今日一早就去左街市、凍肉檔買材料準備一陣回家醃野食，留待星期日BBQ用，但今日仲要陪肥仔帶阿B去打〝第二支~流感針〞，所以我今日要分秒必爭。
8:00-9:00：返到去阿B、肥仔都未醒，就立刻拎野去溶雪。
9:00-10:00：阿B醒左，但係可能近日天氣凍，阿B醒左都唔出聲、唔郁，只是張開眼訓係到，所以要間中入去睇下才知他醒未，天氣一凍佢就冬眠。我見佢唔郁就去左洗頭，然後去開奶、執袋、換片，有關阿B既野都做完。
10:00-11:00：我見肥仔仲未起身，就教阿B叫佢起身，我就去換水繼續溶雪、吹頭。肥仔起身就同我講：「阿B尋晚成晚叫，到3點才睡得好。」，講完就去洗白白，我就睇住阿B。坐坐下叮一聲〝死喇！溶完雪仲要隔水。〞，同一時間肥仔叫我去換衫，佢就得可以出門口。我即刻去睇下情況如何，有D溶晒，有D差少少，我唔埋〝三七二一〞將全部都拎去隔水，到我返黎都應該差唔多。
診所內有好多人，但姑娘居然話入多一個到我地，我地行左出診所等，又與門外等拎藥的BB家人傾計，佢地等左半個鐘都未有藥。從我身後有人叫阿B個名，原來姑娘是也，可以入去睇醫生。
醫生問咩事？肥仔話打〝第二支~流感針〞，跟住我又問醫生2個問題。
第一個問題：阿B隻眼仲有冇事？因為佢仍然成日卒眼。
醫生診斷後是沒事的，醫生就反問我阿B有冇流鼻水、鼻塞、打乞嚏？有好多鼻膏。有時個鼻有野係到都會形響到隻眼，所以卒眼，應該都係敏感。
第二個問題：我想問阿B要唔要剪利筋？因為家中4個老人家都話佢到而家都未講，擔心佢係黐利筋、啞。
可是醫生未能判斷到，因為阿B唔肯伸利仔比醫生睇。醫生問佢條利係咪好似〝蛇舌〞咁？仲晝埋出黎，成個〝W〞咁。我話係，但冇咁犀利。醫生話唔緊要，若是真的遲D做都不怕。
我：大個都做得架咩？但係家中4個老人家話大左就唔可以做。
醫生：大個點解唔做得丫！老人家係咁！以前D人自己用交剪剪，其實咁好危險。我有個客佢黐利筋好勁，但係佢講野同我地一樣無分別~好正常。因為有D人聽覺靈敏，識運用喉嚨2組肌肉去輔助講野。咁佢叫〝爸爸〞、〝mum mum〞既時候清唔清楚？
我：佢都未識講野？
醫生：佢歲半未識講野？應該識講野，咁單字呢？淨係依依哦哦？(其實，阿B未有歲半，只是得14個月)
我：有時撞口卦都會講到〝爸爸〞、〝mum mum〞既音。咪有時依依哦哦，好似D啞巴一樣，所以老人家怕佢啞。
醫生：有冇做過Test？應該做過2次。
我：有，1歲係健康院做過正常，第二次要係歲半才做。
醫生：你要唔要做測試，我可以轉介你去做，抑或你等第二次測試，到時有問題佢都會轉介你去。
我：(思考中)
醫生：黐利筋、啞是2回事，黐利筋唔係啞，黐行筋講到野既，只不過係扯實左啫。
醫生一吉針阿B即刻變淚人，之後醫生請餅比佢食就立即收聲~真係萬試萬靈。醫生叫阿B請佢食，阿B唔理醫生。我都同醫生講我地叫佢有時都唔應，由其是出街直情唔應。
醫生：你同佢講野有冇眼神按觸？係咪好少小朋友？佢見到小朋友會唔會同小朋友玩？
我：有時有。係丫！住屋得佢一個BB。佢望住人，有時會搶人野。
醫生：咁佢比人搶野有冇發脾氣？
我：咁又冇。
最後，醫生都係轉介我地過去，其實，如果醫生唔講我都想叫佢轉介，因為我怕第二次測試時，唔轉介。
阿B回到家中不到半個鐘已睡了，趁佢訓左我即刻繼續工作。我~醃丫~醃丫~醃、整丫~整丫~整，埋頭苦幹，佢地返黎喇！佢地返黎不久阿B就醒，因為佢地講野好大聲嘈醒左。
阿B通屋走，玩玩下企左係塊板前扭要出〝騎樓〞，這是用來分隔廳與〝騎樓〞的，但當時我趕住醃野，阿媽、阿婆執緊大陸帶來的東西、阿公和肥仔訓緊，得老豆一個得閒睇住阿B。
突然，聽到大家都好慌張，然後阿B就呱呱大哭，我隨即睇下咩事，阿婆話阿B頭先要跨過塊板出黎，試問佢又點夠高呢？足知翻一個大斤斗就出左黎，好在阿媽用手擋一擋，唔係就‧‧‧。當然我又係抱住佢喇，然後用〝殺手簡〞~野食令他收聲，之後阿B〝依然故我〞。
