2008年9月30日星期二

我也是〝破壞王〞

今朝對面鄰居F先生問我〝為何這幾日不見我?〞,然後就拎左2隻蝴蝶餅比我,佢話得一間有得買,佢係搵人訂先有,呢款餅好幼細,而且係用燕麥做。F先生話出去學整酥皮既時候係要摺九十幾摺,吓~摺咁多,我只係用3摺法摺3次,跟住書做的。



尋晚收到細舅母來電今日唔來,咁我食埋晏12點幾就帶埋阿B去〝朗豪坊~Nikon維修部〞整相機,然後再帶阿B去〝協康會〞上堂。


我真係一個〝破壞王〞,用咩壞咩,人人都係咁講架!上星期已拎左Notebook和手提電話去維修,但我自問都好愛錫我既野,一對鞋和一隻錶我都可以著或帶十幾年架!咁當然我唔止一對鞋或一隻錶喇!新電話壞左,而家用緊舊電話,呢個舊電話我都用左3、4年都未壞,但老公遲過我買既舊電話壞壞地,所以老公要我與他一齊用情侶電話。


朗豪坊辦公大樓既電梯好先進,係每條電梯通道前就會有制按你想去既樓層,然後跟Display去所顯示既電梯號碼等就可以,電梯內又係冇樓層按,只係得開、關和驚鐘。


Nikon維修部又係冇人,以前所有維修部都有好多人,要輪候好耐,但而家一取飛就可以到櫃檯,部相機個鏡頭有問題,要等1至2星期先有得拎,部Notebook又係要等咁耐,但電話1日就整好,我等埋Notebook先一次過拎。


我見時間尚早就係朗豪坊遊蕩下,之後就坐巴士去〝新都會〞行下,阿B係途中瞓左,但瞓約15分鐘就要落車。我想阿B可能會肚餓,所以去左〝A-1〞買蛋糕佢吃,我自己都買左粒芝士麻糬波波吃,我要記住個口感和味下次整就知點改。


我等埋阿媽一齊帶阿B去〝協康會〞上堂,上完堂就坐小巴落返去,然後阿媽與阿B就再轉小巴回家,我就去街市買餸。


今朝問老公吃乜餸?佢就發老脾話成日都問佢,咁我日日早煮都諗唔到咁多架!真係谷鬼氣。頭先又冇時間諗,唯有邊行邊諗,去下〝百佳〞睇下先,諗到買左罐粟米湯,其他就去街市買抵D。


我去到街市又冇菜心,就買紹菜,跟住就買排骨煮簡易糖醋排骨,再買少少瘦肉切成丁粒放入湯內,咁就完成一餐喇!老公唔多喜歡簡易糖醋排骨,因為佢唔食酸野,少少酸都唔鍾意,不過,都一齊食晒一碟。


明天有3件重要事做,第一件就係要去幫老公舖地板,第2和第3件明天再講。



簡易糖醋排骨 (內附食譜)

這款〝簡易糖醋排骨〞係一個鄰居教阿媽煮架!不過,個鄰居係一次打刧中不幸離去,每次見到這味我都會諗起佢。


話左係簡易就真係好易,只要你記住〝1、2、3、4、5〞就可以,咩〝1、2、3、4、5〞?就係〝1~酒、2~醋、3~糖、4~豉油、5~水〞全都要用湯匙做單位,個汁撈飯都唔錯架!



簡易糖醋排骨


材料:(2人份)


排骨                   227 (15元)


蒜頭                   2


                       1


醃料:


豉油                   適量


                       適量


胡椒粉               適量


麻油                   適量


汁料:


米酒                   1湯匙


白醋                   2湯匙


                       3湯匙


豉油                   4湯匙


                       5湯匙


做法:

1.          將排骨洗淨隔去水份。


2.          用醃料將排骨醃一陣。


3.          爆香蒜頭和薑,再加入排骨爆一陣。


4.          之後加入汁料兜勻,再蓋上鑊蓋。


5.          滾後收至中小火將汁收至你想濃度,即成。


貼士:


l        蓋鑊蓋後間中兜下,以免黏底。


l        汁放涼後就會稠濃,所以煮汁時要留意喇!



言語治療~第一堂@協康會

今日正式第一堂上〝言語治療〞,阿B入到課室未開始已經要玩玩具,
起初都唔肯拍手,玩耐左就肯。


上堂係一小時,阿B專注力不夠,又不太願意坐係同一個地方太耐,
再加上我地提到〝奶嘴〞就開始扭計,所以都係上左半小時就放學。


〝言語治療師〞比左一D練習,亦都教左我幫阿B做〝口肌按摩〞,
這按摩係要早、晚做,中段時間都做下,每次要做30下,下次再教另一樣。



今朝阿B望住櫃內自己既倒影係到玩。



睇〝史力加〞睇到〝依牙鬆Kong〞。



笑得幾燦爛~



阿B陪咕媽去整相機。



朗豪坊


去到維修部,咕媽讓左張櫈比我坐丫~



咕媽放低左部相機就帶我去行街街~



新都會


咕媽又帶左我另一個地方,仲請我食野添啵!好味~



2008年9月29日星期一

老公出主意@晚餐

尋晚打完馬吊緊在太攰,而肩頸和頭又痛,回到家就立即覺豬,起身先洗白白。


今日阿媽湊阿B返學,我負責湊放學,所以今日可以晏D起身。今朝老公出奇地一叫就起身,我再訓多1小時就起身。尋日老爺睇到張床,今日老公放工後就去睇下張床。


阿媽十點幾來電話阿B今日冇返學,可能尋晚半夜冷到咳得好勁,咁我就索性今日唔湊阿B喇!咁出去幫老爺舖地板,同埋我明天帶細舅父和舅母再去多次樂富,若果明天阿B冇事我就會帶埋佢去,因為我要拎相機去修埋怕趕唔切4點帶阿B去〝協康會〞上堂,但阿媽唔準,因為阿B冇得訓覺,佢話佢4點帶阿B去〝協康會〞等我,我唔理咁多與娣婦講聲先,娣婦冇問題,但佢既傷風好似嚴重左。


我與老公講一陣去幫老爺舖地板,老公反對,因為今日唔夠時間舖,起碼要用一日時間,咁算喇!還掂都預左星期三假期一齊舖,不過,我肩頸仲痛今晚我唔出去。


今晚老爺去朋友家中吃飯,咁我問老公煮唔煮飯?煮咩餸?上次菜心OK?老公order煮洋蔥豬扒,菜心都OK。我約3點落街買野食,再去街市買餸,菜心已售罄,轉買通菜,又買野煲排骨番茄薯仔湯,再去買2塊豬扒,又去左買一個水晶梨,老公唔吃生果,但吃水晶梨。我醃豬扒時冇用蛋白,得果2塊費時嘥左隻蛋(近排唔得閒整餅),但我加左2片薑,因為曾經有人教我用薑放係豬扒面,再醃過夜就會淋,但我忘記要唔要加蒜頭,係廚師教佢。


老公9點鬆D先返到,床已訂還欠地板就可以搬喇!所以食完飯都成十點。


老公:D菜冇味。
我:唔係丫~唔鹹仲有D甜甜地。
老公:菜要用糖炒既咩?
我:菜要用糖和鹽炒,你緊係唔知喇!



食完飯隔左陣就食水晶梨,隻水晶梨又大又甜又多水,6蚊隻就貴左D,但都值既。



今餐餸連湯都係用左30蚊,加多個6蚊水晶梨,一共36蚊~真係平過出街吃。我一直以為物價高漲煮一餐好貴,自從上星期四Book場記@羽毛球 (下集)開始煮第一餐就有所改觀,果餐2餸一湯白飯任裝,都係用左約35蚊,不過,番茄和薯仔就係家中取的;而第二日唉!你又肥左~都係2餸一湯,今次就要50蚊,因為煲湯,而唔係滾湯,雖然,貴D都好過食街外野,仲有足料靚湯啵!


2008年9月28日星期日

Mickey戰衣

28 September 2008


今朝收到個電話約今日打馬吊,我想著上次係酷熱@香港迪士尼新買既米奇汗衫,著左又好似唔多好睇,又想著返黑色汗衫,但老公話米奇好睇,係我不斷重覆問題疲勞轟炸後,佢都係話黑色好睇,但佢又話衫米奇紅色〝旺〞,咁又係我地成日都輸,咁好喇!〝旺一旺〞佢先,就係因為佢,今日我地就可以做大贏家。


老公尋日係〝九巴顧客服務中心〞睇到利蘭奧林比安11米丹拿珍寶 BACo想買入去睇下又未開舖,老公今日個心又15、16想買,我話我今個月唔買野,然後又慫恿佢去買,買完先去打馬吊。


On the way老公接到高達叔叔來電唔知醒,所以要遲D,到達後熊貓姐姐話不用等開心果姐姐食早餐。我、老公和熊貓姐姐就去搵定位等高達叔叔,平時食開果間唔知係執左定係領會裝修完重開,總之而家冇左喇!


我地就去左另一間,嘩~呢間野好多人,員工人手不足,收銀做埋跟單、訂位(晚飯)、傳菜、攞位比飛仔、睇下有冇空位,見佢有時行過有人招手又行去落單,但其他員工都忙到氹氹轉。我都好欣賞佢既服務態度,但佢連自己崗位都未做好,佢原本比左一張半圓檯已坐左2邦人的檯我地,但我地話唔想搭檯拒絕左,之後繼續等喇!


之後又安排左我地去張大圓檯,但又係要搭檯,佢都唔明我地意思,冇耐搭檯的人走了,高達叔叔又到了。我地見到有張買人檯就遷移左過去,然後又食左4人都覺得不好的早餐。早餐未食完開心果姐姐來電就到,相約係〝百佳〞等,買完飲品就去熊貓姐姐家。係商場內擺左好多零食booth,開心果姐姐又買左龍鬚糖和雞仔餅大家一齊吃。


我與老公輪流每人打4圈,我地食完晚飯又打多4圈,今日足足打左16圈,我與老公做左大贏家,有時聽老公都係好既。


我不在麻雀檯時就服務下人群,呢D通常就係凸腳既工作,有時又睇下佢地打麻雀,我發現佢地好多時都會做D假動作來〝虛張聲勢〞和〝故弄緣虛〞,雖然,我有多年打馬吊經驗,但始終都不精,咔~咔~今次我學到野喇!


我有時又會影下熊貓姐姐的貓貓,好難先影到佢地相架!


這是阿囡,不過,年時已高。




這隻係細B,亦都是女生。細B比起阿囡仲難影,因為佢始終係新成員,少見我地,以前我地係常客,差不多每星期日都會來打馬吊,現在冇這支歌仔唱,因為各有各忙。




晚餐例牌叫外賣,5個人4個餸剛好,最好食就係〝椒鹽骨〞,好食既野份量當然就少D架喇!若然多一、二件就perfect嘞!


食完飯到老公打,我就坐係一旁邊睇電視和麻雀,阿囡會間中望住人示意抱佢,之前都有幫佢按摩,但我著住黑色褲,不能抱佢,突然阿囡趁我不留神出手又出抓跳上我到,嚇得我大叫,摺起褲管有2個傷痕,我諗我都嚇親佢,阿囡真係唔好意思。



佢地兩隻野又係到玩,追追逐逐,有時佢地都好攪笑架!



丹拿珍寶 BACo

28 September 2008


今日老公買左利蘭奧林比安11米,而家九巴購物滿$288,憑當日發票即可以以150蚊換購〝丹拿A型傳統式車嘴〞和〝丹拿珍寶 BACo〞,激賞期至到30/9/2008。


店員話可以以300蚊換晒2架,但老公只係換左一架〝丹拿珍寶 BACo〞,因為上次係80M攪既第十四屆~巴士歷史模型展覽已買左〝丹拿A型傳統式車嘴〞,老公話蝕左,上次買貴過今次少少。



丹拿珍寶 BACo~Daimler FLEETLINE BACo


九龍巴士(一九三三)有限公司(九巴)於一九七六至七九年間引進150部配有BACo車身的丹拿珍寶巴士。裝配BACo車身的丹拿珍寶巴士擁有四四方方的車身設計及紅色的車身色彩,故被稱為『紅燈籠珍寶』。於1972年,九巴實施『一人控制』模式,以錢箱收取輔弊代替售票,當時為方便乘客辨認巴士是『一人控制』收費模式,在巴士車頭及車尾貼上了『錢箱』形狀的入錢標誌。配有BACo車身的丹拿珍寶巴士早期主力行走九龍東路線如5、5C、13及40。





利蘭奧林比安11米

28 September 2008


尋日係〝九巴顧客服務中心〞發現出左架巴士,而且現在購物滿$288就可以加$150換一架指定巴士,指定巴士有2款,其中一款老公已擁有,但當時〝九巴顧客服務中心〞未開。


今日我與老公應約前再去〝九巴顧客服務中心〞,老公就買左全球發行1800部既
〝81號~利蘭奧林比安11米〞巴士,仲有加150蚊換左一架丹拿珍寶 BACo



利蘭奧林比安11米~Levland Olympian 11M


九龍巴士(一九三三)有限公司(九巴)一九八六至九四年間引進超過四百部『利蘭奧林比安』十一米巴士。『利蘭奧林比安』十一米巴士載客量高達一百四十人,當時被調派行走九龍及新界各區客量要求高的路線如1A、27、81、81C及87D等。




2008年9月27日星期六

和花亭@晚餐

今日要拎 Acer Notebook(鰂魚涌)和Samsung手提電話(銅鑼灣)去維修部,然後又要去搵老爺搵佢新屋既野!但Notebook辦公時間去到中午一點。


今早我地9點幾吃完早餐,然後巴士轉巴士去目的地,途中見到有好多白鴿,其中一隻應該係賽鴿,因為老公話佢有個牌。


我想講一講提外話,係關於老公既,老公小時候養左隻乳鴿個幾月,老爺就宰左嚟食,自此老公就唔食乳鴿。



我地到左Acer維修部,坐左一陣就到我,我以為內置card reader有問題係小事,可以即刻拎走,點知只係開機睇一睇,都冇check過個card reader就又要留院,因為檯檯既職員唔係維修員。落到樓下見到有間〝咀香園餅家〞,點解香港會有既?


老公:咀香園係咪係澳門?
我:咀香園、咀香園,買手信、買手信,款式至多至好味,高高興興買手信,嚟咀香園包你一定歡喜。(我立即唱)
我:乜你冇聽過咩?呢首係宣傳澳門旅遊架喎!


老公聽完冷笑左一下,呢間野有人專登揸車來買野,我話想食杏仁餅,老公話下次先買,今日有好多地方要去,上左叮叮冇耐又見到另一間〝咀香園餅家〞。



下一站就係Samsung,老公上到叮叮就打電話比同屋住,因為目的地與同屋住公司相近,老公約佢食lunch。


Samsung一出電梯就見到一對手,果到比起相像中少人,我地去到拎籌就立即見職員,放低部機、講左幾句,再拎埋張單就走得。



之後我地去搵野食,見到〝太平館〞對面個舖位裝修緊,但用不同種類風扇黏係圍板上~好得意,現場比相感覺得意D。



搵唔到食乜,約左係某一個地方等先,我與老公每人望一邊,突然同屋住係我面前行過來都唔知,仲嚇左我一跳添!因為佢嚇我吖嘛!


同屋住帶左我地去間茶餐廳食,呢到咖哩、香茅豬扒和海南雞飯最出名。同屋住食出前一丁餐蛋公仔麵,老公吃左好鹹既香茅豬扒~唔掂,但我既咖哩牛腩飯就唔錯啵!今餐要多謝同屋住,因為今餐佢做老闆。



再向下一站出發,搭巴士到達目的地,但老爺未到就係商場搵下有冇家品和電器舖頭,見到〝日本城〞入去睇下,但我被烹飪書吸引,就叫老公自己去睇,最後買左2本,之前都有諗過買,咁薄要38蚊唔化算,而家平十蚊,咁我就帶埋佢地回家去。



今早老爺已舖平左地下少少,執過下間屋,之前老爺已幫間屋度尺,但老公唔放心,又要度多次,因為佢話佢專業喎!(佢做過傢俬舖)。老公與老爺又換下燈罩、燈膽、門鎖,我緊係從旁協助喇!


之後又約埋高達叔叔一齊去搵膠地板舖地下,之前都問過肥阿哥邊樹有得買,但怕出到去已關門,所以近近地搵下先。


行左2間舖已搵到,但態度唔優做咁又貴,所以out左,繼續搵多幾間,最後搵到一間平少少,仲加多40蚊送到樓下,攪掂後又去睇下床,都唔啱心水,高達叔叔就要回家幫手落閘,一陣食飯再電聯。


我地再去睇下電器,可以睇既地方都睇過,老爺個樣好攰,又冇謂口,所以佢自己回去煲粥吃。老公攰就通知高達叔叔回去唔吃飯,去到巴士站附近老公就提意去〝和花亭〞吃,緊係好喇!好耐冇去過喇!


初初開人唔多,而家成日都要等好耐,所以都冇機會食。咁耐冇食,水準都冇跌到,炸蠔壽司~隻炸蠔好味、特大牡丹蝦又新鮮、燒牛肉壽司又香噴噴,不過,赤貝壽司就細件左。



記得係〝和花亭〞吃過〝山葵八爪魚壽司〞和〝煙鴨胸壽司〞冇耐,其他壽司舖都跟風,但始終都冇〝和花亭〞好吃,仲有〝和花亭〞既壽司飯係由人做手握做,唔係機整架!而且壽司飯好好味添啵!



我諗部相機遲D都要拎去整,因為一開機鏡頭自動郁又蒙,要關機再開機先得,但有時要開關幾次,被肥阿哥知道又話我係〝破壞王〞喇!不過,我影左咁多相,用得比較頻密,都差唔多喇!


點心@好味系列


書名:點心 Delicious Dim Sum~好味系列


編著:陳友記


出版社:萬里機構‧飲食天地出版社出版


售價:HK$38-


食點心


點心是廣東人情有獨鍾的食物之一。在繁忙的日常生活裏,它既是正餐也可以作為茶點類或宵夜。其最獨特之處是色、香、味、型俱佳,款式新穎,口味多樣化,使人們往往百吃不厭,回味無窮。


點心具有獨特的地方色彩,由南方的「娥姐粉果」至北方的「蝦肉窩貼」,本屬相類的食物卻富有其自身特點,粉果晶瑩剔透,皮薄煙靭,餡料精細;窩貼底部香脆,皮略厚而味鮮濃,兩者皆秉承了南、北兩地的傳統風味,只是包捏的技藝不同罷。點心的種類可謂多元化,也是飲食藝術的主流之一,只是工序比較費時一點。坊間教授點心時,步驟極其繁瑣,總會令人難於掌握箇中技巧,加上忙碌的現代人花不起時間,但是人希望自做點心。因此,作者利用簡易食材,簡化處理及烹飪方法,使人們也能依書在家烹調。


此書詳細介紹了42款特選點心,如傳統的灌湯包、蘿蔔油池、薄荷玉粉糕、冬角;富有特色的狗仔粥及蝦多士等等。內文淺顯易懂,由淺至深,循序漸進。讓您輕易掌握點心的要訣,說明詳細,只要加點心思及創意,便可造出美味萬分的點心了。


糖水@好味系列


書名:糖水 Sweet Soup~好味系列


編著:王詩薇


出版社:萬里機構‧飲食天地出版社出版


售價:HK$38-


食糖水


中國飲佞之道講求養生滋潤,飯後來一客甜品或甜湯有使人鬆弛神經的效用,加上糖份是人體能量的來源,又可以滋潤五臟六腑,使皮膚和容顏油潤光亮,吃罷更使人身心暢快滿足,精力充沛,特別是在人們情緒低落時,吃點甜食,能讓情緒回復穩定。不過,凡事皆有利有弊,過份吸取糖份會轉化成脂肪,積聚在身體內,令人發胖並影響健康,所以奉勸大家必須採取中庸之道,適可而止地品嚐糖水,水可過量,否則會讓身體受損。


香港人在秋夏特別愛吃糖水,愛其品種繁多,味道清新而變化萬千,別利用了數個常吃糖水作基本,再搭配不同豆類、穀物和水果等材料來創新食味款式。而且,不同季節對糖水的品種也有不同的要求,例如夏天的糖水側重於水果口味而配有西米、清心丸、阿峇子或海底椰等,增加口感;秋天則會愛吃以五穀、番薯、湯丸和豆類等食材為主的糖水,讓人有點飽肚感覺。近年來,香港人愛經營糖水店或甜品店,所以糖水亦是一個新飲食潮流,而港式的糖水店或甜品店,多會把中、西、東南亞甜品一同搭配出售,令食客感受不一般的糖水,書中便精選了四十多款糖水,給讀者們在家製作或為經營甜品店者提供參考。最後,我要衷心多謝馮華清女士、郭美寶女士和黃盈瑩女士在拍攝期間給予幫忙,才能完成此書。


2008年9月26日星期五

唉!你又肥左~

今日我、阿公、阿婆和細舅母帶埋阿B去〝樂富~房署〞,因為我要幫細舅母攪D野,咪帶埋阿B去曬下太陽囉!仲約埋表姐係果到等。去到表姐第一句就話‧‧‧


表姐:唉~你好似肥左?
我:係丫~肥左十幾磅。
表姐:點解咁架?
我:因為晚晚九、十點先食飯,呢兩日早食飯就瘦返3磅。
細舅母:咁你老公又唔肥既?
我:佢有勞動丫嘛!


老公又點同呢!佢本身瘦底,盡法寶努力自我谷肥,最盡都係去到110磅,已是極限;我就係肥底,莫講話食少少野丫!就算連飲啖水都會肥,我都試過努力之下減到得101磅,我諗見過我既人都唔相信我可以咁瘦。


我又順便問下我配房既進度,佢話我揀市區等派第2次都要等6-9個月,哎~都預左要咁耐架嘞!官字兩個口,唔催得,又唔得罪得。


頭先On the way娣婦來電話熊仔餅和M&M都有〝三聚氰胺〞,我諗而家所有奶類製品上不吃為妙。


我地去既時候搭巴士坐〝熱狗〞,回程等巴士時,阿公問我:『係咪冇冷氣架?』,我話非繁忙時間會少D冷氣巴,好在來的係冷氣,仲要係金巴士添啵!涼晒。


返到屋企幫細舅母填返D野,星期一再去過。食完飯,企係到幫細舅母整個手提,阿媽就篤我個肚腩。


阿媽:睇係個肚腩幾大,淋既。
細舅母:我個都大喇!
阿媽:你生過,佢未生過喎!
我:咩丫~實架!老公都話我D手、腳都〝met〞唔入架!


天啊!唔駛一日內話我知2次,好hurt架~我。我都知我肥架喇!我都盡量行多D路,又食得健康D,想book場打波又book唔到咋嘛!


最重要係老公從來都冇表示過,只係識得叫我減,肥左又唔高興,但我瘦就係應該咁!讚都唔讚下我,身邊既人都唔支持我,我又邊有動力呢!而家6點重〝肥田喜事〞,我都想好似佢咁。


尋晚問左老公〝以後每日都煮飯好唔好?〞,答案一早在心中,老公喜歡吃住家飯,但煮唔係問題,問題在於煮乜餸。


今餐我諗左好耐,老公又冇主意,就炒個菜和麻醬洋蔥炒肥牛,再加多個
無花果湯滋潤一下。


記得上次來來回回炒左碟通菜,我從來唔識洗菜,平時由家人代勞,我就將有窿既葉掉晒!以為係壞既,老公知道就話我好似阿蘇咁,一斤菜擇完得幾兩,所以尋晚和今日有窿既葉我都留返。



原來尋日網誌剛好1000篇喇!



無花果湯 (內附食譜)


這款湯又係我喜愛湯水之一,酸酸甜甜好解渴架!不過,而家既〝無花果〞冇以前咁酸,而家大多數都係浸糖水得個甜字,記得大伯娘話〝無花果〞要係美國出品先係好野和夠酸。


以前我係藥材舖執材料煲湯,這次材料係係屋企拎既,所以係靚野,今次煲到出晒味,可以飲回小時候既味道,老公都飲左2碗半,而我就飲左3碗。


平時我冇加果皮,但阿婆話加埋可以除痰,雖然,我與老公都冇咳,但老公有食煙,所以我都加埋落去。



無花果湯


材料:(2人份~約5-6碗)


無花果                  5


西施骨                  294克 (25蚊)


南北杏                  21 / 5


果皮                      1 (可以不加)


蜜棗                      2


                          3000毫升


做法:


1.          先將西施骨汆水,備用。


2.          將其他材料洗淨放入煲內,注入水煲滾。


3.          水滾後放入西施骨,用中大火煲50分鐘,熄火。
(
若無花果未爛,就用杓輕輕壓一下,讓它出味)


4.          隔數小時後,再用中大火煲滾,滾後改用中小火煲30分鐘。


5.          差不多飲用時加入鹽攪勻,再煲多一陣,即成。



 

無花果(學名:Ficus carica)是一種隸屬於桑科榕屬的植物,主要生長於一些熱帶和溫帶的地方,屬亞熱帶落葉小喬木。無花果目前已知有八百個品種,絕大部分都是常綠品種,只有長於溫帶地方的才是落葉品種。果實呈球根狀,尾部有一小孔,花粉由黃蜂傳播。


營養價值

無花果中含有大量葡萄糖和果糖,含糖量高達20%。同時還含有蛋白質、各種維生素(如維生素ACD等)。無花果具有滋陰健脾、益胃潤腸、清熱解毒和消腫止血的功效。科學家發現,經常食用無花果的南美洲居民,癌症發病率較低。


另外無花果中還含有30多種脂類物質,且大部份為中性脂和糖脂;所含脂肪酸中68%為不飽和脂肪酸以及少量人體必需的亞油酸。



心急去街

尋晚問左娣婦阿B仲有冇燒,跟住我就決定今日帶阿B去街,
娣婦都同意只要唔好去人多既地方就冇問題。


阿B呢兩日都7點幾就起身,
佢見我拎住佢個背囊執行裝就好開心,要孭個背囊喇!



我地搭巴士,但坐正架〝熱狗〞。



阿B要用糖氹佢先肯行。



等緊既時候,亦都係我出殺手簡既時候。



回程又係要用糖氹佢,但夾埋頭先都係食左2粒,因為阿B仲有D咳。



等巴士回家見到馬路有好多車,佢唔講,但就會手指指。
返到屋企,洗白白後飯都冇食,就訓左



2008年9月25日星期四

Book場記@羽毛球 (下集)

今日我8點半就坐係電腦前,因為我要book場打羽毛球,我禁到十點幾都未入到去,我就直接打去運動場問有冇位,若然有我就立即walk in 去 book。


我打到去一問之下,想要既日子餘下0700-0800和1800-1700,唔係掛我入都入唔到又會比人book晒既?運動場個網又冇問題啵!我就與個運動場職員講我既情況,又傾下計嘞!講講下先知update時間依然係早上7點,活動時間先係8點半,活動時間即係報打羽毛球班、兵兵球班‧‧‧,自己擺左個大烏龍~氣死我喇!


我問左運動場職員好多問題,運動場一樣都係每日早上7點開始book場,而且有好多人在外排隊等候開門,仲有排隊人士既家人還會在家中打電話book場添!邊夠佢地爭呢!所以我都打消左排隊book場既念頭,運動場職員仲比埋訂場電話我,等我都可以雙管齊下。


今日細舅母中午時份來到香港,因為之前細舅父、舅母和阿婆申請公屋,但有問題彈回頭,所以我要幫佢睇下咩樹,我再填回漏左既資料,明天就要去〝樂富〞攪,若然阿B明天OK就帶埋佢去。


今早見阿B呆係屋企咁耐就帶左佢落街行,落到街佢就帶左我去〝惠康〞,入到去唔買野唔係咁好,我就打比老公問:『今晚煮唔煮飯丫?』,佢話是但,又話我話,咁即係煮喇!


我係〝惠康〞買左D牛肉粒,屋企又有番茄和薯仔,咁可以煲個湯,再去街市買菜、排骨和洋蔥。白菜得老公一個食,西蘭花佢又唔多喜歡,都係炒蒜樣通菜,再煲個我與老公都好鍾意既排骨番茄薯仔湯,仲欠牛肉粒點煮呢?我想攪下新野,燜定炒好?睇下屋企有乜醬料,之後就煮左豆瓣沙茶牛肉粒


我問老公滿唔滿意呢餐?佢話唔滿意牛肉粒和個汁,佢話唔多想食呢D汁,我就覺得冇乜問題啵!真係難服侍。