困電梯疑雲

頭先搭電梯回來又差D被困，電梯內有4個大人1個小學生，去到9樓第一個人出電梯，點知對門開左少少就冇開，電梯又唔郁，按一按關門佢又閂埋少少，用手推電梯門又冇反應，唔知點樣佢又開返門，我就問老公要唔要出搭另一部電梯，老公話呢部電梯今朝都係咁！唉~我唔覺既可能未訓醒！

好在冇事咋！唔係就係我出生以來第三次被困電梯喇！六合彩又唔見中喎！

C勒！今朝喉嚨有D痛，而家喉嚨開始有D癢癢地，應該就咳，唔通今次靠自己真係打唔贏，難度真係要去睇醫生？

今日細舅父做手術由朝早8點幾開始，足足做左8個鐘，我聽舅母與阿媽傾計話細舅父個癌細胞剛係個肝中間麻煩D，我諗可能要切好多先得，因為每日我都係見到佢地一陣，什至乎見唔到，加上呢2日晏晝我又走左，我又唔想問阿婆攪到佢唔開心，所以我都唔係好清楚細舅父實際情況。

肥仔OT收9點、娣婦唔舒服煮烏冬吃、〝四大長老〞都去左醫院睇舅父，所以得我與老公吃，雖然，阿婆滾左湯，不過得2個人，所以我地就出去食。我唔舒服唔想食熱氣野，所以簡左〝吉野家〞。

上年都買左條皮帶襯衫，但係唔多好用，想買過另一條好耐都又睇唔〝arm〞，頭先行去買〝吉野家〞時被我睇中左2條好平既皮帶。

我都記得幫朋友買左佢要既〝吉士粉〞，而我自己就買左〝無鹽牛油〞。頭先去第一間D〝吉士粉〞要煮，所以去左Miss到買，但Miss係冇乜packing好普通架咋！

尋日買晒材料預備今晚整〝雞批〞明天拎去朋友仔大顆兒一齊吃，不過，原來麵粉唔夠，老公幫我落〝惠康〞買又冇晒貨，激死~唯有放棄再過幾日整喇！

〝芒果〞~原本想用嚟整〝楊枝金露〞，但忘了買〝西柚〞，唯有吃掉它，呢個芒果都OK甜喇！

迫上梁山

之前娣婦買左1set3支牙刷比阿B用，好似係分唔同階段用既！
今朝阿B就自己走去拎支牙刷玩勒！呢支係第一階段。

娣婦一睇到呢張相就話阿B似〝乞丐〞，你地話似唔似呢？

今朝早落街前阿婆話比1蚊阿B坐車，我話唔好咁樣會有懷習慣，
但若果落到街到見客氣婆婆，我就控制唔到，
因為佢每次見到阿B都會比1蚊阿B坐車，而每次我都話唔好，
結果都係一樣阿B會唔客氣拎左，咁我唯有叫阿B做返D野就係〝請請〞，
因為我要比佢知道唔係〝不勞而穫〞既。今日又係咁，有一個婆婆都話唔好，
電視都有講會咁樣會養成佢有壞習慣，我地話唔好客氣婆婆係都要比，
都唔知講咩好勒！

晏晝12點幾阿B自己睇住〝Noddy〞訓左，我都好攰食完飯係一點幾訓左。
我與阿B中途都有張開過眼，不過我太攰又唔舒服起唔到身，
阿B見我冇反應又繼續訓。終於我係3點幾見到阿B睡姿咁樣，就起身影佢，
佢訓到好似比我迫左上梁山咁。

我訓係〝Snoppy〞枕頭到，而阿B就訓係黃色格仔枕頭到，
但之前佢個睡姿唔係咁，係與我成一個11點，睇下而家訓到，
攪到好似係我迫佢咁。

晚餐吃烏冬加豆苗餃，食到好似個大人咁！

後尾食到塊面都有豆苗丫！幾〝烏租〞。

鼻水失控

今日起身都覺得有D唔妥，右邊鼻好乾、右邊耳好好癢好似有D發炎既感覺，有少少乞嚏、鼻水唔多，但會不受控的自動流出，〝son〞又唔多得少少。後來鼻水隨我低頭不受控向下流，又隨著我仰頭向喉嚨流，有時唔戴口罩都要用口呼吸，因為右邊個鼻塞塞地，我諗應該都係鼻敏感加上近日休息少左，所以有少少病。

早上同阿B落街要戴口罩好麻煩，戴住口罩既我習慣用口呼吸，天氣熱又攪到副眼鏡蒙晒！我接左老公電話後就立即帶阿B回家，因為我要打封信，事關我地唔要〝環翠邨〞的配房，唔要係要親身前往辦手續，但老公又就唔〝arm〞時間，所以打去問下勒！

環翠邨辦事處職員都話〝你住既地方與呢到都相距好遠〞，亦都問左幾次有冇興趣睇一睇間屋呢？若果冇就可以唔嚟！因為真係太遠，咁就可以寫信fax比佢講明拒絕配房原因就不用親身去，不過，要今日內，因為今日後個職員放大假。

我打完信、食埋飯約2點就起程回老公屋企，返到去寫下Blog，又想整下都包包，到我開始拎工具時又唔想整，跟住我跳下健康操，之後就落街買今晚的晚餐和明晚做雞批的材料，我想明晚整雞批後天拎去朋友聚會一齊吃。

我結賬時見到有〝日式炸雞下脾〞，所以就買定回家冇餸時可以做餸。

夜晚煮〝味噌湯烏冬〞！

頭先係凍肉舖結賬時發生左件事，係結賬時聽到收銀員講總數時已經有D疑問，好似收少左錢，行出左門口望下張單冇左包丸既價錢，個心都有一秒的貪婪~就係唔出聲，但再諗咁樣收銀要賠錢，而家搵食艱難，所以我折返通知收銀，等再打多一張單，然後再比錢。

老公話我咁好既，佢冇打單唔駛賠錢，唔見一兩粒唔多覺，但當時我諗唔到，個腦只係浮現〝收銀要賠錢〞，雖然，只係收少十蚊，但我唔想累到人，所以折返。

食飯枱上的曳史

尋日阿媽同我講上星期有一日朝早帶阿B去飲茶，
酒樓內播放緊純音樂其中一首係〝國歌〞，
阿B聽到立即左擰右擰〝四周張望〞，但始於並沒發現。
我問有冇跳舞？冇，只係尋找音樂來源，我諗佢係想搵邊到有電視。

阿B係一個〝愛國份子〞，
每逢播國歌佢就會跳舞、跟住唱、笑或跟住拍子拍手，
有一次一播就起身，老豆問〝阿B你起身敬禮丫？〞，
亦都試過電視新聞播〝中國國家主席~胡錦濤〞先生時，
立即望住眼都唔眨好留心聰佢講野，
阿B咁愛國唔知有冇機做〝奧運火炬手〞呢？

自從阿B病後去〝惠康〞都會不停咳，唔知係咪冷氣凍得滯呢？
但唔去〝惠康〞又唔知去邊到好，係其他地方阿B行行下又要抱，
若然係〝惠康〞我比佢自己行冇坐車或抱，佢自己行到離開〝惠康〞為止。

今早阿B唔食奶擾攘左一陣，我就set左個位係電視機前先肯食，
我執定野預備一陣落街既野唔得閒理佢，佢食完都冇叫我，
我見佢食剩約1、2安，就由佢自己拎住等佢叫我先幫佢拎，
點知佢睇睇下電視跟手自己食埋餘下既~幾好唔洗嘥野。

晏晝食飯只是擺好筷子阿B就要埋位，埋到位見到筷子就隨即打鼓。

阿B見到上菜就急不及代要吃喇！

跟住裝好飯就要自己食，食食下又攪攪振。

食完飯緊係有飯後果喇！阿B見人食橙佢冇份就〝扁〞晒嘴，
佢未病好醫生話唔可以食橙和蛋黃，我就立即拎個〝奇異果〞比阿媽，
雖然，阿B係有食，但都係想食橙，佢食完〝奇異果〞離開餐枱後，
就走去生果兜到拎橙食，當然冇比橙佢食喇！

閒談一小時

今日我晏晝就回去老公家，因為阿媽今、明兩日都放假，不過，阿媽早上要回醫院覆診，而明天就要陪細舅父去醫院覆診，所以明天一樣要回去湊阿B。

上星期五，我唔小心整疼左自己隻腳，至今已經係第四日，我差唔多臨走時被阿媽發現我隻腳疼成咁，就問我咩事？阿婆見到又話我成日都撞到既，散緊係咁上下喇！其實，大家都知我係一舊〝大番薯〞，老公更給我一個封號〝薯王〞是也！

我回到老公家就執拾一下，再整埋少少就通知朋友仔收到房署第一次派屋的消息，但朋友問〝點解Bong~Bong聲咁嘈既？〞，緊係喇！我一邊掃地、拖地一邊同你傾電話吖嘛！我同你一樣又係要將地下D野離晒地先開始掃地、拖地，咁我又順手抺埋塵咁囉！

朋友仔又話而家買餸貴左好多，佢又問我今晚吃乜？都係煮麵喇！平時係屋企食埋，買餸食唔晒又嘥，所以我地都冇係到煮飯架！

我問佢近排有冇新作？因為佢之前整過麵包、蛋糕、馬拉糕‧‧‧等等，雖然，佢冇寫Blog，但都有電郵D相比我睇架！一直想整麵包的我，就係果次睇到佢整得好靚就〝的起〞心肝去整勒！佢話D材料用晒！想買〝吉士粉〞，我話幫佢買，橫掂我地今個星期四有聚會可以比佢，因為佢住得好遠下。佢話可能會自己出去買，咁我叫佢要買就呢兩日話我知。

這隻4G~USB係肥阿哥買比我架！之前佢都話買比我，可能佢見我成日都用記憶卡比阿B既短片佢麻煩，用手指方便D，不過，我講左唔要，因為唔想嘥錢買，點知肥阿哥都係買左比我~多謝。

下個月我要去飲宴，咁要〝咋咋淋〞減下磅先。頭先朋友仔話佢而家都係食7成飽，發覺個肚腩細左。朋友仔好瘦一百磅到與我差不多高都咁樣，咁我都要努力，等我試下仿效下先，一陣又跳下〝高中健康操〞。

環翠邨@第一次

今日拎左封信我唔知阿媽佢地知唔知？不過，我就冇提過呢件事，費事煩。

上星期我與老公都講緊公屋輪候都已等左3年有多喇！幾時會派屋呢？朋友亦都有問過我，因為佢地都覺得〝等得太久〞，但我都唔知。我都有親身上去房署問過與我每次打去問答案都係一個字〝等〞！

自從與同屋住一家分開住之後，我申請公屋的通訊地址改了去肥阿哥家，因為申請公屋的通訊地址唔可以再寫回公屋，所以老公講過會唔會因為通訊地址係私人樓，所以遲D呢？

尋日肥阿哥致電給肥仔話我房署有信，心想莫非係第一次派屋，咁我就打比肥阿哥叫佢幫我拆開睇下。唉~真係丫！派邊到呢？肥阿哥睇緊，我好心急。從肥阿哥口中聽到後彷如〝晴天霹靂〞，雖然，我係申請〝市區〞包括九龍、香島，但估唔到派〝柴灣~環翠邨〞，聽到都幾失望。

老公聽到第一個反應係〝住天水圍、屯門既人老遠都會走去果到跳樓架喎！果到成日都有人去跳樓〝陰氣〞好重〞，但佢一D都唔覺得出奇，亦無失望，因為係電腦派位，但係我唔係好接受。

之前我地係申請擴展區，若果派〝屯門〞、〝天水圍〞、〝東涌〞我都接受到，因為係我意料中事，而且我一D都唔覺得遠除〝東涌〞，交通仲方便過我屋企，不過老公嫌遠和車費貴。

我冇諗過申請市區，而我地現住新界估唔到會派香港，香港區咁細冇人申請公屋咩？仲可以有屋比香港區以外既人，我與老公都係黑架喇！連第一次幫我地做審查既房署職員都話我地黑。

之後肥阿哥來電問：「點解簡市區？唔簡屋企附近？」，市區老公返工方便，肥阿哥話份工唔會做一世架嘛！住就會有排住，但老公都唔會轉工除非比人炒啫！

高達叔叔話〝你住天水圍咁遠咪冇朋友去你屋企？〞，咁我可以去人到啫！若然係咁佢就會拎返副模型走，咁又係對於佢地個個都係住九龍的人來說又確實幾遠既，但我一D都冇問題喎！

我地都唔會接受〝環翠邨〞，因為好隔涉唔多方便又多人跳樓，並且我不喜歡過香港，更何況要我住，但唔接受這次派屋要回去〝環翠邨〞辦手續，老公話太遠問下可唔可以去〝樂富〞辦手續。

今次的派屋除地點外，租金和樓層老公應該會喜歡，因為只是9百幾蚊租，而且住2樓，但我不太喜歡住咁低，因為冇左私隱。我發覺今次好得意派2樓仲要係22窒，即是係222室，仲要由2008年5月22日生效，嘩~有好多個2丫！

唔知幾時會派第2次呢？同屋住好似成大半年先派第三次，但我朋友4、5個月就派第三次喇！不過，都好有第一次起碼都有D希望丫！而家希望我都可以好似我朋友咁咁快就好喇！

買到喇！

我、老公、肥仔一家和高達叔叔一齊去左〝新城市〞行街。原本約埋同屋住一家，但同屋住要返工。尋日都過肥阿哥今日去唔去？答案唔講都知喇！

今日我買左想買好耐，而買唔到既野，亦都買左想買好耐，而一直冇買既野，真係好開心。

我係〝CirySuper〞買左個環保袋，我想買好耐架喇！平時老公實唔準買，因為佢覺得嘥錢，唔知點解今日比我買喎！

跟住又買多個〝Plastic Bay Dispenser〞，咁D膠袋可以放得整齊D喇！

我個〝米奇〞散子包好殘就快爛，但又搵唔返〝米奇〞喎！今次見到有〝龍貓〞，雖然，唔係我喜歡的〝米奇〞，但係老公喜歡的〝龍貓〞，所以就買左。

我行左好多地方都買唔到2008年Organizer既refill，可能遲左買喇！幾經辛苦被我係〝新城市~大眾書局〞搵到。

今日去到〝新城市〞冇晒BB車，服務員幫我地係〝西田〞留左一架，但要15分鐘內去到拎。於是就叫肥仔一家去拎車，我和老公就等高達叔叔，咁就比我發現係商場內有2個人扮的石膏人像，一個扮〝美國~自由神像〞，而另一個就唔知係乜。有個人同〝自由神像〞影相擺個喼係身後好似個〝自由神像〞要〝走老〞咁。

扮〝自由神像〞果個成日都整蠱人架，而另一個就真係郁都唔郁。我睇番D相個感覺好似電視台玩偷拍咁！好得意。

嘩！好肚餓，我與高達叔叔見面後立即去〝西田〞與肥仔一家會合。〝西田〞係4月27日改名為〝一田(Yata)〞。

我地〝西田~美食廣場〞食Brunch，娣婦食〝鰻魚飯〞、高達叔叔食拉麵，肥仔買〝小丸子〞大家一齊食，仲有買左個奶黃燒餅比阿B，咁阿B仲有食飯既！由於唔夠位肥仔與娣婦一齊坐，而我地3個加阿B又一齊坐，所以我唔知肥仔食乜。

我與老公就食〝Mos Burger〞，因為其他野都係差唔多價錢，所以就試新野喇！我覺得價錢都唔算貴丫！我地2個餐分別有一個包、飲品、雞脾或炸蝦都係41蚊個餐，炸蝦有5隻架！雞脾又大隻，老公再買多個薯條試，所以我覺得價錢合理。

〝招財貓〞和〝桃〞(唔知係咪呢？)，係〝新城市〞與〝西田〞連接的通內派扇和紙巾，紙巾內有一張一蚊贈卷。

食完飯又係西田幫阿B入左果汁既貨後，行返去〝新城市〞，又被我係地下面對〝大會堂〞個門口又有一個人扮〝巴黎~鐵塔〞，呢個又係好攪笑架又有好多表情和動作。全個商場的石膏像都係由老外扮架！

娣婦係我前幾個身位，佢一見到〝CitySuper〞有食譜就話比我知有食譜拎，每次我去〝CitySuper〞都會拎架！娣婦買左想買既野後，我地就帶阿B去公園玩勒！

 

我見個呢個野幾靚咪又影下囉！高達叔叔仲比果束野勾住D頭髮。

我見娣婦唔舒服，而老公要做〝掌門人〞前回去睇，加上高達叔叔話時間早就去我地家砌模型，所以我就決定早食飯，7點幾就去〝宜家傢俬〞食晚餐。

娣婦喉嚨好痛，痛到喉嚨食野都〝拿〞和失聲，今朝就再去睇醫生，所以唔多想食野。娣婦order一碟肉丸，不過都食唔晒，因為〝拿〞到喉嚨好痛。今餐有扒剧仲平過餐廳。

大家吃完飯除娣婦外每人都吃多一杯雪糕，非常滿足。頭先娣婦和肥仔拎左張煮肉丸既食譜比我。

頭先係〝新城市〞的汽水機買〝寶礦力〞飲，發現比平時的瘦長和多左80毫升，而味道都淡D，仲發現有個〝建議售價25元〞。

回到家對比一下除以上的不同外，仲有個名〝寶礦力水得〞(新城市)、〝寶礦力水特〞(市面)，一個〝得〞、一個〝特〞，唔知係咪唔同地方做既呢？兩支都係繁體字。