美味醬汁Cook得起

我一直都想買本關於醬汁的書，因為有些醬汁不知道是由什麼組合而成，只好買現成的，但來來去去都係那幾款。

上次去書局買書，但還有十分鐘關門，所以我看到這本書是關於醬汁，翻開略為看過就買左。回來看過後才知不單教你如果煮醬汁。

這書分開3部分來介紹醬汁，每款醬汁都會教你煮一道菜式去配合它，還在書最後部份印有英文版食譜。

Chapter 1〝前菜醬汁〞：11款醬汁

Chapter 2〝主菜汁〞：25款醬汁

Chapter 3 〝甜品醬汁〞：6款醬汁

書名：美味醬汁Cook得起

作者：Kannis Yeung

出版社：嘉出版有限公司

售價：HK$49-

煮者簡介：

Kannis Yeung~獅子座。天生愛煮意，麾登入廚人。日思夜想都只有一個字：煮。

有六年職業廚房經驗，現職餐廳廚師，是全港少數女性職業廚師之一。

2003年夏天與嘉出被邂逅，自此後餐廳廚房跳到書本上，推出了處女作《即食麵45變》，為一眾食麵迷提供了有趣煮法，《派對cook得起》是再顯心思之作，還有一系列「cook得起」麾登創意食譜系列‧‧‧

理想是加入老闆行列，擁有只此一家的小小咖啡店。

Kannis煮作：

《即食麵45變》初試啼聲、《派對cook得起》再展創意、
《便當cook得起》驚喜無限、《意粉cook得起》火速再版、
《意粉cook得起2》好評如潮、《曲奇蛋糕cook得起》全城熱選

介意‧執著

我看過的醫生們都說我是一個〝情緒緊張〞的人，要我凡事都要放鬆一點。今天醫生又是這樣說，因醫生一句〝成日都係咁架喇！〞我不斷思考有所領悟，因為我想擺脫痛楚。

醫生說我的病徵全是我自己〝情緒緊張〞而導致的，而鼻只是敏感。醫生問我睡得好嗎？一向都睡得麻麻地。你個人成日都好緊張架咩？做野放鬆D唔係你成日都係咁架喇！

雖然，我的家並不是富有家庭，但我從小就開心過我每一天，就算有煩惱都是微不足道的事，不過，自小的我已經只是與人分享我的開心事，其他的只會藏在心內，有時對於某人和事太執著，而且很介意別人怎看自己。

初踏入社會每人見到我都很開心，並說：「看見我真好，一看便知我是沒煩惱的人。」，因為我每天都笑著，從沒有哀愁掛於臉上。人漸長大顧忌多左，工作久了開始有時會愁眉不展，但只是一刻很快沒事，我仍然開心的過。

我沒想到〝介意〞、〝執著〞這4個字從小就令自己拉緊，從沒有放鬆過，我真的不知道如何放鬆。朋友們都說不要理會別人說什麼，就算你〝介意〞也沒用。我已走了人生1/3有多的路程不能再這樣活下去，我真的要嘗試放開一點，令自己與身邊的人都好些。

現在我去休息一下，輕鬆品嚐Blog友仔介紹的書，讓我心情放鬆些。

點解？

鬧鐘響，頭有少許痛、精神疲倦、肩頸仍然好痛，所以不多願起床，賴床時考慮湊唔湊阿B呢？但人人都要返工點好呢？心不斷爭扎，最後都係唔湊，於是我打電話回家，阿媽聽電話。

我：我今日都係唔湊阿B喇！一陣去睇醫生。

阿媽：你尋日唔去睇？冇人湊阿B，我要返十點放6點，咁叫阿公和阿婆睇住先，你尋日又唔去睇？

我：得喇！我一陣返嚟湊阿B。

阿媽：好喇！

掛線後怒氣

令我成個人都醒晒，心裡只有一個問題〝點解我都話病架喇！都係要我回去湊阿B〞。

我刷牙洗臉後，坐着仍感覺到很不舒服

，然後叫老公起身覆述一次與阿媽對話內容和幫我打多一次電話話〝我唔去湊阿B〞。老公居然開口第一句問我〝咁邊個湊阿B〞，不單沒有關心，還這樣說我使我嬲上加嬲

，我就話唔使打喇！我一陣回去湊阿B。

老公起身問我做咩發脾氣？又打電話回去等阿媽回覆有冇人湊阿B，回覆是細舅母回來湊阿B，細舅母成功申請成為香港居民現等緊拎埋回鄉証就立即回鄉，所以細舅母過左表姐到住幾日再回來住。我諗阿媽冇話比娣婦知，若然有應該娣婦會請假。

我與老公爭吵左一陣，不過都不是太激烈，爭吵後頭比之前痛，還有些頭暈。這次不是我一人吵老公都有加入戰團，之後老公都有微微氹我，因為佢要趕返工。

平時我唔舒服都有湊阿B，因為我有考慮過各人都要返工，不能常請假，但今日身體真係負荷不了，但我湊阿B都冇要求過有任何回報，點解我唔舒服唔湊都唔得。每個人都係意識到冇人湊阿B，但我真係唔舒服先湊唔到啫！點解冇人體諒下我呢

？開口第一句都係〝冇人湊阿B〞，我都唔想架！

我自知自已好〝小朋友〞，亦知佢地都好關心我，但當聽到果一刻真係好嬲，我知湊阿B係重要，但都要量解下我先得架！

我寫完這篇發洩完心情平伏了

，其實，我都好愛錫佢地每一個

，但我不會掛在唇邊，可能因為〝我是中國人〞。

清淡

尋日諗住阿媽今日放假我可以休息，不過阿媽早上要陪阿公去覆診。

今日起身個人好攰、肩、頸、頭都痛，但應承左湊阿B唯有撐住先，等晏晝先回老公家，所以今日都冇同阿B落街。我肚餓夾硬食左件〝自家製蛋治〞，但食食下想嘔，等到阿婆落街回來，我吃左粒〝長效〞見阿B眼訓就入房一齊訓，但佢係到〝依依~哦哦~〞唔訓，於是我地就出廳我自己訓。

阿B一見到我訓就叫又走來拍我，半夢半醒間聽到老豆叫阿B唔好攪這樣、那樣又話阿B曳，咁我就間中望下阿B睇下咩事，有時就起身抱下佢，終於等到阿媽回來。

阿媽餵阿B食粥和洗白白，跟住到我地食午飯阿B又要食。阿B拎住架〝法拉利〞跌落地可能夾到手指所以喊，喊完就訓，我都同佢一齊訓左一陣。

今晚晚餐吃粥，我與老公吃粥都會用〝辣椒蘿蔔〞、〝酸甜芥菜〞送粥，所以回去前去左〝惠康〞買。

原本諗住回去寫埋尋日未完的Blog，之後可以睡一睡，但因我分別與2個朋友傾電話，所以都冇休息過，只是完成左尋日的Blog。

以我經驗我諗我係〝腸胃炎〞，尋日已發覺個肚好脹到而家都未退，今日又作嘔和間中痾，我成個人好攰眼都撐唔大和肩頸痛到要死，我要去睡希望訓醒會好D，但如果明天都係咁我就會去睇醫生。

歡樂今宵

今日房署維修嘈醒左阿B，所以我決定一陣過肥阿哥到，等阿B可以靜靜地訓。
我聯絡有關人士老公、娣婦都冇問題，但肥仔要開〝OT〞放9點，所以唔駛預佢，
於是我就聯絡肥阿哥和阿嫂，肥阿哥要5、6點先回到家，
咁我就係屋企等肥阿哥電話。

我係廚房切〝甘筍〞預備今晚炒烏冬做配料時，阿B用架〝法拉利〞掉自己隻腳喊完訓左，不到十分鐘肥阿哥話回到家，但我要等阿B醒左先。

老公放工後要幫我去攞個電飯煲、Pingu暖水壺，這2個都係〝PCCW〞送比用得耐既客戶，不過有問題7日內拎返去，我諗住星期六先試。

從眾多禮品中老豆簡電飯煲，因為我可以用嚟焗蛋糕。

我等到娣婦和老公都回來，所以我地就唔帶阿B過去。
但我叫阿媽約8點就叫醒阿B，我怕佢訓得多今晚唔駛訓。

我地過去前就去〝惠康〞買烏冬、雞扒、腸，但冇晒雞扒我買左原隻雞脾起肉，
而腸係上次BBQ朋友係西田買過，但唔知係咪呢隻。

我係廚房起雞脾肉時，記起忘了拎阿媽煲既〝竹蔗水〞，我見之前老公想見阿B就叫佢回家拎和順便湊阿B過嚟！但老公怕被四大長老插，所以叫我打個電回去講聲先。

老公過到去來電救求〝阿B唔肯跟佢，係都要黏緊阿媽〞，我叫老公挾佢出門口，
阿B一出門口就生猛晒！

晚餐炒烏冬加條骨腸，不過這款骨腸都係比較醎。阿B係肥阿哥屋企有好多攪笑野，我地食完又睇阿B既短片，真係笑到死咁滯。

欲知阿B係肥阿哥家如何請到：雞脾

雞脾

阿B約1點訓左，但係訓唔夠半個鐘就被房署維修工程嘈醒左，之後自己係到狂笑。大約5點幾阿B用架〝法拉利〞掉落自己隻腳喊到出唔到聲，由於我係廚房整緊野，老豆話番我知架車跌落地冇聲應該都食得好應下。

阿B喊完就訓左，所以都冇帶佢過肥阿哥到，
後來老公幫我回家拎阿媽煲既〝竹庶水〞，我就叫佢順手帶埋阿B來。
佢個眼肚與黎明有得揮，而黑眼圈與熊貓有得比，不論訓得足夠與否都是這樣。

初初娣婦幫阿B拎住個碗，後來佢自己係到密密食。

食食下阿B高舉水杯與我地飲勝添！

肥阿哥食完炒烏冬都未夠飽再叫阿嫂〝叮〞隻雞脾比佢食，
阿B一見到立即口水流，目不轉睛咁望到隻雞脾實一實。

阿B想要肥阿哥又唔比，到肥阿哥比佢時佢又唔要，但係佢有陰陰嘴咁笑，
而且視線冇離開過隻雞脾。

肥阿哥食剩少少比阿B食，佢自己拎住食得好開心丫！
這次係阿B第一次自己食雞脾，不過我地平時都好少比佢食。

肥阿哥食完緊係飲汽水架喇！衰豬見到就〝笑騎騎〞，我地唔比佢飲，
佢見到老公飲又望住，最後都係肥阿哥比左佢飲，阿B真係好吃完雞脾又飲汽水，
人生如此〝乎復何求〞呢！

吃完晚餐一齊睇阿B短片，阿B仲黏住肥阿哥幾Sweet~有D係我之前錄既，而有D係今日晏晝時老公和肥阿哥與阿B講電話的片段，個個睇到都笑到碌地，
由其是睇阿B唱國歌，一唱〝起來〞阿B就立即起身，幾愛國丫~

睇完短片後阿B又攪事，一手執住肥阿哥隻拖鞋、一腳就著住另一隻。

相片偏黃色係肥阿哥影，因為佢冇用閃光燈，有D仲係用連環快拍影既，
所以捕捉到好多得意表情。

疲憊不堪

今日買麵包比阿B時見到有新鮮出爐〝酥皮蛋撻〞，而阿婆又鍾意食，所以就買左。阿公都冇去飲茶，因為我整左〝自家製~腿蛋治〞和吃左個撻。

近排唔知點解個人成日都好攰，就好似‧‧‧

今日早上十點幾陪阿B落完街就陪佢訓覺，我訓左佢都未訓，阿婆要落街叫我睇住佢，我〝哦~〞左一聲後又訓返，佢係到週圍走又自己玩，唔知係咪房署整野嘈得滯佢唔訓呢？

我有時半夢半醒時聽到佢叫就睇下佢咩事，阿婆話煲好粥，但因為用魚煲，所以阿婆餵佢，直到12點幾阿B食完粥，我就同佢入房訓，但我攰到唔想起身想繼續訓，但因這個時間應該係維修工人的lunch time我要趁這時令阿B入睡，等佢訓得幾多得幾多，入左房一陣阿B就訓左，但我真係攰到起身的力都沒有，所以睡左一陣。

阿B訓左約2小時就起身，我就同佢玩下又洗白白，到左6點幾阿婆餵阿B吃粥，我就坐著看書，但一看書就幾乎連字都看不清，這樣只好放棄留待狀態好才看。

近日都在晚上12點幾就睡比平時1、2點早，不知為何都會這麼疲倦，我很少會疲倦，之前就算通頂我仍可以不睡直到晚上正常睡的時間才睡，因為基本上我像小朋友般睡少少就可以再繼續，莫非是我老了或是我有病，所以我的身體響起警號才這樣。後天媽媽放假希望我都可以休息一天。

撞毀〝法拉利〞

阿B一早已拎汽水玩喇！拎出嚟~又放回入去不斷重覆。

大家睇下這架〝法拉利〞已被阿B撞到損壞不堪，
其實，我尋日已發覺變成咁樣，個車尾箱冇左個蓋。

前右轆已經歪左，如果要教正返我怕會弄斷。

而對後轆仲慘成個連車軸都甩出嚟！
我尋日已經整好，但今日又爛再整又爛過，真係激死！
不過，肥仔回來拎螺絲批整過我以為佢整好喇！但剛問過老公一扯就甩。

晏晝老公來電我問佢同唔同阿B傾計？我開spearker等佢同阿B傾，
佢問阿B飲唔飲蘋果汁？阿B點頭。阿B不單有同老公傾電話，因為我有事找肥阿哥，所以仲有同肥阿哥傾過電話，到新聞時段會播國歌，阿B一向聽到國歌都會跟住唱，這些我全部都有錄短片架！

老公來到比蘋果汁佢，丫~佢居然唔采老公喎！
但我拎住佢就有反應喇！

我就立即比老公，跟住老公就放係褲袋內
睇下阿B扮晒野走去拎，但都不忘睇下電視。

之後我去左煮餸，娣婦執野時將個袋貼左係阿B背脊到，
老豆見到唔鍾意，因為佢話阿B咁樣好似〝罪犯〞，我地係新潮人〝百無禁忌〞。

〝無名氏〞張國榮與青山

這件事係關於青山與張國榮，我諗可能有好多人都知道，但當時人都係在訪問中才知道，而我係今日才知道。

今日我睇〝肥媽私房菜~台北友味道〞，這集的嘉賓〝青山〞在他們的談話間肥媽問了他一個問題：「每次你唱歌表演都收到一個花牌署名係〝無名氏〞，你知唔知係邊個？」，青山當然不知道，這個〝無名氏〞就係〝張國榮〞，這件事係哥哥經理人係哥哥死後才道出‧‧‧

話說哥哥初出道時出席一個活動要唱歌，可是他正要趕著上飛機，但試問新人又怎會敢向工作人員要求唱先呢？但青山知道就主動向工作人員要求比哥哥唱先，而自己就遲D先出場。

從此每次青山有演出哥哥就用〝無名氏〞署名來送花牌，從這件事中覺得現今很少人會像〝張國榮〞那般，不但做事能持之以恆，亦沒有要求有任何〝着數〞或回報，但太可惜哥哥‧‧‧

期待‧開心

今日晏晝阿B對我做左件令我好冧既事，我坐係地下睇電視阿B就爬上我到，我見佢個口張開成〝O〞形不繼向我移近，而我就微微向後移，因為我好驚呀！佢頭先咬完我膊頭和大脾，終於到喇！原來佢係〝錫〞我丫！

嘩！真係開心到震

，佢從未試過咁架！阿B你想要咩？姑姑媽都應承你。

老公食完飯來電，我就同佢講想買本書星期六唔記得買，但書局關9點，唔知老公放工再嚟吃飯，然後去書局趕唔趕得切呢？

我換好衫又梳好頭等老公，老公嚟到都未有人煮餸，我就立即入去煮再〝拿拿淋〞食飯，去到書局仲有10分鐘就關門喇！

我搵左一陣都搵唔到就叫店員幫手，我叫老公去比錢，而我繼續睇下烹飪書，因為春季85折減價好難至有。依~比我睇到有本書係關於醬汁，所以又買多本喇！哈~哈~

之前有個Blog友睇過〝做自己 是幸福的〞覺得不錯，所以我都好希望自己睇完後都有些得着。但老公話我有好多書未睇喎！係丫~我會努力架喇！

我係一個不喜歡睇字的人，但突然間有好多字湧過嚟！不過，我都好期待去睇每一本書。

 

Tropicana純品樂

我未回家前已買左麵包比阿B，因為屋企樓下麵包質地比較硬，
但我地去買既時候都仲暖。

雖然我買左麵包，但我冇偷懶有同佢落街架！我順便去7-11交錢電話費，不過佢又開始眼訓。我去到7-11個收銀問我買唔買〝Tropicana純品樂〞果汁只需$5，我問阿B飲唔飲？又唔應我，但個收銀話蘋果對小朋友好，咁我就要左一支。

之前阿B行左一段路跟住唔肯行，我就同佢講〝飲唔飲蘋果汁丫？飲就行去坐坐喇！〞，佢起勢咁點頭跟住走去拍張櫈，飲完又行下，行左一陣自己又走去拍張櫈再飲過，行多一陣就同佢去左睇車，睇左半個鐘車後就回家。

今日吃粥有新花樣，上星期阿媽拎左個紙箱返嚟執野，
而家就變左阿B食粥既新位置，阿媽餵粥、舅母坐旁、阿B坐係箱內就邊玩邊吃粥。

阿B自己倒水，嘩！你咁倒好危險架~好在個樽冇水啫！

我見阿B識識地開樽蓋，但我地從冇教過，原來係舅母教既，舅母都好鍾意阿B架！

後來比佢發現紙箱有個窿，佢就將個蓋從個窿拋出去。

玩玩下又比個樽我，你比個樽我做乜喳！我唔得閒又要影相又要錄短片。

眼訓食完粥就扭計，睇下佢個衰樣，之後洗埋白白先比佢訓。

小朋友緊係食完又訓完又玩喇！佢見到位金沙知道食得就拎左，
仲拆開左少少，但又食唔到，所以放棄左。

某年〝蘋果〞加錢換書和這2支野關於聖誕節，
其實，我叫老公換書時都唔知有呢2支野。我見冇用就比阿B玩下，佢好鍾意喎！

我諗阿B以為係梳，你睇佢當梳用，不停咁梳。

娣婦放工去左入貨回來，阿B見到立即拎住拖嚟拖去，乜你又要飛喇！

〝Tropicana純品樂〞蘋果汁阿B好鍾意飲，食晚飯前飲剩得返少少咋！

寒氣再迫人

嘩！尋日雖風大，但不凍，可是今日天氣就真係凍到〝心震〞。

早上醒一醒發覺比老公逼住，咁緊係推佢過D喇！推左幾下先郁都攪到我成個人醒晒，望下個鐘既然都9點咁咪起身囉！

我起身後就執返整齊Notebook內的檔案，執丫~執~執丫~執~執到差不多2點有D肚餓添！就入廚房煲水〝焗〞杯麵食，係廚房聽到好細聲好似有人講野咁喎！停一停想聽清楚D又冇聲咁咪繼續，但個心有D驚，跟住又有聲，於是懷著驚慌心情慢慢行出去睇下，哦！原來老公醒左話落街食野。我問老公今晚吃咩？落街順手買埋，佢話煮麵喇！

每次煮麵老公都要買丸做餸，但老公睇過凍肉舖果D好肉酸，見到都唔想食，再轉去〝惠康〞睇下，睇左好耐都簡唔到，老公就決定蒸埋雪櫃既點心，最後只是用印花換左個〝Wedgwood 單柄鍋附蓋20cm 3.6L〞走人，但我仲有3款想換，所以努力儲印花中，然後去左藥房買埋日用品就打道回府。

頭先7點幾我洗完白白想去熄爐時老公跟住又去洗白白，平時夜一夜先沖涼架嘛！又要等頭乾先訓，今日幾乖唔駛我勞氣。跟住我去蒸點心、煮麵食，食完老公洗碗。

天氣真係凍，晏晝叫杯熱飲一陣就凍晒，手腳都凍都紫色，涼左個熱水涼先冇咁凍咋！

如果明朝凍既話就慘喇！我厚既外套係屋企，希望明天唔好咁凍就好喇！

Wii另一新奮鬥目標

尋日還未掃地、拖地，所以我起身後就立即行動和抺晒左全屋塵諗住比個驚喜老公等佢讚下我架麻！點知老公訓到11點幾睜開眼問：「你有冇用〝滴露〞拖地？」，緊係有喇！之後又再訓過。

今日我要拎野返屋企順手睇下阿B，先再過肥阿哥家。老公話回到家樓下的茶餐廳先買野食，我地順便買埋比阿嫂吃。等左好耐先有車，上到車阿嫂來電要改單為〝肉絲炒烏冬〞，而我例牌都係食〝乾炒牛河〞，去到茶餐廳老公諗左好耐結果食〝炸雞脾多士〞，但隻雞脾比平時細一半，好明顯係比人切左一D，因為有塊雞皮多左出嚟！

我見到肥阿哥部新電視覺得大左D又set得高左D，阿嫂話三十幾吋全部冇貨得返〝42吋〞，所以買左〝42吋〞，阿嫂都覺高睇電視時條頸好攰，但肥阿哥唔覺得高話而家先係正確高度。

頭先問過老公想打咩game？佢話唔知，不過想我做下運動，咁即係玩〝Wii〞喇！我比上次重左〝0.2KG〞，而BMI就一樣。Wii初時每一個遊戲都係我既奮鬥目標，玩耐左轉移目標〝高台跳雪〞，但係個榜既記錄全都係肥阿哥和肥仔，每跳都要18X米先可以上榜攪到我地冇晒癮，之後我再轉移目標〝碌波波〞，但今日我又轉左新目標為〝扮企鵝食魚仔〞。

今日我〝碌波波〞和〝扮企鵝食魚仔〞差少少就可以破佢地記錄成為〝冠軍〞真係激死我。PlayStation 3個牆紙好靚，肥阿哥話係PlayStation 3免費下載，仲有好多款添！

我地晚餐有烏冬、午餐肉、蟹柳、火腿和2款灣仔碼頭水蛟，由於肥阿哥肚餓，所以我和阿嫂7點幾就開始煮晚餐，其實係阿嫂煮，而我做助手、執枱和set位，餸成煲上唔駛搵野盛起。

雖然，每次個湯都有調味，但係我地都會再加這些調味料。

老公問阿B一陣會唔會過來，肥仔就打比娣婦問，而家還在娘家，但差不多走。我電話響老公幫我聽左，因為我洗緊碗，阿媽來電叫我回去拎羽絨，因為氣溫凍左和大風。由於時間不早娣婦不過來了，咁我一陣有時間過去睇下佢先，晏晝回去時佢訓左。

晚餐吃完再吃左碗雪糕，然後坐左一陣就回去睇下阿B。外面風雖大，但我一點都不覺凍，所以我回到家冇拎羽絨。