今早同阿婆帶埋阿B去買餸，之後去左阿婆朋友~客氣婆婆家，因為客氣婆婆煲左〝番薯糖水〞叫阿婆去食，坐左一陣客氣婆婆就拎左袋野出嚟！逐一話我知袋裡有利是，還有買左一筒薯片比、一包餅仔比阿B、幾個蝦籽餅比老豆，仲有2個橙添！上年第一封收既利是都係客氣婆婆比。
佢間中都有買野請我地食，真係有D唔好意思，因為佢已是八十幾九十歲，我地都有叫佢唔好買留番比自己食喇！但佢太客氣仍然繼續買，有時又幫我儲印花，因為有唔要比佢，間中都會買番D野比佢或者整野食都會請佢食，所以我今年有時間整蘿蔔糕都會比一底佢作回禮。
我尋日話今日會執埋個廳，同阿B落完街見佢眼訓就陪佢訓左，跟住上網整D野，我午飯都未食佢就醒左，訓醒後好黐身，我只執左少少又抺左少少野，唯有明天繼續。
今日運程原本都不錯，但由老公6點幾放工後一個電話就扭轉左。每日老公都係用電話聽歌，頭先電話中講佢個藍芽耳筒得一邊有聲叫我問肥阿哥有冇，肥阿哥問關於耳筒既野我又唔多識，於是我叫老公直接打比肥阿哥，之後肥阿哥回覆我有，我講左9點3至半過到去，食完飯就立即過去肥阿哥到。
我地好正常禁制等電梯，等緊冇野做周圍望，老公話有電梯咪入囉！正當我行入左2步，老公話有灘水叫我小心。我見老公禁關門和層數後關門又開番，我又試下都唔得層數又唔着燈，咁我就禁住層數唔放手，唉！得喎。
電梯郁左幾下就唔郁，心知不妙，一定係被困電梯，老公才發現層數按鈕下面平時有塊板蓋住個控制板而家唔見左塊板，我就叫老公禁警鐘與管理員對話，管理員回覆已找了電梯維修員前來要等15分鐘。唉！這次係我出世至今第2次被困，2次都係同老公一齊，仲要係得我地2個人。
突然，電梯外聽到有個阿嬸問有冇人？又話佢鎖左電梯問我地點關門架？佢諗住拎地拖拖電梯內的水，我估佢係清潔阿嬸，管理員見到就問佢有冇鎖電梯。
清潔阿嬸：我有鎖電梯架喎！
清潔阿嬸：佢地點樣關門架？
清潔阿嬸：點解會關到門架？
清潔阿嬸不斷重覆這些類似的說話，仲語帶有點埋怨我和老公添！老公都有問佢點鎖電梯，不過，佢好似聽唔到，老公仲話出到去會話佢添丫！我話算喇！之後管理員用對講機話頭先個清工鎖左電梯，你地點怎樣關到門呢？我地將全個過如實講。
我係一個有交帶既人緊係話比肥阿哥聽現況先喇！我仲話個清潔阿嬸好似埋怨我地咁！肥阿哥叫我唔好諗咁多野，我講老公都話一陣出去話佢添丫！隔左一陣肥阿哥又來電問我究竟係邊到困電梯，又話打去管理處問下，肥阿哥回覆要等到9點9才有人來。
我係電梯內仍然聽到清潔阿嬸不斷重覆果幾句野，突然，聽到肥阿哥把聲問我地係唔係到？幾分鐘後電梯維修員到，佢用手掹開左少少門叫我地行後唔好伸手和頭去電梯門到，之後就走左，我見到我地好似上左大半個電梯位，跟住個清潔阿嬸又出現。
清潔阿嬸：都唔知你地點關門架？
肥阿哥：我問你點鎖門？
清潔阿嬸：咁佢地點關門？
肥阿哥：你而家仲咩埋怨佢地丫？我問你點鎖門丫？
清潔阿嬸：我冇埋怨佢地丫？
初時對話肥阿哥語氣有點唔老嚟，因為清潔阿嬸開口已有責備、埋怨我地既語氣，跟住肥阿哥開始講粗口發老脾喇！佢地對話中期個管理員入嚟叫清潔阿嬸唔好嘈喇！但清潔阿嬸都係唔收聲。以下對話肥阿哥係夾雜粗口，但我冇打到，請自行加上。
肥阿哥：冇，你又話佢地點關門？
清潔阿嬸：咁佢地點關門丫？
肥阿哥：你而家鎖左我屋企人係入面，我問你點鎖門？
清潔阿嬸：我鎖左門去拎地拖諗住拖電梯入面D水，我已經掹左舊野出嚟喇！
肥阿哥：咁有電梯緊係搭架喇！點知冇左舊野啫！
清潔阿嬸：我鎖左門架喎！點解佢地會關到門？費事采你。
肥阿哥未講完，清潔阿嬸講完果句就走人，之後我仲聽到好大力防煙門回彈聲，我諗係肥阿哥激氣得滯跟住個清潔阿嬸行去後樓梯，肥阿哥好大力開門。
肥阿哥最憎人做左唔認，仲要係到死撐。我好奇怪開首肥阿哥語氣唔多好，佢仍然保持責備、埋怨語氣，肥阿哥繼而講粗口，又有人調停都唔收聲，仍然不斷講。老公話D師奶係咁，佢公司D part-time師奶們都係咁。
電梯維修員用對講機又叫我地行後唔好伸手和頭去電梯門到，電梯郁左幾下就停左，老公話應該佢係機房用人手拉電梯，幾分鐘後電梯維修員開電梯門，問我地有冇唔舒服？由於還未到安全和埋想位置，所以要再等，係等既期間我同老公講一陣走時要同管理員講聲〝唔好意思〞，因為攪到佢，但唔知肥阿哥果邊點呢？電梯再郁多2下又停左，肥阿哥同我地講佢回家先，跟住電梯維修員就協助我地上去。
肥阿哥住頂樓，電梯維修員又係要去頂樓，我地就一齊搭電梯，在電梯期間電梯維修員問我地點樣關門？我地如實說出。
電梯維修員：清潔阿嬸，應該校左慢制，因為控制板係最底，我地又要去41樓係最高，而且又禁住唔放，咁樣就起左化學作用〝困電梯〞喇！
我：咁即係~如果我地去其他層數就唔會有事喇？係去頂樓禁住唔放才出事。
電梯維修員：係丫！
我：咁點算丫？
電梯維修員：冇架，呢隻電梯係咁樣。
我地上到去見到肥阿哥仲有D嬲，我地就將整個過程講一次，肥阿哥和阿嫂都覺得個清潔阿嬸不對，肥阿哥仲話明天要去投訴。老公攞左佢要既野，仲要睇埋〝秀才愛上兵〞先走，我係廣告期間拎左D野問肥阿哥，佢一睇就知係寫網頁法語，跟住比左2本書我睇，跟住我見佢心情平服番，我諗我呢排會更加忙。
我地走既時候管理員都對我地講〝唔好意思〞，我地亦都有講，管理員解釋個清潔阿嬸鎖左電梯想拖地，但佢鎖左又冇貼牌，管理員話部電梯有顯示，老公話冇留意，管理員又問我地點樣可以關門？我地將電梯維修員既說話講一次。其實，照電梯維修員講法，清潔阿嬸既做法唔係鎖電梯喇！咁究竟清潔阿嬸識唔識架？
