2008年5月31日星期六

老公一句〝整果D包〞

今日約十點聽完熊貓姐姐電話就起身,佢有D奇怪我未起左身,因為近排唔夠訓好攰,所以未起身,佢都有叫我再訓,但我話盡量喇!係床碌兩碌就起身。其實,佢幫人問有冇〝惠康〞印花多?我阿媽仲儲緊比唔到佢。


今日晏晝落街買野真係覺得自己有D似〝賓賓〞,因為我去左烘焙專門店買野、買茶餐吃、買晚餐材料、雞蛋,仲攬住條厠紙,係咪似呢?不過,呢D都係幸福既表現,事關我係一個〝師奶仔〞嘛!但有點液氣就係去過2間烘焙專門店都買唔到想要既〝奶粉〞。


返到去食完野就〝開工大吉〞,就係為左老公,因為老公講過既野我一定會記住,記得上次老公係豪一次@荃新天地講過想我整兩樣,一樣係〝漢堡包〞我已試左整漢堡扒來預備整,雖然,唔係好成功,下次一定得既!而另一樣就係酥油麵包,之前都整過士多啤梨丹麥包,但我覺得呢款包好麻煩,老公鍾意食幾麻煩都會整。


今次個賣相唔多掂檔,冇上次士多啤梨丹麥包,衰老話個包唔夠味喎!



唔緊要我覺得味道好咪得囉!好少可架!



原本就冇乜色,老公叫我再焗多次,唉!焗多次又真係有色喎!



賣相唔得,但好鬆軟,仲有好多層添!廢話~酥皮緊係多層喇!



晚餐好簡單,冇所謂喇!好又一餐唔好又一餐,更何況好過冇得食丫!



今日早餐又係吃杯麵,焗左3分鐘後開蓋先發現有獎架喎!我中左〝da dolce意大利雪糕店惠顧任何雪糕杯可獲8折優惠〞,之前去買冇留意,而家諗返好似得〝香辣海鮮杯麵〞個包裝有唔同。



2008年5月30日星期五

〝金田〞日庳料理@悅來酒店

今朝出門口前睇新聞知道今日係〝山頂纜車~120週年〞,可以用3毫子坐〝二等〞來回纜車即係120年前的票價。


今日7點開始短短一個鐘已有六百幾人乘搭,我一睇到已經想去,不過,老公咁夜收工,或者晏D我帶埋阿B一齊去,但係要等咁耐佢實扭計,新聞講過服務延長至半夜12點,等我試下問老公先,老公叫我睇下新聞多唔多人先決定,午間新聞報導〝纜車公司〞呼籲市民不要前往,因為人太多、天氣又唔好要排3、4個鐘,老公lunch後來電叫我繼續留意新聞。


下午3點幾娣婦來電問〝我剛上網睇到小朋友玩具有開倉,你同唔同我地一齊去?〞,我會同你地去開倉,但未必食飯,因為我夜晚可能去坐纜車。


我5點幾睇〝有線〞新聞話少左人,等到肥仔與娣婦放工回來與我、阿B一齊出去。


開倉果到有兩間房,一間冇冷氣熱死人,另一間就有,我地係2間房來回左好多次,都只買到一架〝法拉利〞走人,我要決定是否與他們吃飯?就電聯老公話佢知頭先纜車情況作決定,老公見我想去就話去,但佢怕白行,我聽到咁就取消坐纜車,老公又唔知放幾點,所以唔同佢地食。


娣婦要食豪D、想食Buffet,N年前〝長沙灣廣場〞酒樓有Buffet食,我地行左去睇冇,老公就來電8點半前收工,佢地就等埋佢吃,但是又肚餓就買左D小食吃,然後坐巴士去〝荃灣〞食晚飯。


我地都唔知食乜好?娣婦想去〝悅來酒店〞內〝金田~日庳料理〞,但上次經過都好似幾貴下,娣婦與朋友試過唔錯,幾多錢就唔記得勒!娣婦問左其中一個朋友,而佢個朋友幫我地問左8點半可能有位,仲幫我地訂埋位添!



相信大家係〝悅來酒店〞都見過呢班〝國寶~熊貓〞,但其中一隻並唔係熊貓嚟架!呢個係娣婦與我帶阿B去換片,之後佢與阿B係出面玩等我時被佢發現架!
唔知大家搵唔搵到邊隻係假扮既呢?答案係最後。



我就覺得呢個圓碌碌既熊貓最得意。



彈鋼琴既熊貓就係係〝金田~日庳料理〞對出,阿B成日同呢隻熊貓〝拜拜〞、〝哈佬〞添架!



〝金田~日庳料理〞裡面都有〝吧檯〞架!我地去到就有位唔駛等。


原來呢到係食放題架!當然係有order紙比你tick喇!一共有7類任君選擇:一品料理、沙律、刺身、炸物、燒物、壽司、鐵板燒。我地就唔係全部野食都有試,但樣樣野都味道都唔錯,尤其係〝刺身〞好新鮮,真係最抵食,又好味,我地encore、encore,再encore。



結帳就會奉上甜品,成日都唔同架!今次係〝綠茶餅〞。娣婦結帳後,唔肯收老公錢,今餐又要再次多謝〝娣婦〞,不過,都幾貴計埋加一,每位要2百蚊多D,老公話冇乜特別,野食係冇特別,但有咁鮮既刺身都算係咁喇!


夜晚睇新聞好似太多人,呼籲等候人仕自己坐車上去,之後就有爭嗌,好在冇去啫!



答案:


大家睇唔睇到有隻Monchhichi呢?Monchhichi變熊貓,隻Monchhichi就係匿埋係兩隻熊貓中間隻腳上面。



橫衝直撞@玩具開倉

晏晝娣婦來電放工與肥仔一齊去〝栛枝角~玩具開倉〞,所以問我去唔去?
咁緊係去喇!我一拎對鞋出嚟!衰豬離遠見到就〝笑騎騎〞行過嚟!
一睇就知佢做乜喇!對鞋我都未著,佢就著左上自己對腳仔到喇!
仲著住通屋行,晏晝佢先著完我對拖鞋通屋行咋!兩次我都有錄短片,
肥阿哥、阿嫂見到實笑死佢地,上次見到肥阿哥個朋友,
佢話每次去肥阿哥到,肥阿哥實播阿B短片比佢地睇!
肥阿哥會唔會有〝Hard Sale〞之嫌呢?



娣婦個同事與她的老公和仔已經係開倉果等緊我地喇!



阿B毫無Break咁係貨場週圍走,娣婦同事個仔都係,不過3歲就可以叫停,
阿B就唔得囉!抱住佢都要扭落地,佢當然有趴街喇!趴完咪又走過。



最後都係買左架〝法拉利〞,到比錢我聽到〝150蚊〞,
嘩!我寧願買果張檯比阿B禁禁下都係$250,肥仔話買埋佢,
但娣婦話唔買拎唔到咁多野,肥仔話佢拎,娣婦都係唔買。
換轉係我就唔會買架車,實在唔值。



之後去左商場食少少野,阿B係到等食。



跟住坐車去〝荃灣~悅來酒店〞食日本野。嘩!阿B有爸爸、媽媽拖住幾開心丫!



睇下個衰豬成個大人咁!老積到死。



未有野食就係到攪攪振,睇下佢食烏冬~殊~殊~殊~就攪掂一條喇!



尋日阿B飲番茄曹仔牛肉湯行去邊都唔放手和口。



今日晏晝我又煲返尋日飲唔晒既番茄曹仔牛肉湯佢飲~好味!



2008年5月29日星期四

〝李派林〞雞翼‧糖醋排骨

今次阿媽係〝美心〞買〝拿破倫〞,外表睇好過上次係〝聖安娜〞既〝拿破倫@今非昔比〞,我用手去篤中間個感覺都似係糖做,但一啖咬落去就知〝偷工減料〞,因為除左糖之餘,仲有蛋糕,以前係純糖嚟架嘛!不過,都好過〝聖安娜〞全蛋糕,有時間真係要上網搵下食譜先得。



尋日講左今日晏D先回去湊阿B,因為我想訓耐D,之前同阿B訓每晚都冇覺好訓。今日叫左老公起身係床碌左好耐先訓得番,十點就比個信息叫醒左,之後就執下野,比我搵到〝李派林〞雞翼〞食譜。


呢個食譜係用十隻雞翼,但我用左一磅25隻,所以我將所有野都加大1.5倍,係煮既時候漏左一個步驟,又水汪汪,所以我係中途夾起左D雞翼,用大火將汁煮到差唔多稠,再將雞翼回鑊,我差不多用左成支〝李派林〞煮,我問左意見‧‧‧


肥仔:D味怪怪地,薑味重,食多幾隻又唔覺有薑味。


娣婦:味道似〝薑醋蛋〞,係咪〝糖醋雞翼〞?


我:老公有咩唔好食?


老公:唔鍾意食,唔鍾意食咪唔好食囉!


咁樣都唔算失敗既,至少都食左大半碟,我要再研究一下先。



晏晝12點幾阿媽係返工前就煮定佢其中一樣拿手小菜〝糖醋排骨〞。



阿公出左去剪頭髮,每次去剪髮都會買好好味既叉燒返嚟!



跟住又炒多碟菜。



阿媽已經買左野煲〝番茄薯仔湯〞,真係比有靈犀,今日我都想煲〝番茄薯仔湯〞,不過,我要再加牛肉和洋蔥,我問左老公可唔可以嚟食飯先煲,因為係老公鍾意飲既湯。


上次太耐冇煲唔係咁好飲,阿B飲左少少就唔飲,今次娣婦都話好味,阿B就唔駛講喇!添飲添,有時飲飲下塞左,幫阿B整好左幾次佢都肯繼續飲,平時咁樣就已經唔再番飲架喇!



頭先坐小巴回去時聽到收音機講〝大陸〞各地禁止生育既口號,但我唔係聽得太清楚,又只記得3個,老公聽唔到,我講返比佢聽其中一個仲笑死我地添!



  • 寧可家破,不可國亡。

  • 一人多生一個,全村紮。(老公話咁大鑊!)

  • 廣西:一個環,兩個紮,三、四、五、六殺殺殺。

番茄薯仔牛肉湯~足料版 (內附食譜)


上次煲番茄薯仔牛肉洋蔥湯由於太耐冇煲味道始終差D,所以食譜只係得材料,而冇份量。我有左上次經驗就有今次既成功,湯既顏色靚過上次幾多。


今次料多左,而做法都有D唔同,因為上次薯仔本身淋、番茄硬,所以齊水落,但今次唔同就分開落。原本用一個薯仔,但切完後都係再多一個好D。


睇下D番茄煲完都有得食架!雖然如此,湯都好夠番茄味架!個個都話好飲。



番茄曹仔牛肉湯~足料版



材料:


                             12


番茄 (切件)             4


薯仔 (切件)             2


洋蔥 (切條)             2


牛肉 (切片)             150


甘筍 (切件)             2-3


調味:


                             隨個人喜好


做法:


1.          甘筍、薯仔去皮洗淨切件,其他材料洗淨。


2.          番茄切件;洋蔥切條、牛肉切片。


3.          先將薯仔、甘筍、洋蔥放於煲內,然後水加入煲內。


4.          煲滾後加入牛肉。


5.          薯仔開始腍就加入番茄。


6.          煲到番茄出味至半爛時加入鹽作調味,即可。


足球係我既好朋友

大家唔睇標題都唔知阿B攪緊咩呢?佢張〝臭C被〞包住D咩呢?好似個頭咁既?



咪就係〝戴志偉〞既好朋友足球囉!它亦都係阿B個好朋友,
見佢捨得用〝臭C被〞包住它同佢玩就知喇!咁都唔夠喎!
仲要同佢一齊訓添丫!佢地幾Friend丫!



2008年5月28日星期三

等了又等

28 May 2008



之前家中有事我與老公都要搬回我家住一段時間,事情暫時告一段落今日開始我與老公可以暫時撤離,遲D有需要可能再要搬回去。


天氣好熱,今日係屋企幫手拖地和掃地,就攪到一身汗,所以就去洗白白之後就撤離。上次我與老公的日常、必須用品一共有6大袋,今日我只是拎左2大袋、1小袋,因為有D就專登唔拎既,因為住一排玷能又要搬回去。


我回到去老公家就開始執野,我要係老公放工回來前攪掂晒D野,我連平時唔會換既床單都換埋,等佢返到嚟感覺到這個家好舒服,但太熱我就開住冷氣執,執完又抺塵、拖地、掃地,足知由4點幾攪到差不多8點先攪掂。頭先老公5點幾來電‧‧‧


老公:你肚唔肚餓丫?
我:頭先唔肚餓,但執執下就肚餓喇!
老公:唔記得叫你買野食,屋企應該冇晒野食,你而家落街買茶餐食住先,我今晚應該好夜先放工。
我:唔落喇!都未執完野!


其實,我已拎定牛油、雞蛋室溫一陣執完野就整蛋糕,我又可以醫肚,蛋糕又係老公喜歡食,但執到唔餓,而且夜晚用電動打蛋器又嘈,所以放棄左,都係等老公放工買野食回來。


九點幾打過比老公仲未放工,仲要係無了期的做,咁我要無了期的等,我由唔肚餓等到肚餓,再等到唔肚餓,再變肚餓,等下~等下~再打比老公等我買定野食回來,等佢返來就有得吃,抬頭一望已經11點喇!咩都冇得買喇!老公都好想放工,因為身心都疲累,隻腳仲有D揪筋添!


終於,老公係11點45分放工,佢買〝麥麥〞回來一齊吃,我同老公講〝無你係到D冷氣好凍丫!〞,而家我又肚餓又凍添!


老公回來時話頭先係公司唔小心踢左到塊〝卡板〞,而家隻腳腫左,雖然如此,我知佢明天都會返工,佳因佢係一個好勤力既人。老公話〝而家食乜都冇味〞,吓~你病丫?唔係,係攰到食乜都冇味啫!睡前我抺冬青膏,老公見到又叫我幫佢抺下2隻小腿舒緩一下,等埋老公頭乾攪到2點幾先訓得。


頭先執野有幾樣野唔記得拎回來,全部都係老公日常要用的,不過,自己就冇執漏,老公唯有用住我D先,但我連漱口杯都唔記得拎,咁就要用〝麥麥〞個杯頂當住先喇!我已經寫低左,但唔知有冇寫漏,明天回家拎番先。


藍罐曲奇仔

衰仔拍拍下個藍罐曲奇罐突然靜晒,
原來佢拎埋D玩具坐左係個罐入面玩,仲要係〝榻榻冚〞添!



佢見到我影相又走過嚟睇!我比佢睇完話唔靚要影過,佢立即埋位坐入去,
但我都未影到佢又走過嚟睇!我話影唔到丫!
佢又返埋位,我叫佢笑,佢就〝依〞。



2008年5月27日星期二

老公一句〝漢堡包〞

今日花左少少時間整過Blog Banner、個人照片的相,相係星期日係街、坐車時影,因為平時我地冇戴結婚介指,星期日去飲就要戴,所以我就趁機影相勒!我發現我、肥阿哥、同屋住3對結婚介指都係差唔多款,但係我地分別係唔同地方買,証明大家都係有品味之人~哈~哈~!



只要老公講過既野我都會記住,有時有D野佢未出聲我已經幫佢辦妥。老公鍾意食乜我都會然後盡辦法整既!因為我與老公一樣盡量給予對方最好的東西。


上次係豪一次@荃新天地老公返到屋企食〝Mos Burger〞時叫我整漢堡包比佢食,其實,N年前我間中都會整〝豬柳蛋漢堡〞和沖奶茶比老公品嚐,有時同屋住來家中作客都有整比佢食架!當時大家都未結婚,而同屋住都未識佢老婆,有時仲會整返公司請同事吃,當然全部都係買現成的,我只係煎香和砌靚個包。每日老公都要飲一杯奶茶,所以我想沖到一杯靚奶茶比佢,上網搵又得好少資料,搵到又搵唔到茶葉買,唔知有人冇人可以提供資料呢?


〝漢堡包〞個包老公話買就得,因為太花時間,咁最要就係個〝漢堡〞勒!所以我今日就試整〝阿蘇~漢堡扒〞先。


尋日係〝惠康〞已買定牛肉,但返到屋企先知唔夠,同埋又要冇買到肥豬肉,今日阿婆去買豬肉又唔記得叫佢幫我買埋,咁少我怕豬肉檔慊少,所以一次過去〝惠康〞買,但牛肉冇晒,咁唯有買免治牛肉,因為我屋企全部免治東西都係自己剁,〝惠康〞冇肥豬肉,我就買左〝新鮮梅頭半肥瘦〞,我已盡量切晒肥既地方。


老公O.T.,所以要煮兩次,煮定唔好食架嘛!煮既時候聞到個汁就想起以前屋企樓下的〝漢堡包〞,而家冇左喇!



煮完肥仔以為係〝獅子頭〞,我好心急問意見,汁唔多、肉質〝鞋〞左D、唔夠滑,多D肥豬肉會好D,我已盡量切D豬膏架喇!夾埋洋蔥好香,我爆過丫嘛!


汁好好味,娣婦用汁撈飯吃添!肥仔仲話個汁好似〝將軍漢堡〞個汁。阿蘇食譜得材料全部都冇份量,所以都係要自己慢慢去試,所以個牛肉味就淡,因為個汁可以試到味就唔同勒!




吸收左第一次經驗今次好好D,冇頭先咁燶。


老公又係話似〝獅子頭〞,佢唔覺得似〝漢堡扒〞,我聽到〝心都傷〞,哼!我專登整比你食唔讚我仲咁講,肥仔都有讚我丫!我以後都唔整比你食喇!次次都係咁~永遠都唔會主動讚我既!


肥仔話〝似唔似有乜所謂丫!最緊要好食。〞,不過,佢地都覺得好食,而老公有添飯添丫!老公話好食,不過再薄D會好D。



老公話個汁最好用嚟撈飯,但係我邊煎漢堡扒邊煮菜,所以個汁好稠撈唔到飯,肥仔話第一碟汁撈飯就剛剛好。



芒果布甸~無蛋版 (內附食譜)


上次材料齊晒想跟〝Blog友仔~〞個芒果布甸食譜整,不過,盒鮮奶又到期,所以冇跟到,尋日買多盒芒果啫喱粉預備今日整。


我改左一D做法和材料,我全程用熱水座住整,所以全部都係用普通凍滾水,同埋原食譜係用6安士花奶,但我用左一罐細花奶得160克差少少都由佢照整,因為唔想再買,買左又用唔晒就嘥。


我、老公、肥仔試過都覺得〝Blog友仔~〞個芒果布甸食譜既製成品好過我之前的芒果布甸~臘臘版,肥仔仲話呢個香D添丫!



芒果布甸~無蛋版


材料:


芒果 (切細粒)            半個大 (隨意)


芒果啫喱粉                一包 (90)


                                8安士


花奶                            160 (細花奶)


做法:


1)     Mixing Bowl用熱水座住。


2)     放啫喱粉在Mixing Bowl內加水撤底攪勻。


3)     加入花奶再攪勻,跟著加入芒果粒攪勻。


4)     待稍凍後放入雪柜雪約一個小時,食得。


無餸不歡

阿B一向都食好多餸,唔係食好多飯,佢係〝無餸不歡〞。


夜晚煲左〝節瓜湯〞,我屋企湯渣都會當一樣餸,阿B一見到就起勢食,
原本成碟瓜,你睇下碟瓜得返幾多,反而飯就食好少。



朝早我食提子包,阿B見到例牌又要食,佢食左一啖就成個頭〝烘〞埋塊包到,
原來佢係想食包中間既提子。



今日我又整左瓦煲焗~牛肉飯比阿B食,佢見到開飯就扭要食,
牛肉飯差少少先收晒水,都要比佢食,攪到D飯濕濕地,
不過,佢見到D餸就食餸多過飯,嘥晒我D心機。