手震攪到D相蒙蒙地，我鍾意當時天既顏色，所以就影低佢，當時係7點鬆D架咋！
2008年8月31日星期日
鳳梨酥~奶油香粉版 (內附食譜)
我好鬼鍾意食鳳梨酥，成日都想整，但自己成日都唔記得搵食譜，有次見到
〝林師奶〞整左〝Pooh Pooh 鳳梨酥〞，所以我上星期五就的起心肝去買餡料。原來鳳梨酥應該係與個鳳梨模一齊焗架！係職員話我知既！我梗係冇買喇！因為之前買左個米奇曲奇模而家大派用場喇！
我買一pad有300克重既鳳梨餡，我又唔想留，所以全部用晒！份量自然比原食譜多喇！做法都有D唔同架！頭2隻做跟足，但唔多對路，米奇對耳仔比較埋，所以做法要改少少，改左就好好多喇！
今次可算係最成功喇！個個都話似模似樣，阿嫂就個餡唔夠菠蘿味，等我下次買另一隻原產地先。
鳳梨酥~奶油香粉版
材料：(Mickey Mouse曲奇模13個)
牛油 120克
糖霜 37克
雞蛋(全蛋) 35克
低筋麵粉 184克
奶粉 17克
吉士粉 12克
奶油香粉 7克
鳳朵餡 300克
做法：
1. 牛油 + 糖霜打至發白。
2. 蛋分二次加入打至忌廉狀。
3. 分幾次加入已過篩的粉類拌匀成粉糰。
4. 粉團分成每31克一粒。
5. 鳳梨餡 23克一粒。
6. 然後將麵糰麵糰和鳳梨餡分1/3出來，再將1/3分一半。
7. 然後將3份麵團分別好似包湯圓咁，然後搓圓再輕輕搓長少少。(放便入模)
8. 2個小圓放入模內耳位置，大圓放入模內面位置，再造型。
9. 吸公仔樣貼士：先喺公仔模灑上高筋麵粉，再吸個公仔樣落個酥度，咁樣個酥同個模就無咁“痴纏”，會比較容易甩模。
l 因為天氣熱同埋尼個牛油本身較“林”身，造完成個搓粉程序再入埋模，已經開始想溶同埋出油，所以焗之前要雪一雪，停番個型先。
10. 用150度火焗15-20分鐘。焗到最後幾分鐘時，如見酥既底部開始燶，可以關掉下火繼續焗埋餘下時間。
2008年8月30日星期六
探病@大伯娘
今日肥仔返工，娣婦帶阿B回娘家吃飯，所以我今朝就約娣婦食晏。我湊阿B放學後，幫阿B洗白白，跟住食奶就出門口。
起初諗住帶阿B去遊樂場，而且我又應承左佢，但攪得阿B來都成1點半，娣婦都放工，應承左小朋友就要做，所以就相約埋娣婦與她的同事一齊去遊樂場玩，玩完先食晏，食完我就送娣婦去搭車。
大伯娘有事入左醫院，而家轉左去療養院。之前講左我與老公今日去探佢，但老公公司多野做，今日都要返工就話改明天，但老公今朝又話睇下可唔可以晏晝3點走喎！
我想整D野比大伯娘吃，我就整左最易又拿手既〝一口蛋糕仔〞，第一次整唔可以失手架嘛！我仲包左兩包仔送比堂阿哥個囝和堂家姐個囡添啵！希望佢地鍾意喇！
頭先我怕蛋糕整唔切，所以老公改為4點係公司走，之後公司又有突發事，最後改為5點放工。
我覺得得蛋糕好少野D，所以與老公去買多pad雞精，到達病房見到堂細老一人陪住大伯娘，細姑媽剛來過送飯和閒談，大伯娘話好悶係等人來探佢來解悶，電視每日都係開4-6小時咋！果然係療養院呀！
我：大伯娘明天要唔要拎飯比佢食？
大伯娘：每日大、細姑媽都會分工拎飯比我食，不過，明天就冇。
我：咁我明天拎比你喇！
大伯娘：但阻唔阻你去街？
我：唔阻，我明天都會回娘家吃飯。咁你想食乜呢？
大伯娘：無所謂，我乜都食，多菜少肉。
我：咁幾多點拎比你呢？
大伯娘：呢到5點開飯，你約5點到拎嚟就可以。
我地傾左約半小時堂家姐就來到，再傾多陣就走，大伯娘怕阻住我地。我搭小巴時就打比阿媽話佢知，咁我就會4點來拎飯去探伯娘，順手講埋明晚回家吃飯。
晚餐老公話食〝肯德基〞，點知去到裝修~激死！老公好少可話食架嘛！又諗唔到食乜就去食串吉吉先，行左陣就去左買燒味飯吃。
明天阿B過肥阿哥家游水，所以回家前都會過去聚聚，順便拎老公部機比肥阿哥整，因為前日部機突然出現藍色晝面，我行左〝安全模式〞，再〝系統還原〞，呢個程序都會不定時出現，要等肥阿哥攪至得。
2008年8月29日星期五
鳳梨酥‧月餅@購買材料
近排每日約6點半醒一醒再訓，但今日就真係6點半就起身，一起身就頭痛，但冇人湊阿B返學，我要回去，諗諗下不如晏D帶阿B去街喇！老公起身又話我知佢頭暈，夜晚老公仲同我講朝早搭地鐵時又暈又想嘔添啵！兩公婆都唔知攪乜。
今朝阿媽叫我明早都要湊阿B，因為肥仔要返工，咁好喇！還掂老公明天都要返工。今日我一早諗好為出街作準備，我唔想帶太多野出街，又唔想阿B係街捱眼訓，所以等阿B放學，訓晏覺，再食多餐奶先出門口。
我與娣婦講左會帶阿B出街，等佢放工來搵我地一齊食晚飯，我原本想約埋熊貓姐姐或阿嫂一齊食晚飯，但熊貓姐姐有事唔得，而阿嫂就要陪肥阿哥又唔得，唔緊要喇！阿B由2點訓到4點鬆D，所以就攪到5點先出門口。
今次出動想買鳳梨餡、月餅材料和用具。我想整月餅好耐，不過，老公一直都唔贊成，佢覺得要買好多野會好嘥錢。尋晚我又再提都係唔贊成，我真係好想整，所以我來一招〝先斬後奏〞。
我去左〝二德惠〞先，但冇我想要既野，之後就去〝橘子〞，不過，2間都係冇乜人。〝橘子〞職員真係好helpful，主動問我有乜幫手，我冇問都講得好清楚，個職員係男仔來的，都好細心。佢知我要整月餅就同我講‧‧‧
男職員：你將D鹹蛋黃放入焗爐用200度焗2-3分鐘出油、香就可以。
男職員：你整冰皮可以切碎粒放入去。
我：我想問鹹蛋黃邊到有得買？
男職員：雜貨舖買，有D可能有齋鹹蛋黃賣，因為佢D白可以賣比酒樓炒飯，可能都會收平1、2毫子既！
我：有冇〝五仁餡〞？
男職員：而家冇，因為少人食，你可以加D松子、杏仁片‧‧‧自己整。
阿公最鍾意食〝五仁月餅〞，不過，我整既唔係〝五仁〞阿公都應該會鍾意既！仲要整D比老爺，佢又係好鍾意食月餅。買齊晒鳳梨酥、月餅材料和用具係比錢時，我昅到有個米奇8"保溫袋，我梗係帶埋佢返屋企喇！
我帶住阿B係商場行等娣婦放工來搵我地，娣婦與同事一齊前來，我地一齊行街，等娣婦同事個老公與囝囝來一齊吃飯，行到咁上下我地就去〝日之食堂〞搵位先！去到等人期間，娣婦去左隔離舖買煎蠔餅一齊吃。
今晚我與娣婦都有D失望，因為冇〝蟹籽沙律〞，冇就轉order要〝清酒煮蜆〞，呢個都唔係成日都架！上次同熊貓姐姐來2樣都冇，我幾鬼失望丫！仲有例牌會叫既〝炸蝦天婦羅〞。我又order左一客〝滑蛋豬扒〞比老公做晚餐，不過，佢成9點幾放工，所以佢話好難食。我話比老公知我買左材料整月餅，佢個樣有D燶燶地，不過，我都唔會埋佢(自己好衰)，因為佢一陣就冇事架喇！
2008年8月28日星期四
昨天與今天的事
每日發生既事我唔係成日都會記得，所以有時寫Blog時會冇寫到，又有時會問返老公係點，唔知係咪冇做野個腦開始衰退呢？而家要補寫返先。
其實，呢件事係發生係尋日既！尋日朝老公係公司來電問〝你今朝拎回家既野見唔見我個pass丫？〞，我走去搵又唔見有。
我：點解你個袋有咁多格，你都唔放入去既？
老公：之前就係放入去，就整爛左個pass勒！
我：等我晏D回去再幫你搵下喇！
老公個pass內藏左公司張門口咭，佢地in&out都要啪咭架！我等阿B訓左就回去，我打開門望一望~冇喎！再諗就估到係邊勒！
尋晚老公係袋拎左好多野出嚟，全部都放係張櫈到，應該係跌左係櫈後面。我行去張櫈灣低腰一睇就見到個pass喇！我即刻通知老公，等佢放心D和通知同事。
上星期六，我買左部電腦話送多一年防毒和保養，但我唔見有野要填啵！所以尋日打比個sales問，不過，佢放假冇野係手唔清楚。今日我再打比佢，全部野已經解決，而家真先進，唔駛填就自動係電腦upgrade，只要keep住張單就可以。
晏晝係娘家執信，係〝世界兒童基金會〞信內搵到呢個掛飾，都幾靚丫！
晏晝見有時間又整下野！今次整左〝Cream Cheese小雪芳〞，不過，我都唔係好滿意。
老公問我今晚食乜？我話煮飯，尋日有肥牛剩，衰佬話唔想食重覆既餸，我話個汁煮另一款都話唔得，佢決定食〝麥麥〞。
Cream Cheese小雪芳 (內附食譜)
今日開雪櫃見到舊忌廉芝士開左好耐，所以用咁D先，又想起盒奶今日又到期，睇書後就決定整呢款蛋糕勒！
我唔知點解焗左第一轉都唔係好熟，再焗先熟，之後就用個長形蛋糕模，又係第一轉唔熟，焗到個面仲燶燶地添！可能我用既模同書唔同，所以咁樣喇！
每次阿茂整包餅都冇書咁靚既，要再加倍努力和下D功夫先！
我：覺得味甜左D，芝士味唔夠。
Cream Cheese小雪芳
食譜來自：手工蛋糕~Hand-made Cake
材料：(2個4吋雪紡模或任何紙模)
蛋黃 4隻
砂糖 40克
橄欖油 20克
牛奶 120克
低筋麵粉 60克
忌廉芝士 80克
泡打粉 2克
蛋白 4隻
砂糖 40克
做法：
1. 先以170度預熱焗爐。
2. 將40克砂糖加入蛋黃以手動打蛋器攪拌均勻。
3. 將忌廉芝士與牛奶一起加熱拌至溶合，略凍後與油倒入蛋黃糊拌勻。
4. 並將已過篩的粉類加入蛋黃糊內攪勻。
5. 將蛋白打至起泡後將40克砂糖分次加入繼續以【蛋白打發方法】打至挺身，用膠刮刀分出1/3蛋白放入蛋黃內混合拌勻。再將蛋黃糊分2-3次倒入蛋白糊內以膠刮刀快手拌勻，再倒入模具內約8乘高度。
6. 輕輕拍數下將麵糊內的空氣拍出。入爐以170度焗約25分鐘。焗好取出倒扣待涼便可。
小貼士：
忌廉芝士與牛奶一定以加熱方法混合，這樣才能拌成幼滑麵糊。
2008年8月27日星期三
抱與不抱
今朝阿媽一番話令我無名火三丈起。
阿媽：樓下個女看更個仔3歲都仲要抱丫！
我：人地係咪次次都要抱先？(嬲怒氣)
阿媽：佢咁細個‧‧‧
我：我唔係唔抱佢丫！
阿媽：佢咁細個‧‧‧
我：原本佢肯行既，次次我一放完假回來佢就唔肯行，嘥晒我D心機。
阿媽：佢咁細個‧‧‧
我：我都費事同你講丫！
頭先家中4大長老除阿公外，又話我唔啱，但我真係忍唔到，我已為免有爭嗌，所以而家每日晏晝等阿B訓左我就走人，自從咁樣就嗌少左好多，因為實在有太多我看不過眼的事。
前日與阿嫂去街，我地先講完呢個問題，阿嫂都話：『你阿媽話肥仔3歲都仲孭住。』，我都問過阿媽：『果時我與肥阿哥點丫？』，佢話我地3、4歲都係孭一個抱一個，我與肥阿哥差一年，但我與肥仔差4年，所以仲可容許佢咁做。
上次阿B做評估時〝發燒‧評估〞，肥仔試過阿B扭45分鐘都唔抱佢，導師都話佢咁細個唔肯行都可以抱，唔好迫佢行，但我既做法有幾種要視乎情況。
- 一開始唔肯行，我就慢慢拖佢行，真係唔得我先抱，我唔會比扭太耐。
- 唔肯行就用食物引佢行，行到唔肯就抱。
- 一開始自己肯行，行到咁上下唔行就抱。
- 抱下又放低佢，試下佢肯唔肯行。
導師都話我有心機，做法正確。我真係唔係唔抱和迫佢，但都要比佢自己行先架！，佢地就成日話我迫佢行，又話佢對腳唔夠力，導師都話阿B行得穩，不過，阿媽在場又會反駁人。
仲有另一件事，我地都唔贊成阿B食奶嘴，但真係頂唔住佢半夜三更係到喊，有時喊成大半晚，所以阿B三個月大我地就要屈服買奶嘴比佢。當時都係訓覺時先食，日漸長大係識行後，有一次我放假後回來就開始無時無刻都要食奶嘴，我都唔知發生咩事？突然變成咁，果次又係激到我彈彈下，不過，我無出聲，費事又嘈。
每次我苦心經營回來已野，都一手被摧毀，真係好開心架！阿B話又唔聽，又唔打得，我想買藤條回來，但肥仔話娣婦唔贊成打，所以我一直都唔敢買，而且4大長老又唔多贊成打。
我地小時候咪又打到抽筋喇！佢地隨手執起咩就打，有時打到瘀晒！藤條印會腫起來添架！我就打得小D，女仔乖D嘛！肥阿哥就多D，因為係大佬，通常都係打最大。而家又話唔好打阿B，阿媽話阿B唔同喎！我話佢係〝金叵籮〞，佢話係，總之阿B就矝貴喇！
一切正常@政府門診
今日我約左早上十點睇政府門診，好在阿B學校與門診好附，只須行5-10分鐘就到。
今朝總係覺得約左28號，諗諗下望個月曆先咋！，唉~今日先係27號啵！但我記得係約左今日架，我又睇返個Blog，自己都係寫27日丫！究竟係點既呢？唔理回娘家先，回到娘家望下尋日自己寫低既note係27號，咁應該冇錯，去左先算啦！
我照原定計劃進行，首先我與阿婆帶阿B返學，阿婆拎住接送咭回家，我就行過對面馬路睇門診。去到都冇以前咁誇大排長龍，我交錢係房外等叫號碼，係等既時候望出窗外見到把風扇內有個雀巢。
我等左一個鐘有多就到我喇！個女醫生好cool，我講述我既情況佢知，又問返佢我係2006年照既肩頸X-ray個報告，佢話報告冇野！只不過係肌肉酸痛啫！
醫生：有冇痛、分泌物、紅？
我：冇丫！係有時敏感隻眼好癢。
醫生：你拎張卡和紙去排隊等量血壓和驗眼，之後再回來。
我等緊既時候聽到廣播〝電腦有故障，所以診症時間會比較耐〞，咁死勒！可能真係趕唔切湊阿B。
入到房姑娘問我問題，又幫我量血壓、度高、磅重，跟住驗眼，好似眼鏡舖驗眼咁，不過，唔駛除低自己副近視眼鏡來驗。
測驗好簡單，只要講出〝E〞開口係向上、下、左、右邊到就可以，有D我睇左好耐先睇到係邊，有D係估既，測驗完畢護士寫左D野係張紙上，又送左份野和頭先測驗既眼鏡我，我就拎報告回去搵醫生，好在今次唔駛等好耐，我等病人一出我就入得。
醫生睇左護士寫既野就細細聲同自己講〝擲界〞，然後就同我講〝冇事〞，心諗你自己明明話〝擲界〞都話〝冇事〞，算喇~政府係咁架喇！我都費事追問，因為又hang左機，佢都冇print我今次病歷放入我要拎走既file內，佢話怕打得多野又要print一陣又hang機。
只係開左支眼藥水比我，我拎埋藥走人都係11點半，所以我就回娘家，然後等到咁上下就同阿婆一齊接阿B。
今日係我第一次攞呢本簿，下次去醫管局轄下醫院、門診就診都要帶備它，我有2頭住家都唔知擺邊家好！
阿媽交低叫阿婆叫我拎尋晚既湯，我見有湯今晚又玩煮飯仔喇！我諗左3餸：炒娃娃菜、麻醬洋蔥炒肥牛、瑤柱蒸蛋，老公話唔想食蒸蛋，所以得返2個餸，好在少左樣，因為全部剛剛好食晒！
2008年8月26日星期二
政府門診預約
尋晚好痛係床碌成個鐘都未訓到，後來將個攬寢放係我與老公中間，個攬寢跟隨老公多年，所以唔太高用來承托我隻手就最啱。
今朝起身發現個攬寢有另一個唔錯既效用，起身見老公睡姿好似冇郁過咁，平時老公會逼住我，半夜有時又會打交，但尋晚好寧靜就好似一條界線咁！令我諗起好似〝梁祝〞咁放碗水係中間，河水不犯井水。
我送左阿B返學見又冇乜世藝，就的起心肝打電話去預約，老公叫我上網預約，但我搵唔到邊樹可以預約，哎~好痛丫！冇心機唔搵喇！打電話預約算喇！我按指示約左8月27日上午十點，之後望下望下個月曆先知原來係明天，我一心以為係後日，真係傻下傻下。有好多人都話好難約，又成日都full book，但我今日一約就約到咁快，真好彩。
阿B返學十點，我又約左十點，仲要早15分鐘到，我安排好明天與阿婆帶阿B返學，等阿婆拎張接送咭，我就去睇醫生，因為我未必趕得切接阿B放學。
今日肥阿哥唔舒服冇返工，而阿嫂未放完大假，所以阿嫂約我帶阿B去街，我執好行裝就約阿嫂係娘家樓下巴士站等。
我地去到〝荃灣廣場〞租BB車係二樓見到上次〝雷曼兔〞個場都未拆，但阿B見到冇乜反應。
落到去見到個〝厠所泵〞係真架！仲要幾靚喎！
我地行完〝十蚊店〞又去左〝麥麥〞食野！阿B訓左我地又行多次〝十蚊店〞，之後就買壽司回去做晚餐，肥阿哥病唔食，阿嫂煮通粉佢吃，老公O.T.要食自己。元氣出左幾款新野，我地就叫左3款。
商場攪左個〝雷曼兔運動會〞，購物滿100蚊就可以玩一個遊戲，呢到有3個遊戲，每個遊戲都有獎品，我地3個都玩晒！Win左一pad〝雷曼兔〞postcard，其實，都唔算贏，因為差一個先贏，但遊戲姐姐好人都比禮物我地，postcard都幾靚架。
肥阿哥比左個分插和天線我，而家可以係電腦睇高清電視喇！頭先插左個card reader，但唔覺意掃左佢一腳，好細力咋！不過，佢勾住我隻拖鞋咪攪成咁囉！而家老公幫我整返好喇！唔該老公。
有玩具就精神
今日入學前雖有少少喊，不過，放學就冇野！
老師話阿B喊下玩下，下星期應該可以加鐘勒！
今日我與阿嫂帶左阿B出街，我地去到見到阿B鍾意既〝雷曼兔〞，
不過，佢好似冇乜反應，唔知係咪因為眼訓得滯呢？
阿B一直都坐係BB車到唔郁，但一去到〝吉之島〞玩具部，
佢就彈起身要落地玩。
離開後又唔多想郁既狀態，佢用雙手遮住對眼蘊釀想訓，
我冇帶臭屎被，阿嫂就比條絲巾阿B當住先，但後都係冇訓既！
佢唔訓，我地就去〝麥麥〞食野，叫左個兒童餐比佢，
但都只係食左少少粟米，之後放左佢落車，推下推下就訓左，唯有成個拎走，
開心樂團餐送左個福娃，呢個福娃打開係個印來的。
不過，我地行〝吉之島~十蚊店〞可能太嘈，一上去阿B就醒左。
跟住買晚餐回去，在商場消費可以玩遊戲。
阿B食左少少壽司，而阿嫂又煮左D通粉比阿B食。
訂閱：
文章 (Atom)