下次。


薯蓉帶子蝦~沒什特別。



煙肉焗青蠔~味道淡,肥仔唔吃,我地每人2隻,娣婦吃左一隻就唔食。



辣肉薄餅~餅底香脆,味道都可以,但肥仔唔吃得辣,食左啖就唔吃。



咖哩豬扒飯 (老公) ~ 塊豬扒好味,但飯硬,老公吃到胃痛。



蛋包飯 (肥仔) ~ 係肥仔最愛吃的,呢個蛋包飯都唔係蛋包住飯,只係飯上面加炒蛋,再加餸,雖然如此,肥仔依然覺得好吃。



鰻魚石頭鍋飯 (娣婦) ~ 味道都OK,比之前好吃。



牛肉石頭鍋飯 (我) ~ 日式飯估唔到有泡菜,味道都係冇咩特別。



藍莓乳酪~肥仔order,唔好飲。
綠茶~老公喜歡吃果舊雪糕,仲話〝嗱~呢D先係綠茶雪糕。〞,跟手就比我試,我覺奶味重,綠茶味輕,茶覺得唔好飲。



最後我與肥仔都order左甜品,肥仔吃〝朱古力香蕉雪糕〞,冇問好唔好吃;而我吃〝士多啤梨杯〞又係冇乜特別,但我食左半杯,因為太多cream。


這餐水準比之前差左,呢餐又貴又唔好吃,每款都要四、五十蚊以上,我食完呢餐返去就要喪跳,唔係就肥死。



2008年10月26日星期日

暢談@泥涌〝巴比橋〞

今日約十點半到沙田〝百佳〞集合,去〝泥涌~巴比橋〞,係為九月和十月朋友生日而攪既,咁當然我都係主角之一喇!


我起身右邊肩頸和頭痛到唔識形容,想搽冬青膏又怕陣味比人聞到肉酸,想食長效又忘記左。


今朝9點幾門鐘響,原來係樓上跌左張棉被係我地窗外,老公就執返比佢。老公話頭先8點見到窗外有好大黑影下墮(冇開窗簾),佢話仲以為有人跳樓,後來見到有個角慢慢向下跌,就知唔係,我話你又唔開窗睇下。


我地出門口,咁早集合緊係各自吃早餐喇!我買左個包係巴士上吃,老公起身不久係吃不下東西的。


我地去到〝百佳〞,有些朋友已經買緊東西,而有些拎左炭入左去霸爐,亦有些自己入燒烤場等。買左3大購物車既野,付款後有朋友check單,這是例行動作,不過,上次上左車先check單,發現我地買既魚蛋三十幾蚊,居然收左我地三百幾蚊,朋友立即落車追討,然後係燒烤場等佢來,所以今次立即check單,果然又多收我地一包丸既錢,都成三十幾蚊,就冇上次咁誇。



朋友約我下個月去睇〝流星雨〞,但老公唔知請唔請到假,因為去2日,希望今次可以睇到喇!因為我失望過2次。今次會露營,我好耐都冇露營,老公未試過架(佢好想)!個個朋友都話我肥左,有D仲以為我有左,我已經努力去減,但今日一役,再要加倍努力。


我成日都覺得隻手指好痛,望下又冇野,同朋友傾傾下,唔覺意碰到隻手指,就覺得有野拮住,再認真睇下,原來手指面個交位上〝參次〞,週圍都紅晒,老公話〝你咁都〝參〞到既?〞,我問朋友借左眉鉗,唔係我都唔知點算。


我想整個蛋糕,但我怕拎麻煩,所以冇整,好在咁諗,因為有朋友係〝美心〞買左個〝蛋白天使蛋糕〞,蛋糕好鬆軟,灑面的焦糖都好好味。



呢隻〝麒麟啤〞係限定版,燒野食都不外乎果幾樣,所以有好多都冇影到,條粟米我燒架!今次都吃剩好多野,我地冇浪費,不論用的或吃的都已一一分庄帶走。



青魚~我不吃魚,但朋友燒完來叫我試,我問左有冇骨?腥唔腥?之後就試左,我都叫左老公試,真係好味。



三文魚骨~我見有好多油,燒既時候不停有油滴,我諗好味,因為佢地燒完又燒。



雞軟骨~本身係串好,不過係未熟的。朋友上次自己串完就買現成串好的,味道不錯,燒既時間要快手,不停轉,因為好易燒焦。



我地燒到6點幾就離開,大家齊齊坐巴士回沙田,頭先傾得太開心忘記左去影下風景,又分散注意肩頸都冇咁痛,不過,散隊後又痛番,而野食都未消化到,成日都有胃氣。


回到家簡極痛到想嘔,又有D想痾,成個人都冇心機,想立即去眠,但有好多野未做,要去洗白白、又要寫埋尋日既Blog、夜D又要煮麵吃,我叫左老公食完幫我洗碗,我8點幾突然好肚餓。


老公:你咁突然既,頭先話好飽架!
我:係丫~而家餓到想嘔,但又好滯喎!


講完我就去煮麵,但得返一個麵,所以煮完麵比老公,我就煮烏冬比自己吃,吃完寫埋尋日既Blog就係床抖下,仲覺肚餓就吃多個火龍果(小),但吃完一陣就嘔,仲嘔左2次。